തിരുവനന്തപുരം: സിനിമാ - സീരിയല്‍ നടന്‍ ദിലീപ് ശങ്കറിനെ തിരുവനന്തപുരത്തെ ഹോട്ടല്‍ മുറിയില്‍ മരിച്ച നിലയില്‍ കണ്ടെത്തി. രണ്ട് ദിവസം മുമ്പാണ് ദിലീപ് ശങ്കര്‍ ഹോട്ടലില്‍ മുറിയെടുത്തത്. എന്നാല്‍ മുറി വിട്ട് പുറത്തേക്കൊന്നും പോയിരുന്നില്ലെന്നാണ് വിവരം. എറണാകുളത്തുകാരനായ ദിലീപ് ശങ്കര്‍ സീരിയല്‍ ഷൂട്ടിങ്ങിന്റെ ഭാഗമായാണ് തിരുവനന്തപുരത്തെത്തിയത്. മുറിയില്‍ നിന്ന് ദുര്‍ഗന്ധം വരുന്നതായി ശ്രദ്ധയില്‍പെട്ടതോടെ ജീവനക്കാര്‍ പോലീസില്‍ അറിയിക്കുകയായിരുന്നു. തുറന്ന് നോക്കിയപ്പോഴാണ് നടനെ മരിച്ച നിലയില്‍ കണ്ടെത്തിയത്.
ഷൂട്ടിങ്ങിന് ബ്രേക്ക് വന്നതിനാല്‍ ഹോട്ടലില്‍ മുറിയെടുക്കുകയായിരുന്നുവെന്ന് പറയുന്നു. എന്നാല്‍, ഇന്ന് വീണ്ടും ഷൂട്ടിങ് തുടങ്ങിയപ്പോള്‍ നടനെ ബന്ധപ്പെടാന്‍ സാധിച്ചില്ലെന്ന് സീരിയല്‍ അണിയറ പ്രവര്‍ത്തകര്‍ പറഞ്ഞു. തുടര്‍ന്ന് ഹോട്ടലില്‍ തിരക്കിയെത്തിയപ്പോഴാണ് നടന്‍ മരിച്ചതായി വിവരം അറിഞ്ഞത്. നോര്‍ത്ത് 24 കാതം, ചാപ്പാ കുരിശ് തുടങ്ങി നിരവധി സിനിമകളിലും അമ്മയറിയാതെ, പഞ്ചാഗ്‌നി തുടങ്ങി നിരവധി സീരിയലുകളിലും അഭിനയിച്ചിട്ടുണ്ട്.