കൊച്ചി: ടാക്‌സികളും ഓട്ടോറിക്ഷകളും വാടകയ്ക്ക് ലഭ്യമാക്കുന്ന കേരള സര്‍ക്കാരിന്റെ പിന്തുണയുള്ള മൊബൈല്‍ ആപ്പായ 'കേരള സവാരി' നാളെ (മെയ് 1) മുതല്‍ പുതിയ രൂപത്തില്‍ ലഭ്യമാവും. ബംഗളൂരുവിലെ ജനപ്രിയ ആപ്പായ 'നമ്മ യാത്രി' യുടെ പിന്തുണയോടെയാണ് കേരള സവാരി പരിഷ്‌കരിച്ച് പുതിയ രൂപത്തിലെത്തുന്നത്. ഗതാഗത, തൊഴില്‍ വകുപ്പുകളുടെ പിന്തുണയോടെയാണ് ആപ്പ് പ്രവര്‍ത്തിക്കുക. സാധാരണക്കാര്‍ക്ക് 'താങ്ങാനാവുന്ന' നിരക്കാണ് ആപ്പ് വാഗ്ദാനം ചെയ്യുന്നത്. യൂബര്‍, ഓല തുടങ്ങിയവയെ അപേക്ഷിച്ച് കുറഞ്ഞ നിരക്കുകളായിരിക്കും ഇതിലൂടെ ഈടാക്കുക.

മെയ് 1 മുതല്‍ പുതിയ ആപ്പ് പ്രവര്‍ത്തനക്ഷമമാകുമെങ്കിലും ഔദ്യോഗിക ലോഞ്ചിംഗ് പിന്നീടായിരിക്കും. തുടക്കത്തില്‍ തിരുവനന്തപുരത്തും കൊച്ചിയിലുമാണ് സേവനം ലഭിക്കുക. സംസ്ഥാനത്തെ മറ്റു പ്രധാന നഗരങ്ങളിലും ഘട്ടം ഘട്ടമായി 'കേരള സവാരി' ആരംഭിക്കാനാണ് പദ്ധതി. ഉപയോക്താക്കള്‍ക്ക് ആപ്പ് ഉപയോഗിച്ച് കൊച്ചി മെട്രോ ടിക്കറ്റുകളും അന്തര്‍ സംസ്ഥാന ബസുകളും ബുക്ക് ചെയ്യാന്‍ കഴിയും.

ആപ്പ് ഉപയോഗിക്കുന്ന യാത്രക്കാരില്‍ നിന്ന് സര്‍ക്കാര്‍ നിശ്ചയിച്ച നിരക്കുകള്‍ മാത്രമാണ് ഈടാക്കുക. കൂടാതെ ഡ്രൈവര്‍മാരില്‍ നിന്ന് ഒരു കമ്മീഷനും കേരള സവാരി ഈടാക്കുന്നില്ല. 1,000 രൂപയ്ക്ക് ഓടിയാല്‍ മുഴുവന്‍ തുകയും ഡ്രൈവര്‍മാര്‍ക്ക് ലഭിക്കും. സ്വകാര്യ ഓണ്‍ലൈന്‍ പ്ലാറ്റ്‌ഫോമുകള്‍ ഡ്രൈവര്‍മാരില്‍ നിന്ന് കമ്മീഷനായി 30 ശതമാനം വരെയാണ് ഈടാക്കുന്നുണ്ടെന്നാണ് പറയുന്നത്.

ഇതിനകം തന്നെ വലിയ തോതില്‍ ടാക്‌സി, ഓട്ടോറിക്ഷ ഡ്രൈവര്‍മാര്‍ ആപ്പില്‍ രജിസ്റ്റര്‍ ചെയ്തിട്ടുണ്ട്. 6,000-ത്തിലധികം ടാക്‌സി ഡ്രൈവര്‍മാരുള്ള യെല്ലോ കാബ്സ്, ഓള്‍ കേരള ഓണ്‍ലൈന്‍ ഓട്ടോ ഡ്രൈവേഴ്സ് യൂണിയന്‍ (AKOADU) എന്നിവ ഈ സംരംഭത്തിന്റെ ഭാഗമാണ്.

'കേരള സവാരി' 2022 ല്‍ സംസ്ഥാന സര്‍ക്കാര്‍ ആദ്യം അവതരിപ്പിച്ചുവെങ്കിലും സോഫ്റ്റ്വെയര്‍ തകരാറുകള്‍ ഉള്‍പ്പെടെയുള്ള വിവിധ കാരണങ്ങളാല്‍ സേവനം തടസപ്പെടുന്ന അവസ്ഥയുണ്ടായ നിര്‍ത്തിവെക്കുകയായിരുന്നു. നേരത്തെയുള്ള പോരായ്മകളെല്ലാം പരിഹരിച്ച് പുതിയ രീതിയിലാണ് ആപ്പ് അവതരിപ്പിക്കുന്നത്.