റിയാദ്: സൗദി പബ്ലിക് ഇന്‍വെസ്റ്റ്മെന്റ് ഫണ്ട് (പി.ഐ.എഫ്) ഒമ്പത് വര്‍ഷം മുമ്പ് ആരംഭിച്ചതു മുതല്‍ ഇതുവരെ 250 ബില്യണ്‍ ഡോളര്‍ നിക്ഷേപം എത്തിയതായി ഫ്യൂച്ചര്‍ ഇന്‍വെസ്റ്റ്മെന്റ് ഇനിഷ്യേറ്റീവില്‍ (എഫ്.ഐ.ഐ) ഗവര്‍ണര്‍ യാസിര്‍ അല്‍-റുമയ്യന്‍ പറഞ്ഞു. സൗദി അറേബ്യയുടെ സാമ്പത്തിക പരിവര്‍ത്തനം ഒരു ആഗോള മാനദണ്ഡമായി മാറിയെന്ന് വിശദീകരിച്ച അല്‍-റുമയ്യന്‍, ആഗോള നേതാക്കളെ ഒരുമിപ്പിക്കുന്ന ഒരു സുപ്രധാന പ്രഖ്യാപനത്തിന് ഈ സംരംഭം സാക്ഷ്യം വഹിക്കുമെന്ന് പ്രതീക്ഷിക്കുന്നതായും പറഞ്ഞു.

ആഗോള ജിഡിപി 111 ട്രില്യണ്‍ ഡോളര്‍ കവിഞ്ഞെന്നും ഈ വര്‍ഷം 2.8% വളര്‍ച്ച പ്രതീക്ഷിക്കുന്നതായും അദ്ദേഹം പറഞ്ഞു. ആര്‍ട്ടിഫിഷ്യല്‍ ഇന്റലിജന്‍സിന്റെ (എ.ഐ) സ്വാധീനത്തെക്കുറിച്ച് വര്‍ധിച്ചുവരുന്ന ആഗോള ആശങ്ക അദ്ദേഹം ചൂണ്ടിക്കാട്ടി. ആഗോള അഭിവൃദ്ധി കൈവരിക്കുന്നതിന് സര്‍ക്കാരുകളും സ്വകാര്യമേഖലയും പങ്കാളികളായി പ്രവര്‍ത്തിക്കണമെന്ന് അദ്ദേഹം ആഹ്വാനം ചെയ്തു.

'സമൃദ്ധിയുടെ താക്കോല്‍' എന്ന പ്രമേയത്തില്‍ നടക്കുന്ന ഫ്യൂച്ചര്‍ ഇന്‍വെസ്റ്റ്മെന്റ് ഇനിഷ്യേറ്റീവ് ഒക്ടോബര്‍ 30 വരെ റിയാദില്‍ തുടരും. 20-ല്‍ അധികം രാജ്യങ്ങളില്‍ നിന്നുള്ള നേതാക്കളും 40 മന്ത്രിതല ഉദ്യോഗസ്ഥരും 600-ഓളം പ്രഭാഷകരും ഉള്‍പ്പെടെ ഏകദേശം 8,000 പ്രതിനിധികളാണ് ഈ പ്രമുഖ സാമ്പത്തിക ഫോറത്തില്‍ പങ്കെടുക്കുന്നത്.

വെല്ലുവിളികളെ എല്ലാവര്‍ക്കും ഉപകാരപ്രദമാകുന്ന അവസരങ്ങളാക്കി മാറ്റാന്‍ മനുഷ്യരാശിക്കുള്ള കഴിവിലുള്ള ശുഭാപ്തിവിശ്വാസം റുമയ്യാന്‍ ആവര്‍ത്തിച്ചു പ്രകടിപ്പിച്ചു. ലോക സുരക്ഷയും സ്ഥിരതയും കൈവരിക്കുന്നതിനും ഭാവിയെക്കുറിച്ചുള്ള ശുഭാപ്തിവിശ്വാസം വളര്‍ത്തുന്ന പുതിയ അവസരങ്ങള്‍ സൃഷ്ടിക്കുന്നതിനും ആഗോള മൂലധനം ഉപയോഗപ്പെടുത്തണമെന്ന് അദ്ദേഹം ആവശ്യപ്പെട്ടു.