റിയാദ്: ശാസ്ത്ര സാങ്കേതിക രംഗത്തെ മുന്നേറ്റങ്ങളെയും നൂതന ആശയങ്ങളെയും അടുത്തറിഞ്ഞും പ്രോത്സാഹിപ്പിച്ചും സമൂഹത്തില്‍ വൈഞ്ജാനിക വിപ്ലവം സൃഷ്ടിക്കുക എന്ന ലക്ഷ്യത്തോടെ രിസാല സ്റ്റഡി സര്‍ക്കിള്‍ (ആര്‍. എസ്. സി) സംഘടിപ്പിച്ച മൂന്നാമത് 'നോട്ടെക് - നോളജ് ആന്‍ഡ് ടെക്നോളജി എക്‌സ്‌പോ' റിയാദിലെ അസീസിയ ഗ്രേറ്റ് ഇന്റര്‍നാഷണല്‍ സ്‌കൂളില്‍ സമാപിച്ചു.
പരിപാടിയുടെ പ്രധാന ആകര്‍ഷണമായി സയന്‍സ് - ടെക്നോളജി പവലിയനുകള്‍, DIY ലാബുകള്‍, പ്രദര്‍ശനങ്ങള്‍, കരിയര്‍ ക്ലിനിക്ക് തുടങ്ങി വൈവിധ്യമായ വിഭവങ്ങളാല്‍ സന്ദര്‍ശകര്‍ക്ക് അറിവും അനുഭവവും ആസ്വാദനവും നല്‍കുന്ന വേദിയായി ഈ വര്‍ഷത്തെ നോട്ടെക് പ്രദര്‍ശന വേദി. പൊതുജനങ്ങള്‍, ഉദ്യോഗാര്‍ഥികള്‍ക്ക് പുറമെ റിയാദ്, ദമ്മാം, ഖോബാര്‍ തുടങ്ങിയ നഗരങ്ങളിലെ സ്‌കൂള്‍ ക്യാമ്പസുകളില്‍ നിന്നുമുള്ള വിദ്യാര്‍ത്ഥികള്‍ നോട്ടെക്കിന്റെ ഭാഗമായി. സംരംഭങ്ങള്‍ക്ക് പുറമെ സ്ഥാപനങ്ങള്‍, ക്യാംപസുകള്‍, വ്യക്തികള്‍ എന്നിവര്‍ക്കും പവലിയനുകള്‍ സജ്ജീകരിക്കാന്‍ അവസരം നല്‍കി.
സൗദി അറേബ്യയിലെ വിജ്ഞാനസാങ്കേതിക രംഗങ്ങളിലെ ശ്രദ്ധേയമായ സംഭാവനകള്‍ക്കുള്ള അംഗീകാരമായി രിസാല സ്റ്റഡി സര്‍ക്കിള്‍ സൗദി ഈസ്റ്റ് നാഷനല്‍ ഏര്‍പ്പെടുത്തിയ നോട്ടെക് എക്‌സലന്‍സി പുരസ്‌കാരം അല്‍ അഹ്‌സ കിംഗ് ഫൈസല്‍ യൂണിവേഴ്‌സിറ്റി അപ്ലൈഡ് മെഡിക്കല്‍ സയന്‍സസ് കോളേജിലെ ക്ലിനിക്കല്‍ ന്യൂട്രിഷന്‍ ഡിപ്പാര്‍ട്ട്‌മെന്റ് പ്രൊഫസറും, ചാര്‍ട്ടേഡ് സയന്റിസ്റ്റുമായ ഡോ. ഗൗസല്‍ അസം ഖാന്‍ അര്‍ഹനായി. അദ്ദേഹം വെസ്റ്റ് ബംഗാള്‍ സ്വദേശിയാണ്.
ആര്‍. എസ്. സി സൗദി ഈസ്റ്റ് നാഷനല്‍ ചെയര്‍മാന്‍ ഫാറൂഖ് സഖാഫിയുടെ അദ്ധ്യക്ഷതയില്‍ സമാപന സംഗമം സംസ്ഥാന മുന്‍ വിവരാവകാശ കമ്മീഷണര്‍ ഡോ: എ. അബ്ദുല്‍ ഹക്കിം ഉദ്ഘാടനം ചെയ്തു. ഡോ: നൗഫല്‍ അഹ്‌സനി നോടെക് സന്ദേശവും, ജനറല്‍ സെക്രട്ടറി അനസ് വിളയൂര്‍ സ്വാഗതവും, അഷ്‌കര്‍ കൊണ്ടോട്ടി നന്ദിയും പറഞ്ഞു.
Related News
