സൂറത്ത്: സാധാരണക്കാര്‍ക്ക് വീട് എന്ന സ്വപ്നം സാക്ഷാത്കരിക്കുന്നത് ഇന്ന് വലിയ വെല്ലുവിളിയാണ്. അങ്ങനെയുള്ളപ്പോള്‍, 10 ലക്ഷം രൂപ മാത്രം ലോണ്‍ എടുത്ത് 60 ലക്ഷം രൂപ വിലമതിക്കുന്ന ഫ്‌ളാറ്റ് സ്വന്തമാക്കിയ വീട്ടുജോലിക്കാരിയുടെ കഥ സമൂഹ മാധ്യമങ്ങളില്‍ തരംഗമാവുകയാണ്. ഇവരുടെ സാമ്പത്തിക അച്ചടക്കം കണ്ട് വീട്ടുടമസ്ഥപോലും അത്ഭുതപ്പെട്ടു.

ഗുജറാത്തിലെ സൂറത്തിലാണ് സംഭവം. നളിനി ഉനഗാര്‍ എന്ന കണ്ടന്റ് ക്രിയേറ്ററാണ് തന്റെ വീട്ടുജോലിക്കാരിയുടെ അവിശ്വസനീയ നേട്ടം സോഷ്യല്‍ മീഡിയ പ്ലാറ്റ്ഫോമായ 'എക്‌സി'ലൂടെ പങ്കുവെച്ചത്.

വീട്ടുജോലിക്കാരി താന്‍ സൂറത്തില്‍ 60 ലക്ഷം രൂപയുടെ ഒരു മൂന്നുമുറി ഫ്‌ളാറ്റ് വാങ്ങിയതായി ഒരു ദിവസം അറിയിക്കുകയായിരുന്നു. 10 ലക്ഷം രൂപ മാത്രമാണ് ഇതിനായി ലോണ്‍ എടുത്തതെന്നും, കൂടാതെ 4 ലക്ഷം രൂപ ഫര്‍ണിച്ചറിനായി ചെലവഴിച്ചെന്നും അവര്‍ പറഞ്ഞു.

നളിനി ഉനഗാര്‍ അക്ഷരാര്‍ത്ഥത്തില്‍ ഞെട്ടിപ്പോയി. എങ്ങനെ ഇത് സാധിച്ചു എന്ന് തിരക്കിയപ്പോഴാണ് വീട്ടുജോലിക്കാരിയുടെ സാമ്പത്തിക അച്ചടക്കം ബോധ്യപ്പെട്ടത്. ഇവര്‍ക്ക് ഇത് ആദ്യത്തെ പ്രോപ്പര്‍ട്ടി അല്ല. ഗുജറാത്തിലെ വെലഞ്ച വില്ലേജില്‍ ഒരു ഇരുനില വീടും ഒരു കടയും ഇവര്‍ക്കുണ്ട്. ഇവ രണ്ടും വാടകക്ക് കൊടുത്തിരിക്കുകയാണ്.

'ഞാന്‍ സത്യത്തില്‍ സ്തംഭിച്ചുപോയി,' നളിനി കുറിച്ചു. വീട്ടുജോലിയെടുക്കുന്നവര്‍ പാവപ്പെട്ടവരായിരിക്കും എന്ന സമൂഹത്തിന്റെ പൊതുധാരണയെ തിരുത്തിക്കുറിച്ചുകൊണ്ടാണ് ഈ സ്ത്രീയുടെ വിജയം. സ്മാര്‍ട്ട് സേവിംഗിന്റെയും അനാവശ്യ ചെലവുകള്‍ ഒഴിവാക്കിയതിന്റെയും ഫലമാണിതെന്ന് നളിനി ഉനഗാര്‍ പറയുന്നു.

ഈ കഥ നിമിഷ നേരം കൊണ്ടാണ് വൈറലായത്. മികച്ച സാമ്പത്തിക ആസൂത്രണം, പണം ലാഭിക്കാനുള്ള മനസ്സ്, നിശ്ചയദാര്‍ഢ്യം എന്നിവയെ നെറ്റിസണ്‍സ് കൈയടിച്ച് പ്രശംസിച്ചു. ധനികനായി തോന്നേണ്ട ആവശ്യമില്ല, സാമ്പത്തിക അച്ചടക്കമാണ് പ്രധാനം എന്ന സന്ദേശമാണ് ഈ സംഭവം നല്‍കുന്നതെന്ന് അവര്‍ അഭിപ്രായപ്പെട്ടു.