ബംഗളൂരു: ഐ ലീഗില്‍ തുടര്‍ ജയവുമായി ഗോകുലം കേരള. ഇന്നലെ നടന്ന മത്സരത്തില്‍ 2-1 എന്ന സ്‌കോറിന് എസ്.സി ബംഗളൂരുവിനെയാണ് ഗോകുലം പരാജയപ്പെടുത്തിയത്. അവസാന മത്സരത്തില്‍ നാംധാരി എഫ്.സിക്കെതിരേ ജയിച്ചതിന്റെ ആത്മിവിശ്വാസത്തിലായിരുന്നു മലബാറിയന്‍സ് കളത്തിലിറങ്ങിയത്. മത്സരം തുടങ്ങിയ ആദ്യ പകുതിയില്‍ ഗോകുലം മികച്ച നീക്കങ്ങള്‍ നടത്തിയെങ്കിലും പന്ത് എതിര്‍ വലയിലെത്തിക്കാന്‍ കഴിഞ്ഞില്ല. പലപ്പോഴും ഗോളിലേക്കുള്ള അവസരങ്ങള്‍ ലഭിച്ചുവെങ്കിലും ഫൈനല്‍ തേഡില്‍ ഭാഗ്യം തുണച്ചില്ല. തുടര്‍ന്ന് ആദ്യ പകുതി ഗോള്‍ രഹിതമായി അവസാനിച്ചു.

രണ്ടാം പകുതിയിലായിരുന്നു മത്സരത്തിലെ മൂന്ന് ഗോളുകളും പിറന്നത്. 46ാം മിനുട്ടില്‍ താബിസോ ബ്രൗണിന്റെ ഗോളില്‍ ഗോകുലം മുന്നിലെത്തി. നാംധാരിക്കെതിരേയുള്ള മത്സരത്തില്‍ ഇരട്ട ഗോള്‍ നേടിയ താബിസോ മികച്ച നീക്കത്തിലൂടെയായിരുന്നു പന്ത് ബംഗളൂരുവിന്റെ വലയിലെത്തിച്ചത്. ഓരു ഗോള്‍ നേടിയതോടെ ആത്മവിശ്വാസം വീണ്ടെടുത്ത ഗോകുലം മത്സരത്തിന്റെ നിയന്ത്രണം ഏറ്റെടുത്തു. മത്സരം പുരോഗമിക്കവെ 75ാം മിനുട്ടില്‍ ഗോകുലം രണ്ടാം ഗോളും നേടി. അദമ നെയ്നെയായിരുന്നു രണ്ടാം ഗോള്‍ നേടിയത്. ഗോള്‍ മടക്കി മത്സരത്തിലേക്ക് തിരിച്ചുരാന് ബംഗളൂരുവും ശ്രമിച്ചുകൊണ്ടിരുന്നു. എന്നാല്‍ ഈ സമയത്ത് മലബാറിയന്‍സ് പ്രതിരോധം ശക്തമാക്കി. ഒടുവില്‍ ഗോകുലത്തിന്റെ പ്രതിരോധം പൊളിച്ച് ബംഗളൂരു ആശ്വാസ ഗോള്‍ നേടി.

90ാം മിനുട്ടില്‍ തോമോയ് ശിംറയ് ആയിരുന്നു ബംഗളൂരുവിനായി ഗോള്‍ നേടിയത്. സീസണില്‍ 20 മത്സരം പൂര്‍ത്തിയാക്കിയ ഗോകുലം 34 പോയിന്റുമായി പട്ടികയില്‍ നാലാം സ്ഥാനത്തുണ്ട്. ഇത്രയും മത്സരത്തില്‍നിന്ന് 20 പോയിന്റുള്ള ബംഗളൂരു 10ാം സ്ഥാനത്തും നില്‍ക്കുന്നു. 30 ന് ശ്രീനിധി ഡക്കാനെതിരേയാണ് ഗോകുലം കേരളയുടെ ഐ ലീഗിലെ അടുത്ത മത്സരം.(ഹോം മത്സരം)