കോഴിക്കോട്: ഐ ലീഗില്‍ ജയം തുടര്‍ന്ന് ഗോകുലം കേരള. കോഴിക്കോട് കോര്‍പറേഷന്‍ സ്റ്റേഡിയത്തില്‍ നടന്ന മത്സരത്തില്‍ എതിരില്ലാത്ത രണ്ട് ഗോളിന് എസ്.സി ബംഗളൂരുവിനെയായിരുന്നു ഗോകുലം തോല്‍പ്പിച്ചത്. മത്സരത്തില്‍ സമ്പൂര്‍ണ ആധിപത്യം പുലര്‍ത്തിയ മലബാറിയന്‍സ് പ്രതിരോധത്തിലും മികവ് പുലര്‍ത്തിയതോടെ ക്ലീന്‍ ഷീറ്റുമായിട്ടായിരുന്നു മത്സരം പൂര്‍ത്തിയാക്കിയത്.

ഗോകുലത്തിന്റെ മുന്നേറ്റത്തോടെയായിരുന്നു മത്സരത്തിന് തുടക്കമായത്. മൂന്നാം മിനുട്ടില്‍ ഗോളിലേക്ക് ഗോകുലത്തിന് അവസരം ലഭിച്ചെങ്കിലും പന്ത് വലയിലെത്തിക്കാന്‍ സാധിച്ചില്ല. അധികം വൈകാതെ രണ്ടാം അവസരം ലഭിച്ച മലബാറിയന്‍സ് അത് കൃത്യമായി ഉപയോഗിച്ചതോടെ എട്ടാം മിനുട്ടില്‍തന്നെ ഒരു ഗോളിന്റെ ലീഡ് നേടി. എട്ടാം മിനുട്ടില്‍ ബംഗളൂരുവിന്റെ ബോക്സിനുള്ളില്‍ നിന്ന് ലഭിച്ച പന്ത് നാച്ചോ അബലെഡോ കൃത്യമായി വലയിലെത്തിച്ചതോടെ ആദ്യ പത്തു മിനുട്ടിനുള്ളില്‍ തന്നെ ഗോകുലം ഒരു ഗോളിന്റെ ലീഡ് നേടി.

മത്സരത്തില്‍ ലീഡ് നേടി പിന്നീട് അറ്റാക്ക് ശക്തമാക്കി. തുടരെ ബംഗളൂരുവിന്റെ ഗോള്‍മുഖത്തേക്ക് ഇരച്ചെത്തിക്കൊണ്ടിരുന്നെങ്കിലും എതിര്‍ പ്രതിരോധം ഉറച്ച് നിന്നു. ഇത് മലബാറിയന്‍സിന് പ്രതിസന്ധി സൃഷ്ടിച്ചു. എന്നിരുന്നാലും മുന്നേറ്റം ശക്തമാക്കിയ ഗോകുലത്തിന് കൂടുതല്‍ അവസരങ്ങള്‍ ലഭിച്ചുകൊണ്ടിരുന്നു. ആദ്യ പകുതിയില്‍ ഒരു ഗോളിന്റെ ലീഡുമായി മത്സരം അവസാനിപ്പിച്ച ഗോകുലം രണ്ടാം പകുതിയിലും മേധാവിത്വം തുടര്‍ന്നു. ലീഡ് ഇരട്ടിയാക്കാനായി ഗോകുലം ശക്തമായി പൊരുതി നോക്കിയെങ്കിലും പലപ്പോഴും ഭാഗ്യം തുണച്ചില്ല. ഒടുവില്‍ ഗോകുലം കാത്തിരുന്ന രണ്ടാം ഗോള്‍ എത്തി. മൈതാന മധ്യത്തുനിന്ന് ലഭിച്ച പന്തുമായി മുന്നേറിയ അബെലെഡോ ബംഗളൂരു പ്രതിരോധ താരത്തെയും ഗോള്‍കീപ്പറേയും കീഴ്ചക്കാരനാക്കി പന്ത് വലയിലെത്തിക്കുകയായിരുന്നു. 89ാം മിനുട്ടിലായിരുന്നു രണ്ടാം ഗോള്‍.

രണ്ട് ഗോള്‍ ലീഡ് നേടിയതോടെ ജയം ഉറപ്പിച്ച ഗോകുലം പിന്നീട് ആത്മവിശ്വാസത്തോടെയായിരുന്നു പന്ത് തട്ടിയത്. 96-ാം മിനുട്ടില്‍ ഗോകുലം താരം സലാം രഞ്ജന്‍ സിങ് ചുവപ്പ് കാര്‍ഡ് കണ്ട് പുറത്തായി. പിന്നീട് പത്തു പേരുമായിട്ടായിരുന്നു മലബാറിയന്‍സ് മത്സരം പൂര്‍ത്തിയാക്കിയത്. 11 മത്സരത്തില്‍നിന്ന് 19 പോയിന്റ് നേടിയ ഗോകുലം പോയിന്റ് പട്ടികയില്‍ മൂന്നാം സ്ഥാനത്തെത്തി. ഫെബ്രുവരി ഒന്നിന് കൊല്‍ക്കത്തയില്‍ ഇന്റര്‍ കാശിക്കെതിരേയാണ് ഗോകുലത്തിന്റെ അടുത്ത മത്സരം.