അബുദാബി- യു.എ.ഇയിലേക്ക് യാത്ര ചെയ്യുന്ന ഇന്ത്യക്കാര്‍ക്ക് ഇനി പണമോ വിവിധ കാര്‍ഡുകളോ പേയ്മെന്റ് ഉപകരണങ്ങളോ ഇല്ലാതെ പാസ്‌പോര്‍ട്ടിനെ മാത്രം ആശ്രയിച്ച് യാത്ര ചെയ്യാന്‍ കഴിഞ്ഞേക്കും. അതിവേഗം വികസിച്ചുകൊണ്ടിരിക്കുന്ന ഡിജിറ്റല്‍ പേയ്മെന്റ് അടിസ്ഥാന സൗകര്യങ്ങളാണ് ഇതിന് സഹായകമാകുന്നത്. ദുബായിലെ ഇന്ത്യന്‍ കോണ്‍സല്‍ ജനറല്‍ സതീഷ് കുമാര്‍ ശിവനാണ് ഈ വിവരം പങ്കുവെച്ചത്.
യുണിഫൈഡ് പേയ്‌മെന്റ്സ് ഇന്റര്‍ഫേസിലേക്ക് (UPI) എല്ലാ പ്രധാന വ്യക്തിഗത സാമ്പത്തിക ഉപകരണങ്ങളും തടസ്സങ്ങളില്ലാതെ സംയോജിപ്പിച്ച്, അന്താരാഷ്ട്ര ഇടപാടുകള്‍ എളുപ്പമാക്കുന്ന ഒരു ഭാവി അദ്ദേഹം സ്വപ്നം കാണുന്നു. യുഎഇയില്‍ യുപിഐയുടെ വിപുലീകരണം സംബന്ധിച്ച ഒരു പരിപാടിയില്‍ സംസാരിക്കവെ, ഇന്ത്യന്‍ യാത്രക്കാര്‍ക്ക് അതിര്‍ത്തി കടന്നുള്ള യാത്രകളും പേയ്മെന്റ് അനുഭവങ്ങളും ലളിതമാക്കാനുള്ള വലിയൊരു സംരംഭത്തിന്റെ ഭാഗമാണിതെന്ന് അദ്ദേഹം പറഞ്ഞു.
എല്ലാം എളുപ്പമാക്കുമെന്നും, വ്യക്തി വിവരങ്ങളും സാമ്പത്തിക ഉപകരണങ്ങളും ഡിജിറ്റലായി ഏകീകരിക്കുകയാണ് ലക്ഷ്യമെന്നും അദ്ദേഹം വ്യക്തമാക്കി. കൃത്യമായ സമയപരിധിയോ സാങ്കേതിക വിവരങ്ങളോ അദ്ദേഹം പങ്കുവെച്ചില്ലെങ്കിലും, ഇതിനായി പ്രവര്‍ത്തനം ആരംഭിച്ചതായി അദ്ദേഹം പറഞ്ഞു.
യു.എ.ഇയിലുടനീളം യു.പി.ഐയുടെ സ്വീകാര്യത വര്‍ദ്ധിപ്പിക്കുന്നതിനുള്ള NPCI ഇന്റര്‍നാഷണലിന്റെ ശ്രമങ്ങളുടെ തുടര്‍ച്ചയാണ് ഈ പുതിയ പ്രഖ്യാപനം. ലുലു, ദുബായ് ഡ്യൂട്ടി ഫ്രീ തുടങ്ങിയ പ്രധാന റീട്ടെയില്‍ ശൃംഖലകള്‍ ഇതിനകം തന്നെ യു.പി.ഐ സംവിധാനം സ്വീകരിച്ചു കഴിഞ്ഞു. അതിനാല്‍, ഇന്ത്യന്‍ സന്ദര്‍ശകര്‍ക്ക് അവരുടെ ഇന്ത്യന്‍ ബാങ്ക് അക്കൗണ്ടുകളില്‍നിന്ന് നേരിട്ട് പണമടക്കാന്‍ പരിചിതമായ മൊബൈല്‍ ആപ്പുകള്‍ ഇപ്പോള്‍ ഉപയോഗിക്കാം.
യുഎഇയുടെ പ്രാദേശിക പേയ്മെന്റ് സംവിധാനമായ AANIയുമായി കൂടുതല്‍ സംയോജിപ്പിച്ച് ഇരു രാജ്യങ്ങള്‍ക്കുമിടയിലുള്ള ഡിജിറ്റല്‍ സാമ്പത്തിക ബന്ധം കൂടുതല്‍ മെച്ചപ്പെടുത്താനാണ് അടുത്ത ഘട്ടത്തില്‍ ലക്ഷ്യമിടുന്നത്.
Related News
