കോഴിക്കോട്: ഇഎംഎസ് കോര്‍പ്പറേഷന്‍ സ്റ്റേഡിയത്തില്‍ നടന്ന അവസാന ഹോം മത്സരത്തില്‍ ഗോകുലം കേരള എഫ്സി നിത എഫ്എയെ 4-1ന് പരാജയപ്പെടുത്തി. നിലവിലെ ലീഗിലെ ടോപ് സ്‌കോററായ ഫസീലക്ക് 4 ഗോളുകള്‍ കൂടി ഇന്ന് നേടാനായി (47', 52', 63', 82') മത്സരത്തിലെ അഞ്ച് ഗോളുകളും രണ്ടാം പകുതിയിലാണ്. റഹാമ ജാഫറു (75') നിത എഫ്എയുടെ ആശ്വാസ ഗോള്‍ നേടി.

ഈസ്റ്റ് ബംഗാള്‍ ഇതിനകം ചാമ്പ്യന്മാരായിക്കഴിഞ്ഞ ലീഗില്‍ ഗോകുലത്തിന് രണ്ടാം സ്ഥാനം ഉറപ്പാണ്. റെലെഗേഷനില്‍ നിന്ന് രക്ഷനേടാനാണ് നിതാ എസ് സി പൊരുതിയത്. നിലവില്‍ 13 മത്സരങ്ങളില്‍ നിന്ന് 29 പോയിന്റാണ് ഗോകുലത്തിനുള്ളത്. ഇത്രയും തന്നെ കളികളില്‍ നിന്ന് 34 പോയിന്റാണ് ഈസ്റ്റ് ബംഗാളിനുള്ളത്.

ഇന്നത്തെ മത്സരത്തില്‍ ആദ്യപകുതിയില്‍ ഇരു ടീമുകള്‍ക്കും തുല്യ അവസരങ്ങള്‍ ലഭിച്ചുവെങ്കിലും ആദ്യ പകുതി ഗോള്‍ രഹിതമായിരുന്നു. ഇടവേളയ്ക്ക് ശേഷം, ഗോകുലം കേരള കൂടുതല്‍ ലക്ഷ്യബോധത്തോടെയും തീവ്രതയോടെയും പന്തുതട്ടിയപ്പോള്‍ രണ്ടാം പകുതിയുടെ ആദ്യ മിനിറ്റുകളില്‍ തന്നെ ടീം ലീഡ് നേടി.

47-ാം മിനിറ്റില്‍ ഫസീല ഇക്വാപുട്ട് 22 യാര്‍ഡ് അകലെ നിന്ന് ലഭിച്ച ഫ്രീ കിക്ക് വലയിലാക്കി. വെറും അഞ്ച് മിനിറ്റിനുശേഷം, ഇക്വാപുട്ട് വീണ്ടും ഗോള്‍ നേടി. നിത പ്രതിരോധത്തെ വിഭജിച്ച ഒരു സമര്‍ത്ഥമായ ത്രൂ ബോള്‍,സ്‌കോര്‍ 2-0 . 63-ാം മിനിറ്റില്‍ ഇക്വാപുട്ട് തന്റെ ഹാട്രിക് തികച്ചു. ഗോള്‍ ഏരിയയുടെ അരികില്‍ പന്ത് സ്വീകരിച്ച ഇക്വാപുട്ട് തന്റെ മാര്‍ക്കറേ എളുപ്പത്തില്‍ തട്ടിമാറ്റി, സമര്‍ത്ഥമായ ഒരു ഫിനിഷ് നല്‍കി ഗോകുലം കേരളയുടെ ലീഡ് വര്‍ദ്ധിപ്പിച്ചു.
75-ാം മിനിറ്റില്‍ റഹാമ ജാഫരു നിതാ എഫ് എ ക്ക് വേണ്ടി ആശ്വാസ ഗോള്‍ നേടി. പക്ഷേ ഇക്വാപുട്ട് 82-ാം മിനിറ്റില്‍ നേടിയ ഗോളിലൂടെ ഗോകുലത്തിന് അനിവാര്യമായ ജയം നേടിക്കൊടുത്തു.

ലീഗില്‍ ഇനി ശേഷിക്കുന്ന മത്സരത്തില്‍ ഗോകുലം ഈസ്റ്റ് ബംഗാള്‍ എഫ് സിയെ നേരിടും. ഏപ്രില്‍ 18 നു ഈസ്റ്റ് ബംഗാള്‍ ഗ്രൗണ്ടില്‍ വച്ച് നടക്കുന്ന മത്സരം വിജയിക്കാനാണ് ടീം ഇനി ശ്രമിക്കുക.