പഞ്ചാബ്: ഐ ലീഗില്‍ വിജയവഴിയിലേക്ക് തിരിച്ചെത്തി ഗോകുലം കേരള എഫ് സി. ഇന്ന് നടന്ന മത്സരത്തില്‍ എതിരില്ലാത്ത അഞ്ച് ഗോളിന് ദല്‍ഹി എഫ്.സിയെയാണ് ഗോകുലം പരാജയപ്പെടുത്തിയത്. മത്സരത്തില്‍ സമ്പൂര്‍ണ ആധിപത്യം പുലര്‍ത്തിയ മലബാറിയന്‍സ് മികച്ച ജയമായിരുന്നു നേടിയത്. സെര്‍ജിയോയുടെ നേതൃത്വത്തില്‍ സൂസൈരാജ്, അഡാമ, സിനിസ എന്നിവരെ മുന്നേറ്റത്തില്‍ നിര്‍ത്തിയായിരുന്നു ടീം ഇറങ്ങിയത്.

മത്സരത്തിന്റെ തുടക്കത്തില്‍ ഇരു ടീമുകളും പതുക്കെയുള്ള നീക്കങ്ങളായിരുന്നു നടത്തിയത്. ആദ്യ 30 മിനുട്ടിനുള്ളില്‍ ഗോകുലത്തിന് ഗോളിലേക്കുള്ള അവസരങ്ങള്‍ തുറന്നു കിട്ടിയെങ്കിലും 41ാം മിനുട്ടിലായിരുന്നു ആദ്യ ഗോള്‍ വന്നത്. 41ാം മിനുട്ടില്‍ ലഭിച്ച പെനാല്‍റ്റിയില്‍ നിന്ന് അഡമയായിരുന്നു ഗോകുലത്തിനായി ആദ്യ ഗോള്‍ നേടിയത്. ഒരു ഗോള്‍ നേടിയതോടെ മത്സരത്തിന്റെ നിയന്ത്രണം ഏറ്റെടുത്ത ഗോകുലം ആധിപത്യം പുലര്‍ത്തി.

രണ്ടാം പകുതിയില്‍ വര്‍ധിത ശക്തിയുമായി എത്തിയ ടീം 63ാം മിനുട്ടിലായിരുന്നു രണ്ടാം ഗോള്‍ ദല്‍ഹിയുടെ വലയിലെത്തിച്ചത്. മൈതാന മധ്യത്തില്‍നിന്ന് ലഭിച്ച പന്തുമായി മുന്നേറിയ അഡമ പന്ത് കൃത്യമായി ലക്ഷ്യത്തിലെത്തിച്ചതോടെ സ്‌കോര്‍ 2-0 എന്നായി. രണ്ട് ഗോള്‍ നേടിയതോടെ ദഡല്‍ഹിക്കുമേല്‍ സമ്പൂര്‍ണ ആധിപത്യം പുലര്‍ത്തിയ ഗോകുലം 81ാം മിനുട്ടില്‍ രാഹുലിലൂടെ മൂന്നാം ഗോളും എതിരാളിയുടെ വലയിലെത്തിച്ച് വിജയത്തിന്റെ സൂചന നല്‍കി. പകരക്കാരനായി കളത്തിലെത്തി അധികം വൈകാതെയായിരുന്നു രാഹുലിന്റെ ഗോള്‍. ലെഫ്റ്റ് വിങ്ങില്‍നിന്ന് പന്തുമായി മുന്നേറിയ രാഹുലിന്റെ ഷോട്ട് നേരെ പോയത് ദല്‍ഹിയുടെ പോസ്റ്റിലേക്കായിരുന്നു. സ്‌കോര്‍ 3-0.

ക്യാപ്റ്റന്‍ സെര്‍ജിയോ നല്‍കിയ പാസില്‍ നിന്നായിരുന്നു സിനിസയുടെ ഗോള്‍ പിറന്നത്. പിന്നീട് കൃത്യമായ ഇടവേളകളില്‍ ഗോകുലം പന്ത് ലക്ഷ്യത്തിലെത്തിച്ചുകൊണ്ടിരുന്നു. 89ാം മിനുട്ടിലാണ് അരങ്ങേറ്റക്കാരന്‍ സിനിസയുടെ ഗോള്‍ വന്നത്. 95ാം മിനുട്ടില്‍ ദല്‍ഹിയുടെ ബോക്സില്‍ നിന്ന് ലഭിച്ച പന്തിനെ രണ്ടാമതൊന്ന് ആലോചിക്കാതെ അബലെഡോ ലക്ഷ്യത്തിലെത്തിച്ചതോടെ ഗോകുലത്തിന്റെ ഗോള്‍ വേട്ട അവസാനിക്കുകയായിരുന്നു. ഏഴ് മത്സരത്തില്‍നിന്ന് 10 പോയിന്റുള്ള ഗോകുലം പട്ടികയില്‍ നാലാം സ്ഥാനത്താണിപ്പോള്‍. 14ന് ഗോവയില്‍ ഡെമ്പോക്ക് എതിരേയാണ് ഗോകുലത്തിന്റെ അടുത്ത മത്സരം.