ന്യൂഡല്ഹി: വോട്ടര് പട്ടികയിലെ 'പ്രത്യേക തീവ്ര പരിഷ്കരണം' (SIR) രാജ്യത്തെ ജനാധിപത്യത്തെ തകര്ക്കാനുള്ള തിരഞ്ഞെടുപ്പ് കമ്മീഷന്റെ ഗൂഢപദ്ധതിയാണെന്ന് ആരോപിച്ച് കോണ്ഗ്രസ് പ്രക്ഷോഭത്തിനൊരുങ്ങുന്നു. ഇതിനെതിരെ ഡിസംബര് ആദ്യവാരം ഡല്ഹിയിലെ രാംലീലാ മൈതാനിയില് മഹാറാലി നടത്തുമെന്ന് കോണ്ഗ്രസ് ജനറല് സെക്രട്ടറിയും എം.പിയുമായ കെ.സി. വേണുഗോപാല് അറിയിച്ചു.
എസ്.ഐ.ആര് നടപ്പാക്കുന്ന 12 സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും പാര്ട്ടി നേതാക്കള് പങ്കെടുത്ത യോഗത്തിലാണ് സുപ്രധാന തീരുമാനം കൈക്കൊണ്ടത്. കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെയുടെ അധ്യക്ഷതയില് ചേര്ന്ന യോഗത്തില് രാഹുല് ഗാന്ധിയും എ.ഐ.സി.സി ജനറല് സെക്രട്ടറിമാരും പി.സി.സി അധ്യക്ഷന്മാരും പങ്കെടുത്തു.
ദുരുദ്ദേശ്യത്തോടെയുള്ള തിരഞ്ഞെടുപ്പ് കമ്മീഷന് ശ്രമങ്ങള്ക്കെതിരെ ജാഗ്രത പാലിക്കാന് പി.സി.സി.കള്ക്ക് യോഗം നിര്ദ്ദേശം നല്കി. ജനാധിപത്യത്തെയും പ്രതിപക്ഷ പാര്ട്ടികളെയും തകര്ക്കുകയാണ് തിരഞ്ഞെടുപ്പ് കമ്മീഷന്റെ ലക്ഷ്യം. ചില വിഭാഗം വോട്ടര്മാരെ ലക്ഷ്യമിട്ട് പട്ടികയില് നിന്ന് വെട്ടിമാറ്റാന് എസ്.ഐ.ആര് പ്രക്രിയ ഉപയോഗിക്കുന്നതായി ആരോപിച്ചു.
എസ്.ഐ.ആറിനെതിരെ കോണ്ഗ്രസ് രാജ്യവ്യാപകമായി ഒപ്പുശേഖരണം നടത്തുകയാണ്. ഏകദേശം 50 ദശലക്ഷം ആളുകളില് നിന്ന് ഒപ്പ് ശേഖരിച്ച ശേഷമാകും റാലി. ലക്ഷക്കണക്കിന് ജനങ്ങള് റാലിയില് പങ്കെടുക്കുമെന്നും തിരഞ്ഞെടുപ്പ് കമ്മീഷന്റെ 'ഗൂഢതന്ത്രങ്ങള്' തുറന്നുകാട്ടുമെന്നും കെ.സി. വേണുഗോപാല് വ്യക്തമാക്കി.
കേരളത്തില് എസ്.ഐ.ആര് നടത്താന് ഇത് ഉചിതമായ സമയമല്ലെന്ന് സംസ്ഥാന തിരഞ്ഞെടുപ്പ് കമ്മീഷനും ബി.ജെ.പി ഒഴികെയുള്ള എല്ലാ പാര്ട്ടികളും അഭിപ്രായപ്പെട്ടതാണ്. എന്നിട്ടും ഈ ആവശ്യം ചെവിക്കൊള്ളാതെ കേന്ദ്ര തിരഞ്ഞെടുപ്പ് കമ്മീഷന് നരേന്ദ്ര മോദിക്കും ബി.ജെ.പിക്കും വേണ്ടി പ്രവര്ത്തിക്കുകയാണെന്ന് വേണുഗോപാല് ആരോപിച്ചു. എസ്.ഐ.ആര് നടപടികള് മാറ്റി വെക്കണമെന്ന് ആവശ്യപ്പെട്ട് കേരള നിയമസഭ പ്രമേയം പാസാക്കിയ കാര്യവും അദ്ദേഹം ചൂണ്ടിക്കാട്ടി.
Related News
