വാഷിങ്ടന്‍: കുടിയേറ്റക്കാര്‍ക്ക് ഭീഷണിയുടെ സ്വരമയുര്‍ത്തി നിയുക്ത അമേരിക്കന്‍ പ്രസിഡന്റ് ഡോണള്‍ഡ് ട്രംപ്. രേഖകളില്ലാത്ത കുടിയേറ്റക്കാരെ ലക്ഷ്യമാക്കി പരിശോധനകള്‍ ആരംഭിക്കുമെന്നും മെക്‌സിക്കോ അതിര്‍ത്തിയില്‍ കുടിയേറ്റക്കാരുടെ കടന്നുകയറ്റം ഇല്ലാതാക്കുമെന്നും ട്രംപ് പ്രഖ്യാപിച്ചു. സത്യപ്രതിജ്ഞയ്ക്കു മുന്‍പായി നടന്ന വിജയറാലിയിലാണു ട്രംപിന്റെ പ്രഖ്യാപനം. രണ്ടാം തവണയാണു ട്രംപ് പ്രസിഡന്റാകുന്നത്. യു.എസ് സമയം ഉച്ചക്ക് 12ന് (ഇന്ത്യന്‍ സമയം രാത്രി 10.30) രാജ്യത്തിന്റെ 47ാംമത് പ്രസിഡന്റായി ട്രംപ് അധികാരമേല്‍ക്കും. പ്രതികൂല കാലാവസ്ഥ കണക്കിലെടുത്ത വാഷിംങ്ടണിലെ യു.എസ് കാപ്പിറ്റോളിന്റെ പടിഞ്ഞാറ് മുന്‍വശത്തുള്ള റോട്ടന്‍ഡ ഹാളിലാണ് സത്യപ്രതിജ്ഞ ചടങ്ങുകള്‍.

രാജ്യം നേരിടുന്ന ഓരോ പ്രതിസന്ധിയും, ചരിത്രപരമായ വേഗതയിലും ശക്തിയിലും പ്രവര്‍ത്തിച്ചു പരിഹരിക്കുമെന്നും. അതിര്‍ത്തികളിലെ കടന്നുകയറ്റം അവസാനിപ്പിക്കുമെന്നും വാഷിങ്ടന്‍ അരീനയിലെ ജനക്കൂട്ടത്തോടായി ട്രംപ് പറഞ്ഞു. സ്ഥാനമൊഴിയുന്ന ജോ ബൈഡന്റേത് പരാജയപ്പെട്ട സര്‍ക്കാര്‍ ആയിരുന്നെന്നും ആരോപിച്ചു.

സര്‍ക്കാരിന്റെ കാര്യക്ഷമത വര്‍ധിപ്പിക്കല്‍ വകുപ്പിന്റെ ചുമതലയുള്ള വ്യവസായിയുമായ ഇലോണ്‍ മസ്‌കും ട്രംപിനൊപ്പം വേദി പങ്കിട്ടു. നടന്‍ ജോണ്‍ വോയ്റ്റ്, സംഗീതജ്ഞന്‍ കിഡ് റോക്ക് തുടങ്ങിയ സെലിബ്രിറ്റികളും വേദിയിലുണ്ടായിരുന്നു. കടുത്ത തണുപ്പിലും ട്രംപിനു പിന്തുണയുമായി ആയിരങ്ങളാണ് എത്തിയത്.
ജോ ബൈഡന്റെ വിവിധ നയങ്ങളെ റദ്ദാക്കുന്ന ഒട്ടേറെ ഉത്തരവുകള്‍ ആദ്യ ദിവസം തന്നെ ട്രംപ് ഇറക്കിയേക്കും. എണ്ണഖനനം ഉള്‍പ്പെടെയുള്ള വിഷയങ്ങള്‍ ഇതിലുള്‍പ്പെടും. കഴിഞ്ഞദിവസം പ്രവര്‍ത്തനം നിര്‍ത്തിവയ്‌ക്കേണ്ടി വന്ന വിഡിയോ പ്ലാറ്റ്‌ഫോമായ ടിക് ടോക്കിനെ രക്ഷിക്കണമെന്നാണഅ റാലിയില്‍ ട്രംപ് പറഞ്ഞത്.