കോഴിക്കോട്: വരാനിരിക്കുന്ന 2025-26 സീസണിന് മുന്നോടിയായി സീനിയര്‍ പുരുഷ ടീമിന്റെ പുതിയ മുഖ്യ പരിശീലകനായി ജോസ് ഹെവിയയെ നിയമിച്ച് ഗോകുലം കേരള എഫ്സി. സ്പെയിനുകാരനായ ജോസ് ഹെവിയ, ഇന്ത്യന്‍ ഫുട്ബോളില്‍ ധാരാളം അനുഭവസമ്പത്തുള്ള കോച്ചാണ്. മലബാറിയന്‍സിന്റെ ആക്രമണ ഫുട്‌ബോളിനോട് പൂര്‍ണ്ണമായും യോജിക്കുന്ന കളിമികവാണ് ജോസ് ഹെവിയയുടെയും മുഖ മുദ്ര.

യുവേഫ പ്രോ ലൈസന്‍സ് ഉടമയായ ഹെവിയ, മുന്‍ ഐ ലീഗ് സീസണില്‍ ഷില്ലോങ് ലജോങ് എഫ്സിയുയുടെ കോച്ച് ആയിരുന്നു. അദ്ദേഹത്തിനു കീഴില്‍ , ഷില്ലോങ് ലജോങ് 202425 ഐ-ലീഗ് സീസണിലെ ഏറ്റവും കൂടുതല്‍ ഗോള്‍ സ്‌കോറിംഗ് നടത്തിയ ടീമായിമാറി. മിനര്‍വ പഞ്ചാബ് എഫ്സി, പൂനെ സിറ്റി എഫ്സി, എഡി ഗിഗാന്റെ എന്നിങ്ങനെയാണ് മറ്റു മുന്‍ ക്ലബ്ബുകള്‍.

'ജോസ് ഹെവിയയുടെ ആക്രമണ ഫുട്‌ബോള്‍ ക്ലബ്ബിന്റെ ഫുട്‌ബോള്‍ ശൈലിയുമായി പൂര്‍ണ്ണമായും യോജിക്കുന്നു. അദ്ദേഹത്തിന്റെ നേതൃത്വത്തില്‍, ഞങ്ങള്‍ രസകരമായ ഫുട്‌ബോള്‍ സൃഷ്ടിക്കുക മാത്രമല്ല, ഐ-ലീഗ് ട്രോഫി ഉയര്‍ത്തുകയും ഐഎസ്എല്ലിലേക്ക് യോഗ്യത നേടുകയും ചെയ്യുക എന്നുകൂടെയാണ് ആത്യന്തിക ലക്ഷ്യം' എന്ന് ഗോകുലം കേരള എഫ്സി പ്രസിഡന്റ് വി.സി. പ്രവീണ്‍ പറഞ്ഞു.

'ഗോകുലം കേരള എഫ്സിയുടെ ഭാഗമാകാന്‍ എനിക്ക് ശരിക്കും ആവേശമുണ്ട്. ഇന്ത്യന്‍ ഫുട്‌ബോളില്‍ ഒരുപാട് നേട്ടങ്ങളുണ്ടാക്കിയ ഒരു ക്ലബ്ബണിത് ഒരുമിച്ച്, നമുക്ക് വലിയ കാര്യങ്ങള്‍ നേടാനും സാധിക്കും, ചാമ്പ്യന്‍ഷിപ്പ് ലക്ഷ്യമിടാനും കഴിയുമെന്ന് ഞാന്‍ വിശ്വസിക്കുന്നു'. എന്ന് ഹെഡ് കോച്ച് ജോസ് ഹെവിയ.

2020-21, 2021-22 സീസണുകളില്‍ തുടര്‍ച്ചയായി ഐ-ലീഗ് കിരീടങ്ങള്‍ നേടിയ ഗോകുലം കേരള എഫ്സിക്ക് ലീഗിന്റെ അവസാനം കഴിഞ്ഞ മൂന്ന് എഡിഷനിലും മൂന്നാം സ്ഥാനമാണ് നേടാനായത്, വീണ്ടും ഒന്നാം സ്ഥാനത്തേക്ക് തിരിച്ചെത്താനും ഇന്ത്യന്‍ സൂപ്പര്‍ ലീഗില്‍ (ഐഎസ്എല്‍) എത്താനുമാണ് പുതിയ സീസണില്‍ ടീം ലക്ഷ്യമിടുന്നത്.