കോഴിക്കോട്: ഐ ലീഗില്‍ സ്വന്തം തട്ടകത്തില്‍ നടന്ന മത്സരത്തില്‍ ഗോളിലാറാടി ഗോകുലം കേരള. അവസാന മത്സരത്തില്‍ സ്വന്തം കാണികള്‍ക്ക് മുന്നില്‍ തോറ്റ ക്ഷീണം തീര്‍ക്കാന്‍ ഇറങ്ങിയ ഗോകുലം 6 - 2 നാണ് ജയിച്ചു കയറിയത്. വിദേശ താരം സ്റ്റാനി സാവിച്ചിന്റെ ഹാട്രിക്കായിരുന്നു മലബാറിയന്‍സിന് കരുത്തായത്.

പതിയെയായിരുന്നു ഇരു ടീമുകളും മത്സരം തുടങ്ങിയത്. മൂന്നാം മിനുട്ടില്‍ തന്നെ ഗോകുലത്തിനെ ഞെട്ടിച്ച് ഇന്റര്‍ കാശി മത്സരത്തിലെ ആദ്യ ഗോള്‍ നേടി. ബ്രൈസ് മിറാന്‍ഡയായിരുന്നു ഇന്റര്‍ കാശിക്കായി ആദ്യ ഗോള്‍ നേടിയത്. ഒരു ഗോള്‍ വഴങ്ങിയതോടെ പൊരുതിക്കളിച്ച ഗോകുലം ഗോള്‍ മടക്കി മത്സരത്തിലേക്ക് തിരിച്ചു വന്നു. പത്താം മിനുട്ടില്‍ സ്റ്റാനി സാവിച്ചായിരുന്നു മലബാറിയന്‍സിനായി സമനില ഗോള്‍ നേടിയത്. പോരാട്ടം സമനിലയിലായതോടെ ഇരു ടീമുകളുടെയും മുന്നേറ്റത്തിന് ശക്തി കൂടി. മത്സരം പുരോഗമിക്കവെ ഇന്റര്‍ കാശി രണ്ടാം ഗോളും ഗോകുലത്തിന്റെ വലയിലെത്തിച്ചു. ബബോവിച്ചായിരുന്നു ഇന്റര്‍ കാശിയുടെ രണ്ടാം ഗോളിനവകാശി. 27-ാം മിനുട്ടിലായിരുന്നു ഗോള്‍ പിറന്നത്. എന്നാല്‍ ഇന്റര്‍ കാശിയുടെ ലീഡ് അധികം നീണ്ടുനിന്നില്ല.

30ാം മിനുട്ടില്‍ കിടിലന്‍ ഒരു ഗോളിലൂടെ സ്റ്റാനി സാവിച്ച് ഗോകുലത്തിന് സമനില സമ്മാനിച്ചു. സ്‌കോര്‍ 2 - 2. പോരാട്ടം സമനിലയിലായതോടെ ഇരു ടീമുകളും പന്ത് ഹോള്‍ഡ് ചെയ്ത് കളിക്കാന്‍ തുടങ്ങി. ഗോകുലത്തിന് ഗോള്‍ നേടാന്‍ വീണ്ടും അവസരം ലഭിച്ചെങ്കിലും ഭാഗ്യം തുണച്ചില്ല. ലീഡ് നേടാന്‍ പൊരുതിയ മലബാറിയന്‍സ് ഒടുവില്‍ ലക്ഷ്യം കണ്ടു. ആദ്യ പകുതിയുടെ അധിക സമയത്ത് അബ ലഡയിലൂടെ മലബാറിയന്‍സ് മൂന്നാം ഗോള്‍ ഇന്റര്‍ കാശിയുടെ വലിയ ലെത്തിച്ചു. സ്‌കോര്‍ 3-2. ഒരു ഗോളിന്റെ ലീഡുമായി മത്സരം തുടങ്ങിയ ഗോകുലം രണ്ടാം പകുതിയില്‍ സമ്പൂര്‍ണ ആധിപത്യമായിരുന്നു നടത്തിയത്. 50-ാം മിനുട്ടില്‍ സെര്‍ജിയോ ലാ മാസിന്റെ ഗോള്‍ കൂടി വന്നതോടെ ഗോകുലം 4 - 2 ന് മുന്നിലെത്തി.

പിന്നീട് മത്സരത്തിന്റെ നിയന്ത്രണം ഏറ്റെടുത്ത മലബാറിയന്‍സ് കൃത്യമായ ഇടവേളകളില്‍ ലീഡ് ഇരട്ടിയാക്കിക്കൊണ്ടിരുന്നു. മത്സരം പുരോഗമിക്കവെ സിനിസാസ് സ്റ്റാനി സാവിച്ച് ഹാടിക് പൂര്‍ത്തിയാക്കി സ്‌കോര്‍ 5-2 എന്നാക്കി മാറ്റി. പിന്നീട് സമ്മര്‍ദങ്ങളില്ലാതെ കളിച്ച ഗോകുലം ഇഞ്ചുറി ടൈമിലായിരുന്നു ആറാം ഗോള്‍ നേടിയത്. 95 മിനുട്ടിലായിരുന്നു അബ ലഡയുടെ ഗോള്‍. പിന്നീട് വിജയശ്രീലാളിതരായാണ് ഗോകുലം മൈതാനം വിട്ടത്. പത്ത് മത്സരത്തില്‍ നിന്ന് 17 പോയിന്റുള്ള ഗോകുലം പട്ടികയില്‍ നാലാമതാണിപ്പോള്‍.