ന്യൂദല്‍ഹി: വിയറ്റ്നാമീസ് വൈദ്യുത കാര്‍ നിര്‍മാതാക്കളായ വിന്‍ഫാസ്റ്റ് ഇന്ത്യന്‍ വാഹന വിപണിയിലേക്ക്. 2025 ഓട്ടോ എക്സ്പോയില്‍ വിന്‍ഫാസ്റ്റ് പ്രദര്‍ശിപ്പിച്ച മൈക്രോ എസ്യുവി വിഎഫ്3 ഏറെ ശ്രദ്ധപിടിത്തുപറ്റിയിരുന്നു. ബജറ്റ് കാറായ വിഎഫ്3 വിന്‍ഫാസ്റ്റ് അടുത്ത വര്‍ഷം ഇന്ത്യന്‍ വിപണിയിലെത്തിക്കുമെന്നാണ് കമ്പനി അറിയിച്ചിരിക്കുന്നത്. എന്നാല്‍ ഈ വര്‍ഷം ദീപാവലി നാളില്‍ വിഎഫ്7 ഇലക്ട്രിക് എസ്യുവി ഇന്ത്യയില്‍ പുറത്തിറക്കും. അതിനു പിന്നാലെ വിഎഫ്6ഉം എത്തും. അതിനു ശേഷം വിപണി വിലയിരുത്തിയാകും വിഎഫ്3 യുടെ വരവ്.

പ്രീമിയം മിഡ്സൈസ് ഇലക്ട്രിക് എസ്യുവിയാണ് വിഎഫ്7. അതേസമയം കോംപാക്ട് എസ്യുവി വിഭാഗത്തില്‍ പെടുത്താവുന്ന വാഹനമാണ് വിഎഫ് 6. ഈ രണ്ട് മോഡലുകളും വിപണി പിടിച്ചതിനു ശേഷം മാത്രമേ ബജറ്റ് വാഹനമായ വിഎഫ്3 പുറത്തിറക്കൂ. നിര്‍മാണം പരമാവധി പ്രാദേശികവല്‍ക്കരിച്ച് വില കുറക്കാനുള്ള ശ്രമമാവും കമ്പനി നടത്തുക. വടക്കേ അമേരിക്കന്‍ രാജ്യങ്ങളിലും പശ്ചിമേഷ്യയിലും കൂടുതല്‍ വലിയ മോഡലുകളായ വിഎഫ്8, വിഎഫ്9 എന്നിവ വിന്‍ഫാസ്റ്റ് വില്‍ക്കുന്നുണ്ട്.

എസ്യുവി വിഎഫ്3 വിന്‍ഫാസ്റ്റ് വിയറ്റാം വിപണിയില്‍ കഴിഞ്ഞ വര്‍ഷമാണ് പുറത്തിറക്കുന്നത്. വിയറ്റ്‌നാം വിപണിയില്‍ ഏകദേശം എട്ടു ലക്ഷം ഇന്ത്യന്‍ രൂപയായിരുന്നു വില. 3190 എംഎം നീളവും 1676 എംഎം വീതിയും 1622 എംഎം ഉയരവുമുള്ള ഈ ചെറുകാറിന്റെ 25,000 യൂണിറ്റുകള്‍ ആദ്യ വര്‍ഷം തന്നെ വിറ്റുപോയി. 40 ബിഎച്ച്പി കരുത്തും 110 എന്‍എം ടോര്‍ക്കും നല്‍കുന്ന മോട്ടറാണ് വാഹനത്തിന്. റേഞ്ച് 200 കിലോമീറ്റര്‍ വരെ ലഭിക്കുമെന്നാണ് കമ്പനി അവകാശപ്പെടുന്നത്. തമിഴ്‌നാട്ടില്‍ നിര്‍മാണശാല സ്ഥാപിച്ച് വാഹനങ്ങള്‍ അസംബിള്‍ ചെയ്ത് വില്‍ക്കാനാണ് വിന്‍ഫാസ്റ്റിന്റെ പദ്ധതി. കാര്‍ ബാറ്ററി നിര്‍മാണവും ഇന്ത്യയില്‍ തന്നെ നടത്താനുള്ള ശ്രമങ്ങളും കമ്പനി നടത്തുന്നുണ്ട്.