റിയാദ്: സൗദി അറേബ്യയിലെ മുന്‍നിര സൂപ്പര്‍മാര്‍ക്കറ്റുകളിലെ അവശ്യവസ്തുക്കളുടെ വിലയില്‍ വലിയ വ്യത്യാസമുണ്ടെന്ന് 'അല്‍ ഇക്തിസാദിയ'യുടെ പുതിയ സര്‍വ്വേ. അടിസ്ഥാന ഭക്ഷ്യവസ്തുക്കള്‍ക്ക് ഏറ്റവും കുറഞ്ഞ വില ഈടാക്കുന്നതില്‍ ലുലു ഹൈപ്പര്‍മാര്‍ക്കറ്റാണ് ഒന്നാമത് എത്തിയിരിക്കുന്നത്.

അല്‍ ഇക്തിസാദിയയുടെ ഫിനാന്‍ഷ്യല്‍ അനാലിസിസ് യൂണിറ്റ് 2024-ല്‍ നടത്തിയ താരതമ്യ സര്‍വേയുടെ വിശദാംശങ്ങളാണ് ഇപ്പോള്‍ പുറത്തുവന്നത്. അരി, പഞ്ചസാര, ചിക്കന്‍, വെജിറ്റബിള്‍ ഓയില്‍, മുട്ട, മാവ്, ചായപ്പൊടി എന്നിവയടക്കമുള്ള അവശ്യ ഭക്ഷ്യവസ്തുക്കളുടെ വിലയാണ് സര്‍വ്വേക്കായി പരിഗണിച്ചത്.

സര്‍വ്വേ നടത്തിയ ഭക്ഷ്യവസ്തുക്കളുടെ മൊത്തം 'ബാസ്‌കറ്റ് മൂല്യം' 571 റിയാല്‍ ആണ്. ഇത് പഠനം നടത്തിയ സൂപ്പര്‍മാര്‍ക്കറ്റുകളില്‍ ഏറ്റവും കുറഞ്ഞ വില നിലവാരമാണ്. ഏറ്റവും ഉയര്‍ന്ന വിലനിലവാരം രേഖപ്പെടുത്തിയത് ദാന്യൂബിലാണ്. ഇവിടുത്തെ 'ബാസ്‌കറ്റ് മൂല്യം' 615 റിയാലാണ്. ഏറ്റവും കുറഞ്ഞ വിലയുള്ള ലുലുവും ഏറ്റവും ഉയര്‍ന്ന വിലയുള്ള അല്‍ ദാന്യൂബും തമ്മില്‍ 7.7 ശതമാനം വരെയാണ് വിലയില്‍ വ്യത്യാസം വരുന്നത്.

മറ്റ് പ്രമുഖ റീട്ടെയ്ല്‍ ശൃംഖലകളിലെ വിലനിലവാരം (മൊത്തം ബാസ്‌കറ്റ് മൂല്യം) ഇപ്രകാരമാണ്: കാരിഫോര്‍: 613 റിയാല്‍, പാണ്ട : 604 റിയാല്‍, തമീമി : 601 റിയാല്‍
സൗദാന്‍ (Saudania): 593 റിയാല്‍, അല്‍ ഒതൈം : 586 റിയാല്‍.

ആഗോള വിപണിയിലെ മാറ്റങ്ങള്‍ക്കും വിലക്കയറ്റങ്ങള്‍ക്കും ഇടയിലും സ്ഥിരതയുള്ളതും ഉപഭോക്താക്കള്‍ക്ക് അനുകൂലവുമായ വിലനയങ്ങള്‍ പാലിക്കുന്നതാണ് ലുലു ഹൈപ്പര്‍മാര്‍ക്കറ്റിന് ഈ നേട്ടം കൈവരിക്കാന്‍ സഹായകമായതെന്ന് വിപണി വിദഗ്ധര്‍ വിലയിരുത്തുന്നു.