ലോസ് ഏഞ്ചല്‍സ് - ദക്ഷിണ കാലിഫോര്‍ണിയയിലെ പാര്‍ക്കിംഗ് ഏരിയയില്‍ ചെറിയ വിമാനം തകര്‍ന്നു വീണ് പൈലറ്റിന് ഗുരുതര പരിക്കേറ്റു. തിങ്കളാഴ്ചയാണ് സംഭവം നടന്നതെന്ന് യുഎസ് അധികൃതര്‍ സ്ഥിരീകരിച്ചു. പ്രദേശത്തെ ഒരു ഓട്ടോ പാര്‍ട്സ് ഷോപ്പിന് സമീപമുള്ള പാര്‍ക്കിംഗ് ലോട്ടിലേക്കാണ് വിമാനം തകര്‍ന്നു വീണത്. അപകട വിവരം ലഭിച്ചയുടനെ ലോസ് ഏഞ്ചല്‍സ് ഫയര്‍ ഡിപ്പാര്‍ട്ട്മെന്റ് സ്ഥലത്തെത്തി രക്ഷാപ്രവര്‍ത്തനങ്ങള്‍ ആരംഭിച്ചു. തകര്‍ന്ന വിമാന അവശിഷ്ടങ്ങള്‍ക്കിടയില്‍ നിന്നും പുറത്തെടുത്ത 70 വയസ്സുകാരനായ പൈലറ്റിനെ അതീവ ഗുരുതരാവസ്ഥയില്‍ അടുത്തുള്ള ആശുപത്രിയില്‍ പ്രവേശിപ്പിച്ചു.

വിമാനത്തില്‍ പൈലറ്റ് മാത്രമാണ് ഉണ്ടായിരുന്നതെന്നും മറ്റ് ആളപായങ്ങളൊന്നും റിപ്പോര്‍ട്ട് ചെയ്തിട്ടില്ലെന്നും ഉദ്യോഗസ്ഥര്‍ വ്യക്തമാക്കി. പാര്‍ക്ക് ചെയ്തിരുന്ന കാറുകള്‍ക്ക് തൊട്ടടുത്തായി വിമാനം തലകീഴായി മറിഞ്ഞു കിടക്കുന്ന ദൃശ്യങ്ങള്‍ പ്രാദേശിക മാധ്യമങ്ങള്‍ പുറത്തുവിട്ടു. വിമാനത്തിന്റെ മുന്‍ഭാഗം പൂര്‍ണ്ണമായും തകര്‍ന്ന നിലയിലായിരുന്നു. അപകടത്തിന്റെ കാരണം വ്യക്തമല്ലെന്നും ഇതിനെക്കുറിച്ച് ഫെഡറല്‍ ഏവിയേഷന്‍ അധികൃതര്‍ അന്വേഷണം ആരംഭിച്ചതായും റിപ്പോര്‍ട്ടുകള്‍ സൂചിപ്പിക്കുന്നു.