സൗദി അറേബ്യയുടെ വടക്കുപടിഞ്ഞാറന്‍ തീരത്ത്, തബൂക്ക് പ്രവിശ്യയിലെ അല്‍ വജ്ഹ് റെഡ് സീ തീരത്തുള്ള ലോകോത്തര ആഢംബര ടൂറിസം കേന്ദ്രമായ അമാല (AMAALA) പദ്ധതിയുടെ ആദ്യ ഘട്ടമായ ട്രിപ്പിള്‍-ബേ (Triple-Bay) വിനോദ സഞ്ചാരികള്‍ക്കായി തുറന്നു. ആദ്യ ഘട്ടത്തില്‍ ടൂറിസ്റ്റുകളെ സ്വീകരിക്കുന്നതിനായി ആറ് ലോകോത്തര ലക്ഷ്വറി റിസോര്‍ട്ടുകളാണ് തുറക്കുന്നത്. ബാക്കിയുള്ള മൂന്ന് റിസോര്‍ട്ടുകള്‍ വരും മാസങ്ങളില്‍ പൂര്‍ത്തിയാകും.

തുറക്കുന്ന റിസോര്‍ട്ടുകളില്‍ ഇക്വിനോക്സ്, ഫോര്‍ സീസണ്‍സ്, നാംമോസ്, റോസ്വുഡ്, സിക്‌സ് സെന്‍സസ്, റെഡ് സീ ഗ്ലോബലിന്റെ സ്വന്തം ബ്രാന്‍ഡായ അമാല ഹോട്ടല്‍ എന്നിവ ഉള്‍പ്പെടുന്നു. കടല്‍ ജീവജാലങ്ങളെക്കുറിച്ച് പഠിക്കുന്നതിനും സംരക്ഷിക്കുന്നതിനുമുള്ള അത്യാധുനിക കേന്ദ്രമായ കോറാലിയം മറൈന്‍ ലൈഫ് ഇന്‍സ്റ്റിറ്റ്യൂട്ടും ഇതിന്റെ പ്രത്യേകതയാണ്. മറൈന്‍ ലൈഫ് ഇന്‍സ്റ്റിറ്റ്യൂട്ടിന് അടുത്തായി 120 ബര്‍ത്തുകളോടുകൂടിയ ആഢംബര യാട്ട് ക്ലബ്ബുമുണ്ട്. ഹോട്ടലുകള്‍, ഉയര്‍ന്ന നിലവാരമുള്ള റീട്ടെയില്‍ ഔട്ട്‌ലെറ്റുകള്‍, മികച്ച ഡൈനിംഗ് ഓപ്ഷനുകള്‍ എന്നിവ ഉള്‍പ്പെടുന്ന മറീനയോട് ചേര്‍ന്നുള്ള മറീന വില്ലേജ്, റിസോര്‍ട്ടുകളെ പ്രകൃതിയുമായി ബന്ധിപ്പിക്കുന്ന 5 കിലോമീറ്റര്‍ നീളമുള്ള വെല്‍നെസ് റൂട്ട് എന്നിവയും അമാലയെ കൂടുതല്‍ ആകര്‍ഷകമാക്കുന്നു.

മൂന്ന് ഉള്‍ക്കടലുകള്‍ ചേരുന്ന തന്ത്രപ്രധാനമായ സ്ഥലത്താണ് അമാലയുടെ ആദ്യ ഘട്ടമായ ട്രിപ്പിള്‍-ബേ തുറന്നിരിക്കുന്നത്. ഈ പ്രദേശം പ്രിന്‍സ് മുഹമ്മദ് ബിന്‍ സല്‍മാന്‍ നാച്ചുറല്‍ റിസര്‍വിനുള്ളിലാണ് സ്ഥിതി ചെയ്യുന്നത്. ട്രിപ്പിള്‍-ബേയുടെ പ്രഖ്യാപനം റെഡ് സീ ഗ്ലോബല്‍ റിയാദില്‍ വെച്ചാണ് നടത്തിയത്.

റെഡ് സീ ഗ്ലോബലിന് കീഴിലുള്ള ഈ മെഗാ പ്രൊജക്റ്റ് സൗദിയുടെ വിഷന്‍ 2030-ന്റെ ഭാഗമാണ്. 'ആശ' (Hope) എന്ന് അര്‍ത്ഥം വരുന്ന അറബി വാക്കില്‍ നിന്നും 'പരിശുദ്ധി' (Purity) എന്നര്‍ത്ഥം വരുന്ന പുരാതന സംസ്‌കൃത വാക്കില്‍ നിന്നും പ്രചോദനം ഉള്‍ക്കൊണ്ടാണ് 'അമാല' എന്ന പേര് നല്‍കിയിരിക്കുന്നത്.

