ശുഭാംശു ശുക്ല ഉള്‍പ്പെടുന്ന ആക്‌സിയം 4 ദൗത്യ സംഘം ഭൂമിയില്‍ എത്തി. കലിഫോര്‍ണിയയ്ക്കു സമീപമുള്ള പസഫിക് സമുദ്രത്തില്‍ ഇന്ത്യന്‍ സമയം ചൊവ്വാഴ്ച വൈകിട്ട് 3.01ന് സ്പ്ലാഷ് ഡൗണ്‍ ചെയ്തു. ഡ്രാഗണ്‍ ഗ്രേസ് പേടകം റിക്കവറി ഷിപ്പിലേക്കു മാറ്റി. മിഷന്‍ കമാന്‍ഡറായ പെഗ്ഗി വിറ്റ്‌സനു (യു.എസ്) പിന്നാലെ രണ്ടാമനായി മിഷന്‍ പൈലറ്റായ ശുഭാംശുവും പുറത്തിറങ്ങി. തുടര്‍ന്ന് സ്ലാവോസ് വിസ്നീവ്‌സ്‌കി (പോളണ്ട്), ടിബോര്‍ കാപു (ഹംഗറി) എന്നീ സഹയാത്രികരും പുറത്തിറങ്ങി. രാജ്യാന്തര ബഹിരാകാശനിലയത്തില്‍നിന്ന് ഇന്നലെ ഇന്ത്യന്‍ സമയം വൈകിട്ട് 4.45ന് വേര്‍പെട്ട ഡ്രാഗണ്‍ ഗ്രേസ് പേടകം 22.5 മണിക്കൂറിനുശേഷമാണ് ഭൂമിയില്‍ എത്തുന്നത്. 14 ദിവസത്തെ ദൗത്യത്തിനുപോയ സംഘം 18 ദിവസം നിലയത്തില്‍ താമസിച്ചു.

സ്‌പേസ് എക്‌സിന്റെ സ്പീഡ് ബോട്ടുകളാണ് റിക്കവറി ഷിപ്പിലേക്ക് പേടകത്തെ ചങ്ങലകളില്‍ ബന്ധിച്ച് എത്തിച്ചത്. കരയില്‍ എത്തുന്നതിനു പിന്നാലെ നിരവധി ആരോഗ്യ പരിശോധനകള്‍ക്ക് സംഘം വിധേയരാകണം. റിക്കവറി ഷിപ്പില്‍നിന്ന് ഇവരെ ഹെലികോപ്റ്റര്‍ മാര്‍ഗം തീരത്തേക്ക് എത്തിക്കും. ഇതിനുശേഷം ജോണ്‍സണ്‍ സ്‌പേസ് സെന്ററില്‍ ഏഴു ദിവസം നിരീക്ഷണത്തില്‍ കഴിയണം. മൈക്രോ ഗ്രാവിറ്റി പരിതസ്ഥിതിയില്‍ 18 ദിവസം കഴിഞ്ഞ ശുഭാംശുവിന്റെ ആരോഗ്യനില നിരീക്ഷിക്കാനായി ഐഎസ്ആര്‍ഒയുടെ സംഘവും യുഎസില്‍ എത്തിയിട്ടുണ്ട്.

ശുഭാംശു ശുക്ലയെ പ്രധാനമന്ത്രി നരേന്ദ്ര മോദിയെ അഭിനന്ദിച്ചു. രാജ്യാന്തര ബഹിരാകാശ നിലയത്തിലെത്തിയ ആദ്യ ഇന്ത്യക്കാരനെന്ന നിലയില്‍ ധൈര്യത്തിലൂടെയും ആത്മാര്‍പ്പണത്തിലൂടെയും കോടിക്കണക്കിനു പേരുടെ സ്വപ്നങ്ങളെ സ്വാധീനിച്ച വ്യക്തിയാണ് ശുഭാംശു എന്ന് പ്രധാനമന്ത്രി എക്‌സില്‍ കുറിച്ചു. ഇന്ത്യയുടെ ഗഗന്‍യാന്‍ പദ്ധതിയിലേക്കുള്ള മറ്റൊരു നാഴികക്കല്ലാണ് ശുഭാംശുവിന്റെ യാത്രയിലൂടെ പിന്നിട്ടതെന്നും പ്രധാനമന്ത്രി പറഞ്ഞു.