കൊല്‍ക്കത്ത: ഐ ലീഗില്‍ ജയം തുടരാന്‍ ഗോകുലം കേരള നാളെ ഇന്റര്‍ കാശിക്കെതിരേ കളത്തിലിറങ്ങുന്നു. കൊല്‍ക്കത്തയിലെ കല്യാണി സ്റ്റേഡിയത്തില്‍ രാത്രി ഏഴിനാണ് മത്സരം. തുടര്‍ച്ചയായ രണ്ട് ജയത്തിന് ശേഷം മൂന്നാം ജയം ലക്ഷ്യമിട്ടാണ് മലബാറിയന്‍സ് എത്തുന്നത്. അവസാനമായി സ്വന്തം തട്ടകത്തില്‍ നടന്ന മത്സരത്തില്‍ എതിരില്ലാത്ത രണ്ട് ഗോളിന് ബംഗളൂരുവിനെ തോല്‍പ്പിച്ച ഗോകുലം തൊട്ടുമുന്‍പുള്ള മത്സരത്തില്‍ ഇന്റര്‍കാശിയെ തരിപ്പണമാക്കിയിരുന്നു.
ഹോം മത്സരത്തില്‍ 6-2 എന്ന സ്‌കോറിനായിരുന്നു ഗോകുലത്തിന്റെ ജയം. ഇന്ന് നടക്കുന്ന എവേ മത്സരത്തില്‍ ഇന്റര്‍ കാശിയെ തോല്‍പ്പിക്കാനുറച്ചാണ് ഗോകുലം ബൂട്ടണിയുന്നത്. നിലവില്‍ മികച്ച ഫോമില്‍ കളിക്കുന്ന ഗോകുലത്തിന്റെ ഗോള്‍ വരള്‍ച്ചക്ക് പരിഹാരം ആയിട്ടുണ്ട്. മുന്നേറ്റത്തില്‍ വിദേശതാരം സിനിസ സ്റ്റാനിസാവിന്റെ സാന്നിധ്യം ടീമിന്റെ നീക്കങ്ങള്‍ക്ക് കരുത്ത് പകര്‍ന്നിട്ടുണ്ട്. ഇന്റര്‍ കാശിക്കെതിരേയുള്ള മത്സരത്തില്‍ ഹാട്രിക് നേടിയായിരുന്നു താരം ടീമിനെ വിജയത്തിലെത്തിച്ചത്. ഇന്റര്‍ കാശിക്കെതിരേയുള്ള മത്സരത്തില്‍ രണ്ട് ഗോള്‍ നേടിയ നാച്ചോ അബെലഡോയുടെ ഇരട്ട ഗോളായിരുന്നു ബംഗളൂരുവിനെതിരേയുള്ള മത്സരത്തില്‍ മലബാറിയന്‍സിന് കരുത്തായത്. അതിനാല്‍ ഇന്നത്തെ മത്സരത്തില്‍ ഇരു താരങ്ങളും ഫോം നിലനിര്‍ത്തുകയാണെങ്കില്‍ ഇന്ന് എവേ മത്സരത്തിലും ഇന്റര്‍ കാശിയെ വീഴ്ത്താന്‍ ഗോകുലത്തിന് കഴിയും.
'' അവസാന രണ്ട് മത്സരത്തിലെ ജയം ചെറുതല്ലാത്ത ആത്മവിശ്വാസം ടീമിന് നല്‍കുന്നുണ്ട്. അതിനാല്‍ എവേ മത്സരത്തില്‍ ഇന്റര്‍ കാശിയെ വീഴ്ത്തി മൂന്ന് പോയിന്റ് നേടുക എന്നതാണ് പ്രധാന ലക്ഷ്യം. മുഖ്യ പരിശീലകന്‍ അന്റോണിയോ റുവേഡ വ്യക്തമാക്കി. നിലവില്‍ ടീമില്‍ പരുക്കും മറ്റുമില്ലാത്തതിനാല്‍ മികച്ച ഇലവനെ കളത്തിലിറക്കാന്‍ കഴിയും'' അദ്ദേഹം കൂട്ടിച്ചേര്‍ത്തു. 11 മത്സരം പൂര്‍ത്തിയായപ്പോള്‍ അഞ്ച് വിജയം നാല് സമനില, രണ്ട് തോല്‍വി എന്നിവ നേരിട്ട ഗോകുലം 19 പോയിന്റുമായി പട്ടികയില്‍ മൂന്നാം സ്ഥാനത്തുണ്ട്. ഇന്ന് ജയിക്കുകയാണെങ്കില്‍ സ്ഥാനം മെച്ചപ്പെടുത്തി രണ്ടാം സ്ഥാനത്തെത്താന്‍ ടീമിന് കഴിയും.
.jpg)
Related News
