ടെഹ്റാന്: ഈ മാസം ആദ്യം ഇറാന് വെടിവെച്ചിട്ട അമേരിക്കയുടെ എഫ്-15ഇ സ്ട്രൈക്ക് ഈഗിള് യുദ്ധവിമാനത്തിലെ രണ്ട് ഉദ്യോഗസ്ഥരെ രക്ഷിക്കാന് യുഎസ് നടത്തിയ ദൗത്യത്തിന്റെ പുതിയ സാറ്റലൈറ്റ് ദൃശ്യങ്ങള് പുറത്ത്. സോര് അറ്റ്ലസ് പുറത്തുവിട്ട ഉയര്ന്ന റെസല്യൂഷനുള്ള ചിത്രങ്ങളില്, ഇസ്ഫഹാന് പ്രവിശ്യയിലെ ഷഹ്റേസയിലുള്ള ഉപേക്ഷിക്കപ്പെട്ട ഒരു എയര്സ്ട്രിപ്പില് തകര്ന്ന നിലയിലുള്ള ഒന്നിലധികം അമേരിക്കന് വിമാനങ്ങളുടെ അവശിഷ്ടങ്ങള് കാണാം. വെറും രണ്ട് സൈനികരെ രക്ഷിക്കാന് 155 വിമാനങ്ങള് ഉള്പ്പെട്ട വന് സന്നാഹത്തെ അമേരിക്ക നിയോഗിച്ചത് എന്തിനാണെന്ന കാര്യത്തില് ഈ ദൃശ്യങ്ങള് വലിയ ചോദ്യങ്ങള് ഉയര്ത്തുന്നുണ്ട്.
ഡൊണാള്ഡ് ട്രംപ് ഈ ദൗത്യത്തെ 'ഏറ്റവും സാഹസികമായ രക്ഷാപ്രവര്ത്തനം' എന്ന് വിശേഷിപ്പിച്ചെങ്കിലും, ഇതിനിടയില് അമേരിക്കക്ക് സംഭവിച്ച നാശനഷ്ടങ്ങളെക്കുറിച്ച് പെന്റഗണ് വ്യക്തമായ വിവരങ്ങള് നല്കിയിട്ടില്ല. ഇറാന്റെ ആണവായുധ നിര്മ്മാണത്തിന് ആവശ്യമായ യുറേനിയം ശേഖരം സൂക്ഷിച്ചിരിക്കുന്ന ഇസ്ഫഹാന് ആണവ നിലയത്തില് നിന്നും വെറും 40 കിലോമീറ്റര് മാത്രം അകലെയാണ് ഈ വിമാനത്താവളം സ്ഥിതി ചെയ്യുന്നത്. അമേരിക്കന് സൈനികന് തകര്ന്നുവീണ സ്ഥലവും രക്ഷാസേന ഇറങ്ങിയ സ്ഥലവും തമ്മിലുള്ള വലിയ ദൂരം ചൂണ്ടിക്കാട്ടി, ആണവനിലയം പിടിച്ചെടുക്കാനുള്ള പരാജയപ്പെട്ട ശ്രമമായിരുന്നു ഇതെന്ന് ഇറാന് ആരോപിക്കുന്നു.
പുതിയ സാറ്റലൈറ്റ് ദൃശ്യങ്ങള് പ്രകാരം, രണ്ട് സി-130 ഹെര്ക്കുലീസ് ഗതാഗത വിമാനങ്ങളും രണ്ട് എംഎച്ച്-6 ലിറ്റില് ബേര്ഡ് ഹെലികോപ്റ്ററുകളും അവിടെ തകര്ന്നു കിടക്കുന്നതായി കാണാം. മണലില് കുടുങ്ങിയതിനെത്തുടര്ന്ന് നൂറോളം എലൈറ്റ് ഫോഴ്സുമായി വന്ന രണ്ട് സി-130 വിമാനങ്ങള് സാങ്കേതിക വിദ്യ ശത്രുക്കള്ക്ക് ലഭിക്കാതിരിക്കാന് അമേരിക്ക തന്നെ സ്ഫോടനത്തിലൂടെ നശിപ്പിച്ചതാണെന്ന് ട്രംപ് സമ്മതിച്ചിരുന്നു. എന്നാല് ഹെലികോപ്റ്ററുകളെക്കുറിച്ച് ഔദ്യോഗിക വിവരങ്ങളൊന്നും ലഭ്യമല്ല. ഇവ അമേരിക്കന് സൈന്യം തന്നെ നശിപ്പിച്ചതാണോ അതോ തങ്ങള് വെടിവെച്ചിട്ടതാണോ എന്ന കാര്യത്തില് തര്ക്കം നിലനില്ക്കുന്നു.
ദൗത്യം നടന്നതിന് പിന്നാലെ ഇറാന് ഈ പ്രദേശം പൂര്ണ്ണമായി സുരക്ഷാ വലയത്തിലാക്കിയതായി ദൃശ്യങ്ങളില് വ്യക്തമാണ്. തകര്ന്ന വിമാനങ്ങള്ക്ക് ചുറ്റും സുരക്ഷാ മതിലുകള് നിര്മ്മിക്കുകയും റണ്വേയില് മണ്കൂനകള് നിരത്തി അത് ഉപയോഗശൂന്യമാക്കുകയും ചെയ്തിട്ടുണ്ട്. ഭാവിയില് അമേരിക്കന് വിമാനങ്ങള് അവിടെ ഇറങ്ങുന്നത് തടയാനാണ് ഇറാന്റെ ഈ നീക്കം. തന്ത്രപ്രധാനമായ ഈ പ്രദേശം ഇത്തരത്തില് അടച്ചുപൂട്ടുന്നത് വഴി മേഖലയിലെ ഇറാന്റെ പ്രതിരോധം ശക്തമാക്കുകയാണ് ലക്ഷ്യം.
ഇസ്ഫഹാനിലെ ആണവനിലയത്തിന് സമീപമുള്ള ഇത്തരം ചെറു വിമാനത്താവളങ്ങള് ഇറാന് പ്രവര്ത്തനരഹിതമാക്കുന്നത് ഭാവിയില് അമേരിക്കക്ക് വലിയ വെല്ലുവിളിയാകും. ആണവ നിലയങ്ങള് ലക്ഷ്യമിട്ടുള്ള ഏത് കരസേനാ നീക്കവും ദുഷ്കരമാക്കുന്നതിനാണ് ഇറാന് മുന്ഗണന നല്കുന്നത്. ഇതര ഭാഗങ്ങളിലെ സമാനമായ എയര്സ്ട്രിപ്പുകളിലും ഇറാന് ഇത്തരം പ്രതിരോധ നടപടികള് സ്വീകരിക്കാന് സാധ്യതയുണ്ടെന്ന് വിദഗ്ധര് വിലയിരുത്തുന്നു. ഇതോടെ ഇറാന് മണ്ണിലെ അമേരിക്കന് ദൗത്യങ്ങള് കൂടുതല് അപകടകരമായി മാറുകയാണ്.
Related News
