ദോഹ:2026ലെ ഫിബ അണ്ടര്‍ 18 ഏഷ്യ കപ്പിന് ഖത്തര്‍ ആതിഥേയത്വം വഹിക്കുമെന്ന് ഖത്തര്‍ ബാസ്‌കറ്റ്ബാള്‍ ഫെഡറേഷന്‍ (ക്യു.ബി.എഫ്) പ്രഖ്യാപിച്ചു. ഫിബ ഏഷ്യ ബോര്‍ഡ് ഓഫ് ഡയറക്ടേഴ്‌സ് യോഗത്തിലാണ് അന്തിമ തീരുമാനമുണ്ടായത്.

16 ഏഷ്യന്‍ ടീമുകള്‍ പങ്കെടുക്കുന്ന ടൂര്‍ണമെന്റ് രണ്ടു സ്റ്റേഡിയങ്ങളിലായാണ് നടക്കുക. ദിവസവും എട്ട് മത്സരങ്ങളാണുണ്ടാവുക. 2027ല്‍ ഖത്തറില്‍ നടക്കാനിരിക്കുന്ന ഫിബ ബാസ്‌കറ്റ്ബാള്‍ ലോകകപ്പ് മുന്നൊരുക്കങ്ങളുടെ ഭാഗമായാണ് അടുത്ത വര്‍ഷം അണ്ടര്‍ 18 ഏഷ്യ കപ്പിന് ഖത്തര്‍ ആതിഥേയത്വം വഹിക്കുന്നത്. ബാസ്‌കറ്റ് ബാളിന്റെ ലോകപോരാട്ടത്തിന് 2027 ആഗസ്റ്റ് 28 മുതല്‍ സെപ്റ്റംബര്‍ 12 വരെയാണ് ഖത്തര്‍ ആതിഥ്യമൊരുക്കുക. ലോകത്തിന്റെ വിവിധ ഭാഗങ്ങളില്‍ നിന്നുള്ള 32 ടീമുകള്‍ പങ്കെടുക്കുന്ന ടൂര്‍ണമെന്റ് അറബ് ലോകത്തിന് ആദ്യ അവസരമാണ്. മിഡില്‍ ഈസ്റ്റ്-നോര്‍ത്ത് ആഫ്രിക്ക മേഖലയില്‍ ആദ്യമായാണ് ഈ ലോകകപ്പ് നടക്കുന്നത്.

ഏഷ്യയിലെ യുവ ബാസ്‌കറ്റ്ബാള്‍ പ്രതിഭകളെ കണ്ടെത്താനുള്ള 2026ലെ എ.എഫ്.സി അണ്ടര്‍ 18 കപ്പ് ഖത്തറില്‍ ഒരുക്കുന്നത് വലിയൊരു അംഗീകാരമാണെന്ന് ക്യു.ബി.എഫ് പ്രസിഡന്റ് മുഹമ്മദ് ബിന്‍ സഅദ് അല്‍ മുഗൈസിബ് പറഞ്ഞു. മേഖലയില്‍ ആദ്യമായി നടക്കുന്ന 2027ലെ ഫിബ ബാസ്‌കറ്റ്ബാള്‍ ലോകകപ്പ് ആഹ്ലാദത്തോടെ ഏറ്റെടുക്കുന്നതായും അദ്ദേഹം പറഞ്ഞു.