ചെന്നൈ: തിരുപ്പോരൂരില്‍ മെഡിക്കല്‍ വിദ്യാര്‍ഥികള്‍ സഞ്ചരിച്ച കാര്‍ നിര്‍ത്തിയിട്ടിരുന്ന തടിലോറിയിലേക്ക് ഇടിച്ചുകയറി നാലാം വര്‍ഷ വിദ്യാര്‍ഥിനി ദാരുണമായി മരിച്ചു. അപകടത്തില്‍ രണ്ട് മലയാളി വിദ്യാര്‍ഥികള്‍ക്ക് ഗുരുതര പരുക്കേല്‍ക്കുകയും ചെയ്തു. വെല്ലൂര്‍ സ്വദേശിനിയും നാലാം വര്‍ഷ വിദ്യാര്‍ഥിനിയുമായ മിസ്ബ ഫാത്തിമ (21) ആണ് മരിച്ചത്. ഗുരുതരമായി പരിക്കേറ്റ മലയാളികളായ നവ്യ (21), മുഹമ്മദ് അലി (21) എന്നിവരെ ചെന്നൈയിലെ സ്വകാര്യ ആശുപത്രിയില്‍ തീവ്രപരിചരണ വിഭാഗത്തില്‍ പ്രവേശിപ്പിച്ചു.

പുലര്‍ച്ചെ 3 മണിയോടെയാണ് ദാരുണമായ അപകടം ഉണ്ടായത്. ക്രോംപേട്ട് ബാലാജി മെഡിക്കല്‍ കോളജിലെ 10 വിദ്യാര്‍ഥികള്‍ രണ്ട് കാറുകളിലായി മഹാബലിപുരത്ത് പോയി തിരിച്ചുവരുന്നതിനിടെയായിരുന്നു അപകടം. മിസ്ബ ഫാത്തിമ സംഭവസ്ഥലത്ത് വെച്ച് തന്നെ മരിച്ചു. അപകടത്തില്‍ കാര്‍ പൂര്‍ണ്ണമായും തകര്‍ന്നു. പോലീസ് കേസെടുത്ത് അന്വേഷണം ആരംഭിച്ചു. ലോറി ഡ്രൈവര്‍ക്കെതിരെയാണ് പോലീസ് കേസെടുത്തിരിക്കുന്നത്.