ബംഗളൂരു: കളിക്കുന്നതിനിടെയുണ്ടായ തര്‍ക്കത്തിനിടയില്‍ ഏഴാം ക്ലാസ് വിദ്യാര്‍ത്ഥി ഒമ്പതാം ക്ലാസുകാരനെ കുത്തിക്കൊന്നു. ഹുബ്ബള്ളി നഗരത്തിലെ ഗുരുസിദ്ധേശ്വര നഗറിലാണ് സംഭവം. ഒമ്പതാം ക്ലാസ് വിദ്യാര്‍ഥി ചേതന്‍ രക്കസാഗിയാണ് കൊല്ലപ്പെട്ടത്. ഏഴാം ക്ലാസുകാരനെ കസ്റ്റഡിയിലെടുത്ത് നിരീക്ഷണ കേന്ദ്രത്തിലേക്ക് അയച്ചതായി പോലീസ് അറിയിച്ചു.

കളിക്കിടെ കുട്ടികള്‍ തമ്മിലുണ്ടായ നിസാരമായ വാക്കു തര്‍ക്കം കത്തിക്കുത്തില്‍ കലാശിക്കുകയായിരുന്നു. സംഘര്‍ഷം ഉണ്ടാക്കിയ ഇരുവരും അയല്‍വാസികളാണ്. തിങ്കളാഴ്ച രാത്രി കളിക്കിടെയുണ്ടായ നിസ്സാരമായ തര്‍ക്കത്തിന് പിന്നാലെ പ്രതി വീട്ടില്‍ നിന്ന് കത്തി കൊണ്ടുവന്ന് ചേതന്റെ വയറ്റില്‍ കുത്തുകയായിരുന്നു. ചേതന്‍ കുഴഞ്ഞുവീണതിനെത്തുടര്‍ന്ന് അവരോടൊപ്പം കളിച്ചുകൊണ്ടിരുന്ന മറ്റ് കുട്ടികള്‍ ഓടി രക്ഷപ്പെട്ടു. ബഹളം കേട്ട് പ്രതിയുടെ അമ്മ ഓടിയെത്തി ചേതനെ ഹുബ്ബള്ളിയിലെ ആശുപത്രിയിലെത്തിച്ചെങ്കിലും രക്ഷിക്കാനായില്ല. ഇരുവരും അടുത്ത സുഹൃത്തുക്കളായിരുന്നുവെന്നും വേനല്‍ക്കാല അവധിക്കാലത്ത് മറ്റ് കുട്ടികളോടൊപ്പം പതിവായി കളിക്കാറുണ്ടായിരുന്നുവെന്നും ഇരുവരുടേയും രക്ഷിതാക്കള്‍ പോലീസിനോട് പറഞ്ഞു.