കോഴിക്കോട്: ഇന്ത്യന്‍ വനിതാ ഫുട്ബോള്‍ ലീഗിലെ ആദ്യ മത്സരത്തില്‍ ഗോകുലം കേരളക്ക് സമനില. ഇന്നലെ കോഴിക്കോട് കോര്‍പറേഷന്‍ സ്റ്റേഡിയത്തില്‍ നടന്ന ഒഡിഷ എഫ്.സിക്കെരിയേുള്ള മത്സരമാണ് 1-1 എന്ന സ്‌കോറിന് അവസാനിച്ചത്. മത്സരത്തില്‍ ഗോകുലം സമ്പൂര്‍ണ്ണ ആധിപത്യം പുലര്‍ത്തിയെങ്കിലും ഫിനിഷിങ്ങിലെ പോരായ്മയായിരുന്നു കൂടുതല്‍ ഗോളുകള്‍ നേടുന്നതിന് തടസമായത്. ആദ്യ പകുതിയില്‍ ഗോള്‍ നേടാന്‍ ഗോകുലത്തിന് കൂടുതല്‍ അവസരങ്ങള്‍ ലഭിച്ചെങ്കിലും ഭാഗ്യം തുണച്ചില്ല. ആദ്യ പതിനഞ്ച് മിനുട്ട് പൂര്‍ത്തിയായപ്പോള്‍ ഗോകുലം അര ഡസനോളം മുന്നേറ്റമാണ് ഒഡിഷ പോസ്റ്റ് ലക്ഷ്യമാക്കി തൊടുത്തത്. ഒരുപാട് അവസരങ്ങള്‍ ലഭിച്ചുവെങ്കിലും ആദ്യ പകുതിയില്‍ ഗോളൊന്നും പിറന്നില്ല. ഇതോടെ ആദ്യ പകുതി ഗോള്‍ രഹിതമായി അവസാനിച്ചു.

രണ്ടാം പകുതിയിലായിരുന്നു മത്സരത്തിലെ രണ്ട് ഗോളുകളും പിറന്നത്. 61ാം മിനുട്ടില്‍ ലിന്‍ഡയുടെ ഗോളില്‍ നിലവിലെ ചാംപ്യന്‍മാരായ ഒഡിഷ മുന്നിലെത്തി. ഒരു ഗോള്‍ നേടിയതോടെ ഒഡിഷ അക്രമം കടുപ്പിച്ചെങ്കിലും ഗോകുലം പ്രതിരോധം ശക്തമാക്കി. ഗോകുലത്തിന്റെ തുടരെയുള്ള മുന്നേറ്റങ്ങളെ ശക്തമായി പ്രതിരോധിക്കുക എന്ന പദ്ധതിയായിരുന്നു ഒഡിഷ നടപ്പാക്കിയത്. വീണു കിട്ടിയ അവസരത്തില്‍ കൗണ്ടര്‍ അറ്റാക്ക് നടത്താനും അവര്‍ മറന്നില്ല. വിദശ താരം മറിയമായിരുന്നു ഗോകുലത്തിന്റെ മുന്നേറ്റങ്ങളെല്ലാം പരാജയപ്പെടുത്തിയത്. ഇത്തരത്തില്‍ ലഭിച്ച കൗണ്ടര്‍ അറ്റാക്കില്‍നിന്നായിരുന്നു ഒഡിഷയുടെ ആദ്യ ഗോള്‍ വന്നത്. ഒരു ഗോള്‍ വഴങ്ങിയെങ്കിലും ഗോകുലം അക്രമം നിര്‍ത്തിയില്ല.

പ്രതിരോധത്തില്‍നിന്ന് മാര്‍ട്ടിനയും ഒവിറ്റിയും നല്‍കുന്ന ത്രൂ പാസുകള്‍ കൃത്യമായി മുന്നേറ്റനിരക്ക് ലഭിച്ചു കൊണ്ടിരുന്നു. മധ്യനിരയില്‍ രത്തന്‍ ബാലയും ഷില്‍ക്കി ദേവിയും ഒഡിഷയുടെ മുന്നേറ്റത്തെ തടയിട്ടതോടെ പൂര്‍ണമായും കളി ഗോകുലത്തിന്റെ പക്കലായി. ജയത്തിനായി പൊരുതിയ ഗോകുലം ഒടുവില്‍ സമനില ഗോള്‍ നേടി. 87ാം മിനുട്ടില്‍ ഷില്‍ക്കി ദേവിയായിരുന്നു മലബാറിയന്‍സിന്റെ സമനില ഗോള്‍ നേടിയത്. പിന്നീട് ലീഡ് നേടാനായി അവസരങ്ങല്‍ ലഭിച്ചെങ്കിലും അത് മുതലാക്കാന്‍ കഴിഞ്ഞില്ല.
'' നേരത്തെ തീരുമാനിച്ച പദ്ധതിക്കനുസരിച്ച് കളിക്കാന്‍ കഴിഞ്ഞു. പലപ്പോഴും അവസരങ്ങള്‍ കൃത്യമായി മുതലാക്കാന്‍ കഴിയാത്തതിയാരുന്നു ജയത്തെ തടഞ്ഞത്. അടുത്ത മത്സരത്തില്‍ ഇതിന് പരിഹാരം കണ്ട് തിരിച്ചുവരും'' മത്സരശേഷം പരിശീലകന്‍ രഞ്ജന്‍ ചൗധരി വ്യക്തമാക്കി. 15ന് ബംഗളൂരുവിനെതിരേയാണ് ഗോകുലത്തിന്റെ അടുത്ത മത്സരം.