ന്യൂദല്‍ഹി- എയര്‍ ഇന്ത്യയുടെ ബോയിംഗ് 787, ബോയിംഗ് 737 വിമാനങ്ങളിലെ ഫ്യുവല്‍ കണ്‍ട്രോള്‍ സ്വിച്ചിന്റെ (FCS) ലോക്കിംഗ് സംവിധാനത്തില്‍ നടത്തിയ പരിശോധനകളില്‍ പ്രശ്നങ്ങളൊന്നും കണ്ടെത്തിയില്ലെന്ന് എയര്‍ ഇന്ത്യ അറിയിച്ചു. ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷന്‍ (DGCA) ജൂലൈ 21-നകം ഇന്ത്യയില്‍ രജിസ്റ്റര്‍ ചെയ്ത ഭൂരിഭാഗം ബോയിംഗ് വാണിജ്യ വിമാനങ്ങളിലും സ്വിച്ചുകള്‍ പരിശോധിക്കാന്‍ ഉത്തരവിട്ടിരുന്നു. ഇതിന് പിന്നാലെയാണ് എയര്‍ ഇന്ത്യയുടെ ഈ പ്രസ്താവന.

'എയര്‍ ഇന്ത്യ തങ്ങളുടെ മുഴുവന്‍ ബോയിംഗ് 787, ബോയിംഗ് 737 വിമാനങ്ങളിലെയും ഫ്യുവല്‍ കണ്‍ട്രോള്‍ സ്വിച്ചിന്റെ ലോക്കിംഗ് സംവിധാനത്തില്‍ മുന്‍കരുതല്‍ പരിശോധനകള്‍ പൂര്‍ത്തിയാക്കി. ഈ പരിശോധനകളില്‍, ലോക്കിംഗ് സംവിധാനത്തില്‍ യാതൊരു പ്രശ്നങ്ങളും കണ്ടെത്തിയില്ല,' എയര്‍ലൈന്‍ ഒരു പ്രസ്താവനയില്‍ പറഞ്ഞു.

എയര്‍ ഇന്ത്യ ജൂലൈ 12 ന് സ്വമേധയാ പരിശോധനകള്‍ ആരംഭിക്കുകയും DGCA നിശ്ചയിച്ച സമയപരിധിക്കുള്ളില്‍ അവ പൂര്‍ത്തിയാക്കുകയും ചെയ്തതായി അറിയിച്ചു. ഇത് റെഗുലേറ്ററെ അറിയിക്കുകയും ചെയ്തിട്ടുണ്ട്.