കന്യാകുമാരി: ത്രിവേണി സംഗമ തീരത്ത് തമിഴ്‌നാട് സര്‍ക്കാര്‍ നിര്‍മിച്ച കണ്ണാടി പാലം തിങ്കളാഴ്ച പൊതുജനങ്ങള്‍ക്ക് തുറന്നു കൊടുക്കും. വിവേകാനന്ദ പാറയ്ക്കും തിരുവള്ളുവര്‍ പ്രതിമയ്ക്കും മധ്യേ കടലില്‍ നിര്‍മിച്ച കണ്ണാടിപ്പാലം മുഖ്യമന്ത്രി എം.കെ.സ്റ്റാലിന്‍ നാളെ വൈകിട്ട് 5.30ന് ഉദ്ഘാടനം ചെയ്യും. തിരുവള്ളുവര്‍ പ്രതിമ സ്ഥാപിച്ചതിന്റെ രജതജൂബിലി ആഘോഷത്തിന്റെ ഭാഗമായാണ് കണ്ണാടി നടപ്പാലം നിര്‍മിച്ചത്. കന്യാകുമാരി സന്ദര്‍ശിക്കുന്ന വിനോദ സഞ്ചാരികള്‍ക്ക് തമിഴ്‌നാടിന്റെ പുതുവര്‍ഷ സമ്മാനമാണ് കണ്ണാടി പാലം. ഇരുപാറകളെയും ബന്ധിപ്പിച്ച് കടലിനു മുകളില്‍ പാലം നിര്‍മിച്ചതോടെ വിവേകാനന്ദ പാറയില്‍ നിന്നു തിരുവള്ളുവര്‍ പ്രതിമയിലേക്കു നടന്ന് എത്തിച്ചേരാനാവും.

വിവേകാനന്ദ പാറയ്ക്കു സമീപം മറ്റൊരു പാറയിലാണ് 133 അടി ഉയരമുള്ള തിരുവള്ളുവര്‍ പ്രതിമ സ്ഥാപിച്ചിട്ടുള്ളത്. 37 കോടി രൂപ ചെലവില്‍ തമിഴ്‌നാട് പൊതുമരാമത്ത് വകുപ്പാണ് പാലം നിര്‍മിച്ചത്. പാലത്തിന്റെ മധ്യത്തില്‍ കട്ടിയുള്ള കണ്ണാടി സ്ഥാപിച്ച് തൂക്കുപാലം മാതൃകയിലാണ് നിര്‍മാണം. ഉദ്ഘാടനത്തിനു മുന്നോടിയായി ടൗണില്‍ 10 കോടി രൂപയുടെ നവീകരണ പ്രവര്‍ത്തനങ്ങള്‍ നടത്തി. ബോട്ടുജെട്ടിയില്‍ ടിക്കറ്റെടുക്കാന്‍ പുതിയ കാത്തിരിപ്പു കേന്ദ്രം, റോഡുകളുടെ നവീകരണം എന്നിവ ഇതിലുള്‍പ്പെടും. ബോട്ടുജെട്ടിക്കു സമീപം പ്രമുഖ ശില്‍പി സുദര്‍ശന്‍ പട്‌നായിക് മണ്ണുകൊണ്ടു നിര്‍മിച്ച തിരുവള്ളുവരുടെ പ്രതിമയുടെ അനാഛാദനവും മുഖ്യമന്ത്രി നാളെ നിര്‍വഹിക്കും. തുടര്‍ന്ന് കണ്ണാടിപ്പാലത്തില്‍ ലേസര്‍ ഷോ നടക്കും.

ഇതിന്റെ ഭാഗമായി 31നു രാവിലെ 9ന് തമിഴ്‌നാട് ഗെസ്റ്റ് ഹൗസില്‍ നടക്കുന്ന ചടങ്ങില്‍ തിരുവള്ളുവര്‍ പ്രതിമ സ്ഥാപിച്ചതിന്റെ രജതജൂബിലി ആഘോഷം മുഖ്യമന്ത്രി ഉദ്ഘാടനം ചെയ്യും. തുടര്‍ന്ന് സാംസ്‌കാരിക സമ്മേളനം, കവിയരങ്ങ് എന്നിവ നടക്കും.