വെര്‍ജീനിയ: അമേരിക്കയിലെ വെര്‍ജീനിയയില്‍ ഇന്ത്യക്കാരനായ പിതാവും മകളും വെടിയേറ്റു മരിച്ചു. ഗുജറാത്തുകാരായ പ്രദീപ് പട്ടേല്‍ (56), മകള്‍ ഉര്‍മി (24) എന്നിവരാണു മരിച്ചത്. ഡിപ്പാര്‍ട്ട്മെന്റല്‍ സ്റ്റോറില്‍ ജീവനക്കാരായിരുന്നു ഇരുവരും. കഴിഞ്ഞ ദിവസം രാവിലെ അക്കോമാക് കൗണ്ടിയിലെ സ്റ്റോര്‍ തുറന്നതിനു തൊട്ടു പിന്നാലെ മദ്യം വാങ്ങാന്‍ സ്റ്റോറിലെത്തിയ അക്രമി രാത്രിയില്‍ കട അടച്ചിട്ടത് എന്തുകൊണ്ടായിരുന്നുവെന്ന് ചോദിച്ച് നിറയൊഴിക്കുകയായിരുന്നു. സംഭവവുമായി ബന്ധപ്പെട്ട് ജോര്‍ജ് ഫ്രേസിയര്‍ ഡെവണ്‍ വാര്‍ട്ടണ്‍ (44) എന്നയാളെ പോലീസ് അറസ്റ്റ് ചെയ്തു. യു.എസിലെ ഇന്ത്യന്‍ സമൂഹത്തിന് കൊലപാതകം വന്‍ ആഘാതമാണ് ഉണ്ടാക്കിയത്.

ഗുജറാത്തിലെ മെഹ്‌സാന ജില്ലക്കാരായ ഇവര്‍ ആറു വര്‍ഷം മുന്‍പാണ് യു.എസിലെത്തിയത്. ബന്ധു പരേഷ് പട്ടേലിന്റെ ഉടമസ്ഥതയിലുള്ളതാണ് സ്റ്റോര്‍. എന്താണു വെടിവെപ്പിന് പ്രകോപനമെന്നു വ്യക്തമല്ല. പ്രദീപ് പട്ടേല്‍ സംഭവസ്ഥലത്തു തന്നെ മരിച്ചു. ഉര്‍മിയെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.
പ്രദീപ് പട്ടേലിന് 2 പെണ്‍മക്കള്‍ കൂടിയുണ്ട്. ഒരാള്‍ കാനഡയിലും മറ്റൊരാള്‍ അഹമ്മദാബാദിലുമാണു താമസം. ഭാര്യ: ഭാര്യ ഹന്‍സ ബെന്‍.

പടം: വെടിയേറ്റു മരിച്ച പ്രദീപ് പട്ടേലും ഉര്‍മിയും. പ്രതിയെന്നു സംശയിക്കുന്ന ജോര്‍ജ് ഫ്രേസിയര്‍.