പട്‌ന: എക്‌സിറ്റ് പോള്‍ ഫലങ്ങളെ കടത്തിവെട്ടുന്ന വിജയവുമായി ബിഹാര്‍ നിയമസഭ തിരഞ്ഞെടുപ്പില്‍ എന്‍ഡിഎ സഖ്യം അധികാരം നിലനിര്‍ത്തി. നിലവില്‍ 202 സീറ്റിലാണ് എന്‍ഡിഎ സഖ്യം വിജയക്കൊടി പാറിച്ചത്. പ്രതിപക്ഷ ഇന്ത്യാ സഖ്യം വെറും 35 സീറ്റില്‍ ഒതുങ്ങി. 91 സീറ്റുമായി ബിജെപി വലിയ ഒറ്റകക്ഷിയായപ്പോള്‍ ജെഡിയു 83 സീറ്റുമായി വന്‍ മുന്നേറ്റമുണ്ടാക്കി.

അതേസമയം, 2020ലെ ഏറ്റവും വലിയ ഒറ്റക്കക്ഷിയായിരുന്ന ആര്‍ജെഡി 27 സീറ്റിലേക്ക് നിലം പതിച്ചു. കോണ്‍ഗ്രസ് പാടെ തകര്‍ന്ന് 5 സീറ്റില്‍ മാത്രമായി. എന്‍ഡിഎക്ക് ഒപ്പമുള്ള എല്‍ജെപി (റാംവിലാസ്) 19 സീറ്റുകള്‍ കരസ്ഥമാക്കി. പ്രശാന്ത് കിഷോറിന്റെ ജന്‍ സുരാജ് പാര്‍ട്ടി പ്രകടനത്തില്‍ പാടെ പിന്നിലായി. അസറുദ്ദീന്‍ ഉവൈസിയുടെ എഐഎംഐഎം അഞ്ചു സീറ്റുകള്‍ നേടി. എച്ച്എഎം (എസ്)-5, ആര്‍എല്‍എം-4, സിപിഐ (എംഎല്‍)-2, സി.പി.എം-1 എന്നിങ്ങനെയാണ് മറ്റു കക്ഷികളുടെ നില.

243 അംഗ നിയമസഭയില്‍ 122 സീറ്റാണ് കേവലഭൂരിപക്ഷത്തിനു വേണ്ടത്. 66.91% എന്ന റെക്കോര്‍ഡ് പോളിങ് നടന്ന തിരഞ്ഞെടുപ്പില്‍ നിതീഷ് കുമാറിനും എന്‍ഡിഎക്കും ഭരണത്തുടര്‍ച്ചയാണ് എക്‌സിറ്റ് പോളുകളെല്ലാം പ്രവചിച്ചത്. 2020 തിരഞ്ഞെടുപ്പില്‍ എന്‍ഡിഎ സഖ്യം 125 സീറ്റ് നേടി അധികാരം പിടിച്ചപ്പോള്‍ ആര്‍ജെഡി കോണ്‍ഗ്രസ്ഇടതുകക്ഷികള്‍ അടങ്ങിയ മഹാസഖ്യത്തിന് 110 സീറ്റുകള്‍ നേടാനായിരുന്നു. ഇക്കുറി അതിന്റെ പകുതി പോലും സീറ്റുകള്‍ പിടിക്കാനായില്ല.