റിയാദ്: വിദ്യാര്‍ത്ഥികളുടെ ബുദ്ധിശക്തിയും ഏകാഗ്രതയും പ്രോത്സാഹിപ്പിക്കുന്നതിന്റെ ഭാഗമായി അലിഫ് ഇന്റര്‍നാഷണല്‍ സ്‌കൂളില്‍ ഇന്റര്‍ഹൗസ് ചെസ് മത്സരം സംഘടിപ്പിച്ചു.

സ്‌കൂളിലെ നാല് ഹൗസുകളായ ആല്‍ഫ, ബീറ്റ, ഗാമ, ഡെല്‍റ്റ എന്നീ ടീമുകള്‍ക്കായി വിവിധ ക്ലാസുകളിലെ വിദ്യാര്‍ത്ഥികള്‍ പ്രാതിനിധ്യം വഹിച്ചു. കാറ്റഗറി 1, കാറ്റഗറി 2 , കാറ്റഗറി 3 എന്നിങ്ങനെ മൂന്ന് വിഭാഗങ്ങളിലായാണ് മത്സരങ്ങള്‍ നടന്നത്.

കായികവിഭാഗത്തിന്റെ നേതൃത്വത്തില്‍ നടന്ന മത്സരങ്ങള്‍ വിദ്യാര്‍ത്ഥികള്‍ക്കിടയില്‍ വലിയ ഉത്സാഹം നല്‍കുന്നതായി.

സ്‌കൂള്‍ പ്രിന്‍സിപ്പല്‍ മുഹമ്മദ് മുസ്തഫ ആദ്യ കരുക്കള്‍ നീക്കി ഉദ്ഘാടനം ചെയ്തു. മികച്ച ആസൂത്രണത്തിനും കുട്ടികളില്‍ ഉന്മേഷം വളര്‍ത്തുന്നതിലും ചെസ്സ് മത്സരങ്ങള്‍ ഏറെ സഹായകമാവുമെന്ന് അദ്ദേഹം പറഞ്ഞു.

ഗേള്‍സ് വിഭാഗത്തില്‍ ആയിഷ ഇസ (കാറ്റഗറി 1), സൈദ റിദ ഫാത്തിമ (കാറ്റഗറി 2), അലോന എല്‍സ (കാറ്റഗറി 3 ) എന്നിവരും ബോയ്‌സ് വിഭാഗത്തില്‍ മുഹമ്മദ് നഷ്വാന്‍ (കാറ്റഗറി 1), മുഹാസ് മൂസ (കാറ്റഗറി 2), സെല്‍വന്തിര രാജന്‍ (കാറ്റഗറി 3) എന്നിവരും വിജയികളായി.

സി ഇ ഒ ലുഖ്മാന്‍ അഹ്‌മദ് വിജയികള്‍ക്കുള്ള സര്‍ട്ടിഫിക്കറ്റുകളും ട്രോഫികളും വിതരണം ചെയ്തു. സോഫി മെഹ്‌മൂദ, മുഹമ്മദ് ശംഷാദ് എന്നിവര്‍ മത്സരങ്ങള്‍ നിയന്ത്രിച്ചു.