പനജി: ഗോവയില്‍ നടന്ന ഐ ലീഗ് മത്സരത്തില്‍ ഗോകുലം കേരളക്ക് തോല്‍വി. ഇന്നലെ നടന്ന മത്സരത്തില്‍ ചര്‍ച്ചില്‍ ബ്രദേഴ്സിനോടായിരുന്നു ഗോകുലം തോറ്റത്. 2-1 എന്ന സ്‌കോറിനായിരുന്നു ഗോകുലത്തിന്റെ തോല്‍വി. അവസാന മത്സരത്തിലെ തോല്‍വിയുടെ ക്ഷീണം ജയത്തോടെ തീര്‍ക്കാന്‍ മോഹിച്ചായിരുന്നു ഗോകുലം എത്തിയതെങ്കിലും മത്സരത്തില്‍ ജയം നേടാന്‍ കഴിഞ്ഞില്ല.

ആദ്യ പകുതിയില്‍ ഗോള്‍ നേടാനായി ഗോകുലത്തിന് അവസരങ്ങള്‍ ലഭിച്ചെങ്കിലും ഫിനിഷങ്ങിലെ പോരായ്മ തിരിച്ചടിയായി. 21ാം മിനുട്ടില്‍ ലാല്‍റെമുവാത്ത റാല്‍ട്ടെയുടെ ഗോളില്‍ ചര്‍ച്ചില്‍ ബ്രദേഴ്സായിരുന്നു മുന്നിലെത്തിയത്. ഒരു ഗോള്‍ വഴങ്ങിയതോടെ ഗോകുലം സമനിലക്കായി പൊരുതി നോക്കിയെങ്കിലും പന്ത് ലക്ഷ്യത്തിലെത്തിക്കാന്‍ കഴിഞ്ഞില്ല. ആദ്യ പകുതിയില്‍ ഒരു ഗോള്‍ വഴങ്ങിയ ഗോകുലം രണ്ടാം പകുതിയില്‍ മികച്ച നീക്കങ്ങള്‍ നടത്തി. എന്നാല്‍ ഗോള്‍ മാത്രം വന്നില്ല. സമനിലക്കായി പൊരുതുന്നതിനിടെ 62-ാം മിനുട്ടില്‍ ചര്‍ച്ചില്‍ ബ്രദേഴ്സിന്റെ രണ്ടാം ഗോളും വന്നു. എന്നിട്ടും കീഴ്ടങ്ങാന്‍ തയ്യാറാകാതിരുന്ന ഗോകുലം ഗോളിനായി പൊരുതിക്കൊണ്ടിരുന്നു. എന്നാല്‍ 94ാം മിനുട്ടിലായിരുന്നു ഗോകുലം ഒരു ഗോള്‍ നേടിയത്. ഇതോടെ സ്‌കോര്‍ 2-1 എന്നായി.

പിന്നീട് ഗോള്‍ മടക്കി മത്സരത്തിലേക്ക് തിരിച്ചുവരാന്‍ ഗോകുലത്തിന് സമയം ലഭിച്ചില്ല. ഇതോടെ തോല്‍വി സമ്മതിക്കുകയായിരുന്നു. 13 മത്സരത്തില്‍നിന്ന് 26 പോയിന്റുള്ള ചര്‍ച്ചില്‍ ഒന്നാം സ്ഥാനത്ത് തുടരുമ്പോള്‍ ഇത്രയും മത്സരത്തില്‍നിന്ന് 19 പോയിന്റുള്ള ഗോകുലം പട്ടികയില്‍ ആറാം സ്ഥാനത്തുമുണ്ട്. 12ന് കോഴിക്കോട് കോര്‍പറേഷന്‍ സ്റ്റേഡിയത്തില്‍ റിയല്‍ കശ്മീരിനെതിരേയാണ് ഗോകുലത്തിന്റെ അടുത്ത മത്സരം.

'' മത്സരത്തിലെ ചില പിഴവുകളായിരുന്നു ടീമിന് തിരിച്ചടിയായത്. നേരത്തെ തീരുമാനിച്ച പദ്ധതികള്‍ നടപ്പാക്കന്‍ കഴിഞ്ഞുവെങ്കിലും എതിര്‍ ടീമിന്റെ നീക്കങ്ങള്‍ കൃത്യമായി നിരീക്ഷിക്കാന്‍ കഴിയാത്തതാണ് തിരിച്ചടിയായത്'' പരിശീലകന്‍ അന്റോണിയോ റുവേഡ വ്യക്തമാക്കി.