റിയാദ്: എക്സ്പോ 2025 ഒസാക്ക കാന്‍സായിലെ സൗദി അറേബ്യന്‍ പവലിയന് ന്യൂയോര്‍ക്ക് ആര്‍ക്കിടെക്ചറല്‍ ഡിസൈന്‍ അവാര്‍ഡ്സില്‍ 'കള്‍ച്ചറല്‍ ആര്‍ക്കിടെക്ചര്‍ - ഇന്ററാക്ടീവ് ആന്‍ഡ് എക്സ്പീരിയന്‍ഷ്യല്‍ സ്പേസസ്' വിഭാഗത്തില്‍ സുവര്‍ണ പുരസ്‌കാരം ലഭിച്ചു.
സന്ദര്‍ശകര്‍ക്ക് സൗദി അറേബ്യയുടെ പൈതൃകത്തെക്കുറിച്ച് ആഴത്തിലുള്ള അനുഭവം നല്‍കുന്ന ഈ പവലിയന് സൗദി ആര്‍ക്കിടെക്ചര്‍ ആന്‍ഡ് ഡിസൈന്‍ കമ്മീഷന്റെ നേതൃത്വത്തില്‍ സി.ഇ.ഒ. ഡോ. സുമയ്യ അല്‍-സുലൈമാന്‍, പ്രോജക്ട് മാനേജര്‍ ഫാത്തിമ അല്‍-ദൂഖി എന്നിവര്‍ ചേര്‍ന്നാണ് ഒരുക്കിയത്. പ്രശസ്ത ഡിസൈന്‍ സ്ഥാപനമായ ഫോസ്റ്റര്‍+ പാര്‍ട്ണേഴ്സും ഇതിന്റെ രൂപകല്‍പ്പനയില്‍ പങ്കാളികളായിരുന്നു.
സൗദി അറേബ്യയും ജപ്പാനും തമ്മിലുള്ള സാംസ്‌കാരിക സമാനതകള്‍ ഉയര്‍ത്തിക്കാട്ടുന്നതോടൊപ്പം, സുസ്ഥിരതയ്ക്കും ഊന്നല്‍ നല്‍കിയാണ് പവലിയന് രൂപകല്‍പ്പന ചെയ്തിരിക്കുന്നത്. വായുസഞ്ചാരം സുഗമമാക്കുന്നതിന് സൂക്ഷ്മമായി സ്ഥാപിച്ചിട്ടുള്ള ബ്ലോക്കുകള്‍ ഉപയോഗിച്ച് ശീതീകരണം മെച്ചപ്പെടുത്തിയിട്ടുണ്ട്.
കുറഞ്ഞ കാര്‍ബണ്‍ പുറന്തള്ളുന്ന വസ്തുക്കള്‍, ഊര്‍ജ്ജക്ഷമതയുള്ള ലൈറ്റിംഗ്, സൗരോര്‍ജ്ജ സാങ്കേതികവിദ്യകള്‍ എന്നിവ പവലിയന്റെ പ്രത്യേകതകളാണ്. കൂടാതെ, ഭിന്നശേഷിക്കാരായ സന്ദര്‍ശകര്‍ക്കായി ബ്രെയില്‍ സൈനേജുകളും പാതകളും ഉള്‍പ്പെടുത്തിയിട്ടുണ്ട്, ഇത് കെട്ടിടം എല്ലാവര്‍ക്കും പ്രാപ്യമാക്കുന്നു.
ഏപ്രില്‍ 13-ന് ആരംഭിച്ചതു മുതല്‍ സൗദി അറേബ്യയുടെ പവലിയന് ഇതിനോടകം അഞ്ച് ലക്ഷത്തിലധികം സന്ദര്‍ശകരെ ആകര്‍ഷിച്ചു കഴിഞ്ഞു. സാംസ്‌കാരിക പരിപാടികള്‍, ബിസിനസ് ഇവന്റുകള്‍, മാധ്യമ സംബന്ധമായ പരിപാടികള്‍, 400-ല്‍ അധികം വി.ഐ.പി. പ്രതിനിധി സംഘങ്ങള്‍ എന്നിവയുള്‍പ്പെടെ 175-ല്‍ അധികം പരിപാടികള്‍ക്കും പവലിയന് ആതിഥേയത്വം വഹിച്ചിട്ടുണ്ട്.
.jpg)
Related News
