ബാഗ്പത്, ഉത്തര്‍പ്രദേശ്- ബാഗ്പത് ജില്ലയിലെ ഗംഗനൗലി ഗ്രാമത്തില്‍ പള്ളി ഇമാമിന്റെ ഭാര്യയെയും രണ്ട് പിഞ്ചു പെണ്‍മക്കളെയും ക്രൂരമായി കൊലപ്പെടുത്തിയ സംഭവത്തില്‍ 13-ഉം 16-ഉം വയസ്സുള്ള രണ്ട് വിദ്യാര്‍ഥികളെ പോലീസ് കസ്റ്റഡിയിലെടുത്തു.

ഇമാമിന്റെ ഭാര്യ ഇസ്രാന (30), മക്കളായ സോഫിയ (5), സുമയ്യ (2) എന്നിവരാണ് കൊല്ലപ്പെട്ടത്. ദോഗത് പോലീസ് സ്റ്റേഷന്‍ പരിധിയിലുള്ള ബദി മസ്ജിദ് (ഗ്രാന്‍ഡ് മോസ്‌ക്) കോംപ്ലക്സിനുള്ളിലെ താമസസ്ഥലത്താണ് മൂവരെയും രക്തത്തില്‍ കുളിച്ച നിലയില്‍ കണ്ടെത്തിയത്.

സംഭവം നടന്ന് മണിക്കൂറുകള്‍ക്കകം തന്നെ കേസന്വേഷണത്തില്‍ വഴിത്തിരിവുണ്ടായി. കൗമാരക്കാരായ രണ്ട് വിദ്യാര്‍ഥികളാണ് കൃത്യം നടത്തിയതെന്ന് ബാഗ്പത് പോലീസ് സൂപ്രണ്ട് (എസ്പി) സൂരജ് റായ് സ്ഥിരീകരിച്ചു. ഇമാം മുഹമ്മദ് ഇബ്രാഹിം ശിക്ഷിച്ചതിനുള്ള പ്രതികാരമാണ് കൊലപാതകത്തിന് കാരണമെന്ന് എസ്പി റായ് വ്യക്തമാക്കി.

'പ്രായപൂര്‍ത്തിയാകാത്ത ഇരുവരും ഇമാമിന്റെ വിദ്യാര്‍ഥികളാണ്. ശാസിച്ചതിനുള്ള പ്രതികാരമായി തങ്ങളാണ് കുറ്റം ചെയ്തതെന്ന് ഇരുവരും സമ്മതിച്ചു,' എസ്പി റായ് പറഞ്ഞു.

രക്തത്തില്‍ കുളിച്ച മൃതദേഹങ്ങള്‍ പള്ളി പരിസരത്തെ കട്ടിലിലാണ് കണ്ടെത്തിയത്. ഇമാം മുഹമ്മദ് ഇബ്രാഹിം സംഭവസമയത്ത് സ്ഥലത്തുണ്ടായിരുന്നില്ല.

കൊലപാതകത്തിന് ഉപയോഗിച്ച ആയുധം കണ്ടെടുത്തതായും കൂടുതല്‍ ഫോറന്‍സിക് പരിശോധനകള്‍ നടക്കുകയാണെന്നും പോലീസ് അറിയിച്ചു. 'രണ്ട് പ്രതികളും പ്രായപൂര്‍ത്തിയാകാത്തവരാണ്. ജുവനൈല്‍ ജസ്റ്റിസ് ആക്ട് പ്രകാരമുള്ള നിയമനടപടികള്‍ സ്വീകരിച്ചു വരുന്നു,' എസ്പി കൂട്ടിച്ചേര്‍ത്തു. സംഭവം നാട്ടുകാരില്‍ വലിയ ഞെട്ടലും പ്രതിഷേധവും ഉണ്ടാക്കിയിട്ടുണ്ട്.