റിയാദ്: ഇലക്ട്രിക് കാര്‍ നിര്‍മാണമേഖലയിലെ ഭീമന്‍മാരായ ടെസ് ല സൗദിയില്‍ പ്രവര്‍ത്തനം ആരംഭിച്ചു. റിയാദിലെ ചരിത്രനഗരമായ ദറഇയയില്‍ പ്രദര്‍ശനം സംഘടിപ്പിച്ചുകൊണ്ടായിരുന്നു ഉദ്ഘാടനം. രാജ്യത്തെ റിയാദ്, ജിദ്ദ, ദമാം നഗരങ്ങളില്‍ ഷോറൂമുകളും ചാര്‍ജിങ് സ്റ്റേഷനുകളും കമ്പനി തുറക്കും. അമേരിക്കന്‍ ശതകോടീശ്വരന്‍ എലോണ്‍ മസ്‌കിന്റെ ഉടമസ്ഥതയിലുള്ള കമ്പനിയായ ടെസ്ലയുടെ സൗദിയിലെ പ്രവര്‍ത്തനോദ്ഘാടനത്തോട് അനുബന്ധിച്ച് സൈബര്‍ ട്രക്ക്, മോഡല്‍ വൈ കാറുകള്‍, റോബോട്ട്, സെല്‍ഫ് ഡ്രൈവിങ് സൈബര്‍ കാബ് എന്നിവ പ്രദര്‍ശിപ്പിച്ചു.
സൈബര്‍ ട്രക്ക് മരുഭൂമിയില്‍ ഓടുന്നതിന്റെയും റിയാദിലെ ഏറ്റവും പ്രധാനപ്പെട്ട ചില സ്ഥലങ്ങളില്‍ പര്യടനം നടത്തുന്നതിന്റെയും വിഡിയോ ഉദ്ഘാടന ചടങ്ങില്‍ പ്രദര്‍ശിപ്പിച്ചു. റിയാദ്, ജിദ്ദ, ദമാം എന്നിവിടങ്ങളില്‍ മൂന്ന് ഫാസ്റ്റ് ചാര്‍ജിങ് സ്റ്റേഷനുകള്‍ അടങ്ങുന്ന മൂന്ന് താല്‍കാലിക ഷോറൂമുകള്‍ ഉടന്‍ ആരംഭിക്കുമെന്ന് ടെസ്ലയുടെ സൗദി ഡയറക്ടര്‍ നസീം അക്ബര്‍ സാദെ അറിയിച്ചു. ഓരോ ഷോറൂമിലും എട്ട് ഫാസ്റ്റ് ചാര്‍ജറുകളുണ്ടാകും. കൂടാതെ സൗദിയില്‍ ടെസ്ല 21 ചാര്‍ജിങ് സ്റ്റേഷനുകള്‍ കൂടി നിര്‍മിക്കുമെന്നും വരുന്ന വേനല്‍ക്കാലത്ത് കാറുകള്‍ വിതരണം ചെയ്യാന്‍ തുടങ്ങുമെന്നും അക്ബര്‍സാദെ വെളിപ്പെടുത്തി. 'വിഷന്‍ 2030'മായി പൂര്‍ണമായും യോജിപ്പിച്ച് വ്യക്തവും മികച്ചതും കൂടുതല്‍ ബന്ധിതവുമായ ഭാവിയിലേക്കുള്ള ചുവടുവെപ്പാണിതെന്നും അദ്ദേഹം കൂട്ടിച്ചേര്‍ത്തു.
ലോഞ്ച് ചടങ്ങില്‍ ടെസ്ല സൗദി അധികൃതര്‍ ഓണ്‍ലൈന്‍ കാര്‍ ഓര്‍ഡറിങ് അനുവദിക്കുന്നതിനും ഷോപ്പിങ് മാളുകളില്‍ താല്‍ക്കാലിക സ്റ്റോറുകള്‍ തുറക്കുന്നതിനും സൂപ്പര്‍ചാര്‍ജര്‍ സ്റ്റേഷനുകളും സേവന കേന്ദ്രങ്ങളും സ്ഥാപിക്കുന്നതിനുള്ള പദ്ധതികളും വെളിപ്പെടുത്തി.
.jpg)
Related News
