മ്യൂണിച്ച്: യുവേഫ നേഷന്‍സ് ലീഗ് കിരീടം പോര്‍ച്ചുഗലിന്. ഫൈനലില്‍ സ്‌പെയിനിനെ പെനല്‍റ്റി ഷൂട്ടൗട്ടില്‍ തോല്‍പ്പിച്ചാണ് ചാംപ്യന്മാരായത്. പെനല്‍റ്റി ഷൂട്ടൗട്ടില്‍ 5-3 നാണ് പോര്‍ച്ചുഗലിന്റെ വിജയം. നിശ്ചിത സമയത്തും അധിക സമയത്തും രണ്ട് ഗോള്‍ വീതം നേടി ഇരു ടീമുകളും സമനില പാലിച്ചു. പോര്‍ച്ചുഗലിന്റെ ന്യൂനോ മെന്‍ഡസാണ് ഫൈനലിലെ താരം.

നിശ്ചിത സമയവും എക്‌സ്ട്രാ സമയവും കടന്ന് പെനല്‍റ്റി വരെയെത്തിയ കലാശ പോരിനൊടുവിലാണ് പോര്‍ച്ചുഗലിന്റെ കിരീട നേട്ടം. നിലവിലെ ചാംപ്യന്മാരായ സ്‌പെയിനിന്റെ യുവനിരയെ വീഴ്ത്തി നേടിയ ജയം. ഷൂട്ടൗട്ടില്‍ പോര്‍ച്ചുഗലിനായി കിക്കെടുത്തവരെല്ലാം വല കുലുക്കി. എന്നാല്‍ സ്പാനിഷ് താരം അല്‍വാരോ മൊറാട്ടയുടെ കിക്ക് പോര്‍ച്ചുഗല്‍ ഗോള്‍ കീപ്പര്‍ ഡിയോഗ കോസ്റ്റ തടഞ്ഞത് നിര്‍ണായകമായി. പോര്‍ച്ചുഗലിന്റെ റൊണാള്‍ഡോയും സ്‌പെയിനിന്റെ ലമീന്‍ യമാലും സബ്സ്റ്റിറ്റിയൂട്ട് ചെയ്യപ്പെട്ടതിനാല്‍ ഷൂട്ടൗട്ടിനുണ്ടായിരുന്നില്ല.

21ാം മിനിട്ടില്‍ സ്‌പെയിനിന്റെ മാര്‍ട്ടിന്‍ സുബി മെന്‍ഡിയാണ് ആദ്യ ഗോള്‍ നേടിയത്. പിന്നാലെ 25ാം മിനിട്ടില്‍ ന്യൂനോ മെന്‍ഡസ് പോര്‍ച്ചുഗലിനായി ആദ്യ ഗോളടിച്ചു. മൈക്കല്‍ ഒയാര്‍ സബാല്‍ സ്‌പെയിനിനായി രണ്ടാം ഗോള്‍ നേടി. രണ്ടാം പകുതിയിലും മുന്നേറ്റം തുടര്‍ന്ന സ്‌പെയിനെ പിടിച്ചു കെട്ടിയത് റൊണാള്‍ഡോ 61ാം മിനിട്ടില്‍ നേടിയ ഗോളാണ്. ഇതോടെ 2-2 എന്ന നിലയിലായി.

മത്സരം അധിക സമയത്തേക്ക് നീണ്ടപ്പോഴും വിജയ ഗോള്‍ പിറന്നില്ല. പെനാല്‍റ്റി ഷൂട്ടൗട്ടിലൂടെ പോര്‍ച്ചുഗല്‍ ജോതാക്കളാവുകയായിരുന്നു. പോര്‍ച്ചുഗലിനായി റൊണാള്‍ഡോയുടെ മൂന്നാം കിരീടമാണിത്. 2016ലെ യൂറോ കപ്പും 2019ലെ നേഷന്‍സ് ലീഗും പോര്‍ച്ചുഗല്‍ ജയിച്ചിരുന്നു. അന്താരാഷ്ട്ര ഫുട്‌ബോളില്‍ റൊണാള്‍ഡോയുടെ 138 ാം ഗോള്‍ നേട്ടത്തിനും തിങ്ങിനിറഞ്ഞ സ്‌റ്റേഡിയം സാക്ഷിയായി.