കുവൈത്ത് സിറ്റി- അറബ്-ഗള്‍ഫ് മേഖലയിലെ പ്രശസ്ത കലാകാരിയും 'ഗള്‍ഫ് വെള്ളിത്തിരയുടെ പ്രിയതാരം' എന്ന് അറിയപ്പെടുകയും ചെയ്ത ഹയാത്ത് അല്‍-ഫഹദ് അന്തരിച്ചു. 78 വയസ്സായിരുന്നു. വാര്‍ദ്ധക്യസഹജമായ അസുഖങ്ങളെത്തുടര്‍ന്ന് ചികിത്സയിലായിരിക്കെ ചൊവ്വാഴ്ചയായിരുന്നു അന്ത്യം. അഞ്ചു പതിറ്റാണ്ടിലേറെ നീണ്ട അഭിനയജീവിതത്തിലൂടെ ഗള്‍ഫ് നാടക-സീരിയല്‍ രംഗത്ത് തന്റേതായ മുദ്ര പതിപ്പിച്ച അവര്‍, കുവൈത്തി കലാരംഗത്തെ ഏറ്റവും സ്വാധീനമുള്ള വ്യക്തിത്വങ്ങളില്‍ ഒരാളായിരുന്നു. 'ഖല്‍തി ഖുമാഷ', 'റുഖിയ വ സബിക' തുടങ്ങിയ അനശ്വരമായ നിരവധി സൃഷ്ടികളിലൂടെ തലമുറകളുടെ മനസ്സില്‍ ഇടംപിടിച്ചാണ് ഈ വലിയ കലാകാരി യാത്രയാകുന്നത്.

കലാപരമായ സംഭാവനകള്‍ക്കൊപ്പം തന്നെ മാനുഷികമായ ഇടപെടലുകളിലൂടെയും അവര്‍ ശ്രദ്ധിക്കപ്പെട്ടിരുന്നു. ഹയാത്ത് അല്‍-ഫഹദിന്റെ വിയോഗം അറബ് കലാലോകത്തിന് നികത്താനാവാത്ത നഷ്ടമാണെന്ന് വിവിധ സാംസ്‌കാരിക സംഘടനകള്‍ അനുശോചിച്ചു. പരേതയുടെ ആത്മാവിന് നിത്യശാന്തി നേരുന്നതായും അവരുടെ വിയോഗത്തില്‍ ദുഃഖിക്കുന്ന കുടുംബാംഗങ്ങളെയും ആരാധകരെയും അനുശോചനം അറിയിക്കുന്നതായും സഹപ്രവര്‍ത്തകര്‍ പറഞ്ഞു.