കോട്ടയം: സഹോദരിയോടൊപ്പം വീട്ടിനുള്ളില്‍ കളിക്കുന്നതിനിടെ കഴുത്തില്‍ തോര്‍ത്ത് കുരുങ്ങി 14കാരന്‍ മരിച്ചു. കാഞ്ഞിരപ്പള്ളി മഞ്ഞപ്പള്ളി വേലിത്താനത്തുകുന്നേല്‍ സുനീഷിന്റെയും റോഷ്‌നിയുടേയും മകന്‍ വി.എസ് കിരണ്‍ (14) ആണ് മരിച്ചത്. ഭരണങ്ങാനം സെന്റ് മേരീസ് ബോയ്‌സ് ഹൈസ്‌കൂളിലെ ഒമ്പതാം ക്ലാസ് വിദ്യാര്‍ഥിയാണ് കിരണ്‍.

കുട്ടികള്‍ വീട്ടിനുള്ളില്‍ കളിക്കുമ്പോള്‍ മാതാവ് റോഷ്‌നി കുളിക്കുകയായിരുന്നു. വസ്ത്രങ്ങള്‍ ഇടുന്ന അയയില്‍ തോര്‍ത്ത് കെട്ടി ആടികളിക്കുകയായിരുന്നു കുട്ടികള്‍. ഇതിനിടെ തോര്‍ത്ത് കഴുത്തില്‍ കുരുങ്ങുകയായിരുന്നുവെന്ന് പറയുന്നു. ഉടനെ ഈരാറ്റുപേട്ടയിലെ സ്വകാര്യ ആശുപത്രിയിലും തുടര്‍ന്ന് ചേര്‍പ്പുങ്കിലെ സ്വകാര്യ ആശുപത്രിയിലും പ്രവേശിപ്പിച്ചെങ്കിലും രക്ഷിക്കാനായില്ല. തിടനാട് പഞ്ചായത്തിലെ അമ്പാറനിരപ്പേല്‍ ഭാഗത്ത് മാതാവിനോടും സഹോദരിയോടും ഒപ്പമാണ് കിരണ്‍ താമസിച്ചിരുന്നത്. കൃഷ്ണപ്രിയയാണ് സഹോദരി. മരണത്തില്‍ ദുരൂഹതയുണ്ടോയെന്ന് അന്വേഷിക്കണമെന്ന് സുനീഷിന്റെ ബന്ധുക്കള്‍ ആവശ്യപ്പെട്ടു.