ഈ ലക്ഷ്വറി ഡെസ്റ്റിനേഷന്‍ പൂര്‍ണ്ണമായും സോളാര്‍, കാറ്റാടി തുടങ്ങിയ പുനരുപയോഗ ഊര്‍ജ്ജ സ്രോതസ്സുകള്‍ ഉപയോഗിച്ചാണ് പ്രവര്‍ത്തിക്കുക. ഇത് പ്രതിവര്‍ഷം അരലക്ഷം ടണ്ണോളം കാര്‍ബണ്‍ പുറന്തള്ളുന്നത് ഒഴിവാക്കും. പൂര്‍ണ്ണമായും പ്രവര്‍ത്തനക്ഷമമാകുമ്പോള്‍ പദ്ധതിയുടെ കാര്‍ബണ്‍ കാല്‍പ്പാടുകള്‍ പൂജ്യമായിരിക്കും. മാലിന്യം പൂര്‍ണ്ണമായും ഒഴിവാക്കുകയും ചെയ്യും.

4,155 ചതുരശ്ര കിലോമീറ്റര്‍ വിസ്തൃതിയില്‍ വ്യാപിച്ചുകിടക്കുന്ന പദ്ധതി പ്രദേശത്തിന്റെ 5% മാത്രമാണ് നിര്‍മ്മാണത്തിനായി ഉപയോഗിക്കുന്നത്. പദ്ധതിയുടെ എല്ലാ ഘട്ടങ്ങളും 2030 ഓടെ പൂര്‍ത്തിയാവും. മൊത്തം 25-30 ഹോട്ടലുകളിലായി 3,000 മുതല്‍ 4,000 വരെ ആഢംബര ഹോട്ടല്‍ മുറികളും, 900-ല്‍ അധികം ലക്ഷ്വറി വില്ലകളും അപ്പാര്‍ട്ട്‌മെന്റുകളും ഇവിടെയുണ്ടാകും.

51 ബില്യണ്‍ റിയാലിന്റെ നിക്ഷേപമുള്ള ഈ പദ്ധതി സൗദിയുടെ ജിഡിപിയിലേക്ക് പ്രതിവര്‍ഷം 11 ബില്യണ്‍ റിയാലിന്റെ വരുമാനം നല്‍കുമെന്നാണ് പ്രതീക്ഷ. നിര്‍മ്മാണ മേഖലയിലും അനുബന്ധ വ്യവസായങ്ങളിലുമായി 50,000-ത്തോളം പുതിയ നേരിട്ടുള്ളതും അല്ലാത്തതുമായ തൊഴിലവസരങ്ങള്‍ സൃഷ്ടിക്കുമെന്നാണ് കണക്ക്. പരിസ്ഥിതി സംരക്ഷണം ഉറപ്പാക്കുന്നതിനായി പ്രതിവര്‍ഷം 500,000 സന്ദര്‍ശകര്‍ക്ക് മാത്രമായി പ്രവേശനം പരിമിതപ്പെടുത്തും.

തബൂക്കില്‍ നിന്ന് ഏകദേശം മൂന്ന് മണിക്കൂര്‍ ദൂരമാണ് അമാലയിലേക്കുള്ളത്. ഏറ്റവും എളുപ്പത്തില്‍ എത്താന്‍ സാധിക്കുക അല്‍ വജ്ഹ് എയര്‍പോര്‍ട്ട് വഴിയാണ്. ഈ വിമാനത്താവളം പദ്ധതിയുടെ ആവശ്യകതകള്‍ക്കായി പുനര്‍നിര്‍മ്മിക്കുകയും വികസിപ്പിക്കുകയും ചെയ്യുന്നുണ്ട്.

അമാല, കേവലം ഒരു ടൂറിസം കേന്ദ്രം എന്നതിലുപരി, ആഢംബരത്തെയും ആരോഗ്യത്തെയും കലയെയും സംസ്‌കാരത്തെയും പാരിസ്ഥിതിക സംരക്ഷണത്തെയും സമന്വയിപ്പിക്കുന്ന ഒരു ആഗോള ലക്ഷ്യസ്ഥാനമായി മാറാന്‍ ഒരുങ്ങുകയാണ്.