ടെഹ്റാന്‍: ഹോര്‍മുസ് കടലിടുക്ക് തുറന്നുകൊടുക്കണമെന്ന അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ അന്ത്യശാസനത്തിന് വിട്ടുവീഴ്ചയില്ലാത്ത മറുപടിയുമായി ഇറാന്‍ പ്രസിഡന്റ് മസൂദ് പെസെഷ്‌കിയാന്‍. വലിയ യുദ്ധമുണ്ടായാല്‍ താനുള്‍പ്പെടെ 1.4 കോടി ഇറാനികള്‍ രാജ്യാഭിമാനത്തിനായി ജീവന്‍ ബലിനല്‍കാന്‍ സന്നദ്ധരാണെന്ന് അദ്ദേഹം എക്‌സ് പ്ലാറ്റ്ഫോമിലൂടെ പ്രഖ്യാപിച്ചു.

ഇറാനിലെ വൈദ്യുതി നിലയങ്ങളും പാലങ്ങളും ബോംബിട്ട് തകര്‍ക്കുമെന്ന ട്രംപിന്റെ സമയപരിധി അവസാനിക്കാന്‍ മണിക്കൂറുകള്‍ മാത്രം ബാക്കിനില്‍ക്കെയാണ് ഇറാന്‍ പ്രസിഡന്റിന്റെ ഈ നിര്‍ണ്ണായക പ്രതികരണം. '1.4 കോടിയിലധികം ഇറാനികള്‍ സ്വയം സമര്‍പ്പണത്തിനായി തയ്യാറെടുത്ത് കഴിഞ്ഞു. ഞാനും എന്റെ ജീവിതം ഇറാന് വേണ്ടി നല്‍കാന്‍ എന്നും സന്നദ്ധനാണ്,' അദ്ദേഹം കുറിച്ചു. രാജ്യത്തെ 9 കോടി ജനങ്ങളില്‍ വലിയൊരു വിഭാഗം സര്‍ക്കാരിനോടൊപ്പം ഉറച്ചുനില്‍ക്കുന്നുവെന്ന് കാണിച്ച് അമേരിക്കയുടെ ആക്രമണ നീക്കത്തെ പ്രതിരോധിക്കാനാണ് ഈ പ്രഖ്യാപനം ലക്ഷ്യമിടുന്നത്.

യുദ്ധം ആരംഭിച്ചത് മുതല്‍ ടെക്സ്റ്റ് മെസേജുകളിലൂടെയും മാധ്യമങ്ങളിലൂടെയും സര്‍ക്കാര്‍ സന്നദ്ധപ്രവര്‍ത്തകരെ തേടുന്നുണ്ടായിരുന്നു. നേരത്തെ സര്‍ക്കാര്‍ പുറത്തുവിട്ട കണക്കുകളേക്കാള്‍ ഇരട്ടിയിലധികം ആളുകള്‍ ഇപ്പോള്‍ യുദ്ധസന്നദ്ധരായി മുന്നോട്ടുവന്നിട്ടുണ്ടെന്നാണ് പെസെഷ്‌കിയാന്‍ അവകാശപ്പെടുന്നത്.

ഹോര്‍മുസ് കടലിടുക്കിലെ ഉപരോധം നീക്കിയില്ലെങ്കില്‍ ചൊവ്വാഴ്ച രാത്രിയോടെ ഇറാനിലെ സുപ്രധാന അടിസ്ഥാന സൗകര്യങ്ങള്‍ തകര്‍ക്കുമെന്നാണ് ട്രംപിന്റെ ഭീഷണി. ഇതിന് മറുപടിയായി ഇറാന്‍ തങ്ങളുടെ ആള്‍ശക്തിയും പോരാട്ടവീര്യവും ഉയര്‍ത്തിക്കാട്ടുന്നത് മേഖലയിലെ സംഘര്‍ഷം പുതിയ തലത്തിലേക്ക് എത്തിച്ചിരിക്കുകയാണ്. ട്രംപിന്റെ സമയപരിധി അവസാനിക്കുന്നതോടെ ഒരു വലിയ യുദ്ധത്തിലേക്കാണോ ലോകം നീങ്ങുന്നത് എന്ന ആശങ്കയിലാണ് രാജ്യാന്തര സമൂഹം.