ദുബായ്: മധ്യപൂര്‍വേഷ്യയിലെ ഏറ്റവും വലിയ വാണിജ്യോത്സവമായ ദുബായ് ഷോപ്പിംഗ് ഫെസ്റ്റിവലിന്റെ (ഡി.എസ്.എഫ്) 31-ാമത് എഡിഷന് ഡിസംബര്‍ അഞ്ചിന് തിരിതെളിയും. ദുബായ് ടൂറിസം വകുപ്പിന് കീഴിലുള്ള ദുബായ് ഫെസ്റ്റിവല്‍സ് ആന്‍ഡ് റീട്ടെയില്‍ എസ്റ്റാബ്ലിഷ്മെന്റ് (DFRE) ആണ് ഈ മെഗാ മേളയ്ക്ക് നേതൃത്വം നല്‍കുന്നത്. 38 ദിവസം നീണ്ടുനില്‍ക്കുന്ന ആഘോഷം 2026 ജനുവരി 11 വരെ തുടരും.

ഇത്തവണയും കോടികളുടെ സമ്മാനങ്ങളാണ് ഡി.എസ്.എഫ് സന്ദര്‍ശകര്‍ക്കായി ഒരുക്കിയിരിക്കുന്നത്. 200 ദിര്‍ഹമിന് ഷോപ്പിംഗ് നടത്തുന്നവരില്‍ നിന്ന് തിരഞ്ഞെടുക്കപ്പെടുന്നവര്‍ക്ക് ദിവസവും നിസ്സാന്‍ കാറും ഒരു ലക്ഷം ദിര്‍ഹം ക്യാഷ് പ്രൈസും ലഭിക്കും. കൂടാതെ, എല്ലാ ആഴ്ചയിലും നടക്കുന്ന നറുക്കെടുപ്പിലൂടെ 26 ലക്ഷം ദിര്‍ഹം വിലമതിക്കുന്ന സ്വര്‍ണ്ണവും സമ്മാനമായി നല്‍കും. മേളയുടെ സമാപന ദിവസം നടക്കുന്ന ബമ്പര്‍ നറുക്കെടുപ്പിലെ വിജയിക്ക് നാല് ലക്ഷം ദിര്‍ഹമാണ് ലഭിക്കുക.

മേളയുടെ ഭാഗമായുള്ള 100 ദിര്‍ഹം വിലയുള്ള റാഫിള്‍ ടിക്കറ്റുകളുടെ വിതരണം ദുബായില്‍ ആരംഭിച്ചുകഴിഞ്ഞു. ഇനോക്, സൂം സ്റ്റോറുകള്‍, ഓട്ടോപ്രോ, വെഹിക്കിള്‍ രജിസ്‌ട്രേഷന്‍ സെന്ററുകള്‍ എന്നിവിടങ്ങളില്‍ നിന്ന് ടിക്കറ്റുകള്‍ ലഭ്യമാണ്.