കോഴിക്കോട്: ദക്ഷിണേന്ത്യന്‍ സംസ്ഥാനങ്ങളിലെ ആധുനിക നഗരങ്ങള്‍ക്ക് തനതായ ദൃശ്യചാരുത പകര്‍ന്നുനല്‍കിയ പ്രമുഖ ആര്‍ക്കിടെക്റ്റും എന്‍.എം. സലീം അസോസിയേറ്റ്‌സിന്റെ സ്ഥാപകനുമായ എന്‍.എം. സലീം (77) അന്തരിച്ചു. പക്ഷാഘാതത്തെത്തുടര്‍ന്ന് ചികിത്സയിലായിരുന്നു. മൃതദേഹം കോഴിക്കോട് മിനി ബൈപാസിലെ 'നികരത്തില്‍' വസതിയില്‍ പൊതുദര്‍ശനത്തിന് വെച്ച ശേഷം വൈകിട്ട് 4.30-ന് കോഴിക്കോട് സൗത്ത് ബീച്ച് കണ്ണന്‍പറമ്പ് ഖബര്‍സ്ഥാനില്‍ ഖബറടക്കും.

ആലപ്പുഴ പട്ടണക്കാട് നികരത്തില്‍ പരേതരായ മുഹമ്മദലി - ആമിനാബീവി ദമ്പതികളുടെ മകനാണ്. ഭാര്യ: ഷെറിന്‍ സലീം. മക്കള്‍: ആദില്‍ സലീം, അദീപ് സലീം, സുഹാന സലീം.

അഞ്ചു പതിറ്റാണ്ട് നീണ്ട രൂപകല്പനാ യാത്ര

1972-ല്‍ തിരുവനന്തപുരം എഞ്ചിനീയറിംഗ് കോളജില്‍ നിന്ന് ബി.ആര്‍ക്ക് പഠനം പൂര്‍ത്തിയാക്കിയ എന്‍.എം. സലീം, അതേവര്‍ഷം മാര്‍ച്ചിലാണ് കോഴിക്കോട് കേന്ദ്രമാക്കി എന്‍.എം. സലീം അസോസിയേറ്റ്‌സിന് തുടക്കമിടുന്നത്. ആറ് പതിറ്റാണ്ടിനടുത്ത് ദക്ഷിണേന്ത്യയിലെയും ഗള്‍ഫ് രാജ്യങ്ങളിലെയും വാസ്തുശില്പ രംഗത്ത് തിളങ്ങിനിന്ന അദ്ദേഹം, ഇന്ത്യയിലും വിദേശത്തുമായി 150-ലധികം പ്രമുഖ ആര്‍ക്കിടെക്റ്റുകള്‍ അടങ്ങുന്ന വലിയൊരു പ്രസ്ഥാനമായി തന്റെ സ്ഥാപനത്തെ വളര്‍ത്തിയെടുത്തു.

കേരളത്തിലുടനീളവും പുറത്തുമായി തലയുയര്‍ത്തി നില്‍ക്കുന്ന നൂറുകണക്കിന് പ്രശസ്തമായ കെട്ടിടങ്ങളും സ്ഥാപനങ്ങളും എന്‍.എം. സലീമിന്റെ രൂപകല്പനയില്‍ ഉയര്‍ന്നുവന്നവയാണ്.

പ്രധാന കെട്ടിടങ്ങള്‍: കൊച്ചിയിലെ ലേ മെറിഡിയന്‍, തൃശ്ശൂരിലെ ലുലു കണ്‍വെന്‍ഷന്‍ സെന്റര്‍, കൊച്ചി രാജീവ് ഗാന്ധി ഇന്‍ഡോര്‍ സ്റ്റേഡിയം, ധനലക്ഷ്മി ബാങ്ക് ഹെഡ്ക്വാട്ടേഴ്സ്, പോര്‍ട്ട് ബ്ലെയര്‍ എയര്‍പോര്‍ട്ട്, ബാംഗ്ലൂരിലെ 'ലേക്ക്സൈഡ് ഹാബിറ്റാറ്റ്', ബെയറീസ് ഗ്ലോബല്‍ റിസര്‍ച്ച് ട്രയാംഗിള്‍ (BGRT). കോഴിക്കോട് സെന്‍ട്രല്‍ ലൈബ്രറി, കോഴിക്കോട് പ്ലാനറ്റോറിയം, കുറ്റിപ്പുറം എം.ഇ.എസ് എഞ്ചിനീയറിംഗ് കോളജ്, കണ്ണൂര്‍ സര്‍വകലാശാലയിലെ താവക്കര ക്യാമ്പസ്. കോഴിക്കോട്, കണ്ണൂര്‍ സൈബര്‍ പാര്‍ക്കുകള്‍, പാലാ മാര്‍ സ്ലീവാ മെഡിസിറ്റി, തിരുവല്ല പുഷ്പഗിരി ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസ്, കൊച്ചി ലേക്ക്‌ഷോര്‍ ഹോസ്പിറ്റല്‍.

ആലപ്പുഴയില്‍ ജനിച്ച് കോഴിക്കോടിനെ തട്ടകമാക്കിയ സലീം, തന്റെ വിപ്ലവകരമായ വാസ്തുവിദ്യാ ശൈലിയിലൂടെ മലബാറിന്റെയും കേരളത്തിന്റെയും നഗരവികസന ചരിത്രത്തില്‍ നിസ്തുലമായ സംഭാവനകളാണ് നല്‍കിയത്.