ജിദ്ദ: സൗദി ഇന്ത്യന്‍ ഫുട്ബാള്‍ ഫോറത്തിന്റെ ആഭിമുഖ്യത്തില്‍ നടക്കുന്ന സിഫ് റബിയ ടീ ചാമ്പ്യന്‍സ് ലീഗില്‍ ഡി ഡിവിഷനില്‍ ലിങ്ക് ടെലികോം സോക്കര്‍ ഫ്രീക്സ് ജൂനിയര്‍ ഏകപക്ഷീയമായ മൂന്ന് ഗോളുകള്‍ക്ക് പവര്‍ സ്‌പോട് ഫിറ്റ്‌നസ് സ്‌പോര്‍ട്ടിങ് യുണൈറ്റഡ് ജിദ്ദ ബി ടീമിനെ തോല്‍പ്പിച്ചു. സോക്കര്‍ ഫ്രീക്സിനു വേണ്ടി മുഹമ്മദ് റിദാന്‍ ടൂര്‍ണമെന്റിലെ ആദ്യ ഹാട്രിക് നേടി. മത്സരത്തിലെ മികച്ച കളിക്കാരന്‍.മുഹമ്മദ് റിദാനു ഡോ. ഇന്ദു ട്രോഫി സമ്മാനിച്ചു.

ബി ഡിവിഷനിലെ ആദ്യ മത്സരത്തില്‍ വൈ സി സി സാഗൊ എഫ് സി ഏകപക്ഷീയമായ നാല് ഗോളുകള്‍ക്ക് എഫ് സി കുവൈസയെ തോല്‍പ്പിച്ചു. അജ്മല്‍ പറത്തൊടി, മുബാറക് കാരത്തൊടി, നംഷീര്‍ അലി, ഷാദിന്‍ എന്നിവരാണ് സാഗൊ എഫ് സിയുടെ ഗോളുകള്‍ നേടിയത്. കളിയിലെ കേമനായി തിരഞ്ഞെടുത്ത സാഗോ എഫ്‌സിയുടെ മുബാറക് കാരത്തൊടിക്കു മുഹമ്മദ് ആലുങ്ങല്‍ ട്രോഫി സമ്മാനിച്ചു.

ബി ഡിവിഷനിലെ രണ്ടാം മത്സരത്തില്‍ ഡേ് ബൈ ഡേ മാര്‍ക്കറ്റ് യാസ് എഫ് സി രണ്ടു ഗോളുകള്‍ക്ക് എച്ച് എം ആര്‍ ജെ എസ് സി ഫാല്‍ക്കണ്‍ എഫ് സി തൂവലിനെ പരാജയപ്പെടുത്തി. മുഹമ്മദ് റാഷിദും ഫാസില്‍ കൊണ്ടോട്ടി പറമ്പനുമാണ് യാസ് എഫ്സിയുടെ ഗോളുകള്‍ നേടിയത്. യാസ് എഫ്സിയുടെ അമന്‍ മായന്‍ റഷീദ് ആണ് പ്ലയെര്‍ ഓഫ് ദി മാച്ച്.

തുല്യശക്തികളുടെ പോരാട്ടം കണ്ട ബി ഡിവിഷനിലെ മൂന്നാം മത്സരത്തില്‍ കഴിഞ്ഞ വര്‍ഷത്തെ റണ്ണറപ്പായ എം എസ് വണ്‍ കോള്‍ഡ് ചെയിന്‍ ടെക്‌നോളോജിസ് റെഡ് സീ ബ്ലാസ്റ്റേഴ്സ് എഫ് സി ഒന്നിനെതിരെ രണ്ടു ഗോളുകള്‍ക്ക് അല്‍ ഫിഫി ജിദ്ദ എഫ് സിയെ പരാജയപ്പെടുത്തി. തുടക്കം മുതല്‍ അവസാന വിസില്‍ വരെ കാണികളെ ഉദ്വേഗത്തിന്റെ മുള്‍മുനയില്‍ നിര്‍ത്തിയ ആവേശകമായ പോരാട്ടത്തില്‍ മുഹമ്മദ് അഷ്ഫാഖും, മുഹമ്മദ് നവാസും റെഡ് സീ ബ്ലാസ്റ്റേഴ്സിന് വേണ്ടി ഗോള്‍ സ്‌കോര്‍ ചെയ്തപ്പോള്‍, ജിദ്ദ എഫ് സിയുടെ ഗോള്‍ ഫവാസ് കാരാട്ടിലിന്റെ വകയായിരുന്നു.

