റിയാദ്: കേളി കലാസാംസ്‌കാരിക വേദിയുടെ 25-ാം വാര്‍ഷികാഘോഷങ്ങള്‍ക്ക് തുടക്കം കുറിച്ച് നവംബര്‍ 7 മുതല്‍ ആരംഭിക്കുന്ന ഒരുവര്‍ഷത്തെ പരിപാടികള്‍ക്ക് ഔപചാരിക തുടക്കം കുറിക്കാനായി ഗ്രാന്‍ഡ് മാസ്റ്റര്‍ ജി.എസ്. പ്രദീപ് റിയാദില്‍ എത്തി. കേളി സംഘടിപ്പിക്കുന്ന 'അറേബ്യന്‍ ബ്രെയിന്‍ ബാറ്റില്‍' എന്ന ബൃഹത്തായ വൈജ്ഞാനിക പംക്തി ഉള്‍ക്കൊള്ളുന്ന ബുദ്ധിപരിശീലന പരിപാടിയെ ഗ്രാന്റ് മാസ്റ്റര്‍ പ്രദീപ് നയിക്കും.
റിയാദ് കിംഗ് ഖാലിദ് അന്താരാഷ്ട്ര വിമാനത്താവളത്തില്‍ എത്തിയ പ്രദീപിനെ കേളി ഭാരവാഹികള്‍ സ്വീകരിച്ചു. കേളി സെക്രട്ടറി സുരേഷ് കണ്ണപുരം, പ്രസിഡന്റ് സെബിന്‍ ഇക്ബാല്‍, സംഘാടക സമിതി കണ്‍വീനര്‍ സുനില്‍ കുമാര്‍, ചെയര്‍മാന്‍ ഷാജി റസാഖ്, രക്ഷാധികാരി സെക്രട്ടറി കെ.പി.എം. സാദിഖ്, സമിതി അംഗം സുരേന്ദ്രന്‍ കൂട്ടായ്, ഒലയ്യ ഏരിയ രക്ഷാധികാരി കണ്‍വീനര്‍ ജവാദ്, ഒലയ്യ ഏരിയ പ്രസിഡന്റ് റിയാസ് പള്ളാട്ട് എന്നിവര്‍ സ്വീകരണത്തില്‍ പങ്കെടുത്തു.
കേളിയുടെ 25-ാം വാര്‍ഷികാഘോഷങ്ങള്‍ ഒരുവര്‍ഷം നീളുന്ന വിവിധ പരിപാടികളിലൂടെയും സാമൂഹ്യ, സാംസ്‌കാരിക, വിദ്യാഭ്യാസ രംഗങ്ങളിലെയും ഇടപെടലുകളിലൂടെയും ആഘോഷിക്കാന്‍ പദ്ധതിയിട്ടിട്ടുണ്ട്. കേളിയുടെ വിവിധ ഏരിയകളില്‍ പ്രവര്‍ത്തിക്കുന്ന യൂണിറ്റുകളെയും പങ്കാളികളാക്കികൊണ്ട് പ്രത്യേക ആഘോഷ പരിപാടികള്‍ സംഘടിപ്പിക്കാനാണ് തീരുമാനം.
അറേബ്യന്‍ ബ്രെയിന്‍ ബാറ്റില്‍ പരിപാടി, അറേബ്യന്‍ മേഖലയിലെ മുഴുവന്‍ ആളുകളിലേക്കും വിശിഷ്യാ വിദ്യാര്‍ത്ഥികളുടെ ഇടയില്‍ ബൗദ്ധികത്വര വര്‍ധിപ്പിക്കുകയും, അറിവിനെയും ബുദ്ധിശേഷിയെയും ആഘോഷമാക്കുകയും ചെയ്യുന്ന ലക്ഷ്യത്തോടെയാണ് സംഘടിപ്പിക്കുന്നത്. ഈ പരിപാടിയില്‍ സൗദിയിലെ വിവിധ മേഖലകളില്‍ നിന്ന് ഭാഷാ- ദേശാന്തരഭേദമില്ലാതെ നിരവധി ടീമുകള്‍ പങ്കെടുക്കും.
''ഗ്രാന്‍ഡ് മാസ്റ്റര്‍ ജി.എസ്. പ്രദീപിനെ പോലെയുള്ള വ്യക്തിത്വത്തിന്റെ സാന്നിധ്യം കേളിയുടെ വാര്‍ഷികാഘോഷങ്ങള്‍ക്ക് വലിയ പ്രചോദനമായിരിക്കുമെന്ന് കേളി ഭാരവാഹികള്‍ അറിയിച്ചു. അറിവിനെയും ചിന്തയെയും വളര്‍ത്തിയെടുക്കാന്‍ ലക്ഷ്യമിടുന്ന ഈ പരിപാടികള്‍ ഭാവി തലമുറയ്ക്ക് പ്രചോദനമാകും.
Related News