ഗോള്‍ രഹിതമായിരുന്ന ആദ്യ പകുതിക്ക് ശേഷം രണ്ടാം പകുതിയാലായിരുന്നു മത്സരത്തിലെ മൂന്ന് ഗോളുകളും. മത്സരത്തിന്റെ തുടക്കം മുതല്‍ വേഗതയാര്‍ന്ന നീക്കങ്ങളിലൂടെ റെഡ് സീ ബ്ലാസ്റ്റേഴ്സിന്റെ മുന്നേറ്റ നിരയില്‍ മികച്ച പ്രകടനം നടത്തുകയും ഉജ്വലമായ ഗോളിലൂടെ ടീമിന് ലീഡ് നേടിക്കൊടുക്കുകയും ചെയ്ത മത്സരത്തിലെ മികച്ച കളിക്കാരന്‍ കൂടിയായി തിരഞ്ഞെടുക്കപ്പെട്ട മുഹമ്മദ് നവാസിനു ഫിര്‍ദൗസും ഫിറോസ് ചെറുകോടും സംയുക്തമായി ട്രോഫി നല്‍കി..

ബി ഡിവിഷനിലെ നാലാം മത്സരത്തില്‍ റബിയ ടീ അബീര്‍ ബ്ലൂസ്റ്റാര്‍ എ ടീം ഏകപക്ഷീയമായ അഞ്ചു ഗോളുകള്‍ക്ക് നജിം അമന്‍ യുണൈറ്റഡ് സ്‌പോര്‍ട്‌സ് ക്ലബ് എ ടീമിനെ തോല്‍പ്പിച്ചു. ബ്ലൂസ്റ്റാറിന് വേണ്ടി അബ്ദുള്ള ഹസ്സന്‍ മുസ്ലിയാരകത് (2), സുഫൈദ് താഴത്തെ കളത്തില്‍ (2) , മിന്‍ഹാജ് റഹ്‌മാന്‍ (1) എന്നിവരുടെ വകയായിരുന്നു ഗോളുകള്‍. നല്ല കളിക്കാരനായി തിരഞ്ഞെടുക്കപ്പെട്ട ബ്ലൂസ്റ്റാര്‍ എ ടീമിന്റെ അബ്ദുള്ള ഹസ്സന്‍ മുസ്ലിയാരകത്തിനു നാസര്‍ ശാന്തപുരം ട്രോഫി സമ്മാനിച്ചു.
വിവിധ മത്സരങ്ങളിലായി തമീം, മനാഫ്, നൗഷാദ് മഞ്ചേരി, ഇസ്ഹാഖ് യൂ പി, ബഷീര്‍ ലക്കി ദര്‍ബാര്‍, ഗഫൂര്‍ മമ്പാട്, മന്‍സൂര്‍ കെ.സി, സിദ്ധിഖ്, (നജ്ഉം അമാന്‍ മക്ക ), അഹ്‌മദ് ഷാന്‍ (കൊക്കരക്കോ -മക്ക , മുസ്തഫാ ( മാര്‍ക്കറ്റിങ് മാനേജര്‍ -ന്യൂ ഗുലൈല്‍ പോളിക്ലിനിക്ക് ), സാദിഖ് (ചെയര്‍മാന്‍ -അല്‍ഫിഫി ) റഫീഖ് (എം.ഡി.-അല്‍ഫിഫി ) കളിക്കാരുമായി പരിചയപ്പെട്ടു.,

സിഫും സാന്‍ഫോഡും സംയുക്തമായി സംഘടിപ്പിച്ച ഭാഗ്യ നറുക്കെടുപ്പില്‍ മുജീബ്, മുഹമ്മദ് ജാസിം എന്നിവര്‍ വിജയികളായി. സിഫ് റബിയ ടീ ചാമ്പ്യന്‍സ് ലീഗിലെ അടുത്ത ആഴ്ച്ച മുതലുള്ള മത്സരങ്ങള്‍ യൂണിവേഴ്സിറ്റി സ്റ്റേഡിയത്തില്‍ തന്നെ ആയിരിക്കും നടക്കുക എന്ന് സിഫ് ഭാരവാഹികള്‍ അറിയിച്ചു. അടുത്ത ആഴ്ച്ച മുതല്‍ മത്സരങ്ങള്‍ 4:00 ന് തന്നെ ആരംഭിക്കുമെന്നും സംഘാടകര്‍ അറിയിച്ചു.

ഫോട്ടോ: എഫ്‌സി കുവൈസ - വൈ. സി. സി. സഗോ എഫ്‌സി മത്സരത്തില്‍ നിന്ന്.