ജിദ്ദ: സൗദി അറേബ്യയുടെ റിയല്‍ എസ്റ്റേറ്റ് രംഗത്ത് പുതിയ നാഴികക്കല്ലായി, 100 കോടി ഡോളര്‍ (ഏകദേശം 8,300 കോടി ഇന്ത്യന്‍ രൂപ) ചെലവ് വരുന്ന 'ട്രംപ് പ്ലാസ ജിദ്ദ' പദ്ധതി പ്രഖ്യാപിച്ചു. ആഡംബര റിയല്‍ എസ്റ്റേറ്റ് ഡെവലപ്പര്‍മാരായ ദാര്‍ ഗ്ലോബല്‍, ട്രംപ് ഓര്‍ഗനൈസേഷനുമായി ചേര്‍ന്നാണ് ഈ ബൃഹദ് പദ്ധതിക്ക് തുടക്കം കുറിക്കുന്നത്.

ജിദ്ദയിലെ പ്രധാന പാതകളിലൊന്നായ കിംഗ് അബ്ദുല്‍ അസീസ് റോഡിനു സമീപം നിര്‍മിക്കുന്ന പദ്ധതി താമസത്തിനും ജോലിക്കും വിനോദത്തിനും വേണ്ടിയുള്ള സൗകര്യങ്ങള്‍ ഒരുമിക്കുന്ന മിക്‌സഡ്-യൂസ് കേന്ദ്രമായിരിക്കും.

പ്രീമിയം റെസിഡന്‍സുകള്‍, സര്‍വീസ് അപ്പാര്‍ട്ട്മെന്റുകള്‍, അത്യാധുനിക ഓഫീസ് സ്‌പേസുകള്‍ (Grade-A), എക്‌സ്‌ക്ലൂസീവ് ടൗണ്‍ഹൗസുകള്‍ എന്നിവ പദ്ധതിയുടെ പ്രധാന സവിശേഷതകളാണ്.

ന്യൂയോര്‍ക്കിലെ സെന്‍ട്രല്‍ പാര്‍ക്കിന്റെ മാതൃകയില്‍ രൂപകല്‍പ്പന ചെയ്ത പച്ചപ്പ് നിറഞ്ഞ ഒരു ഇടനാഴി പ്ലാസയുടെ മുഖ്യ ആകര്‍ഷണമാകും. ഇത് 'മാന്‍ഹട്ടന്‍ ശൈലിയിലുള്ള' നഗരജീവിതത്തിന്റെ ഊര്‍ജ്ജസ്വലത ജിദ്ദയിലേക്ക് എത്തിക്കാന്‍ ലക്ഷ്യമിടുന്നു.

അന്താരാഷ്ട്ര നിക്ഷേപകരെയും ആഡംബര ജീവിതശൈലിയെയും ആകര്‍ഷിക്കുന്ന ഈ പദ്ധതി, രാജ്യത്തിന്റെ സാമ്പത്തിക വൈവിധ്യവല്‍ക്കരണത്തിനായുള്ള സൗദി വിഷന്‍ 2030 ലക്ഷ്യങ്ങള്‍ക്ക് പിന്തുണ നല്‍കുന്ന ഒന്നാണ്.

സൗദി അറേബ്യയില്‍ ട്രംപ് ഓര്‍ഗനൈസേഷനും ദാര്‍ ഗ്ലോബലും ചേര്‍ന്ന് നടപ്പാക്കുന്ന രണ്ടാമത്തെ സംരംഭമാണിത്. കഴിഞ്ഞ വര്‍ഷം 'ട്രംപ് ടവര്‍ ജിദ്ദ' പ്രഖ്യാപിച്ചിരുന്നു. 2029-ഓടെ ട്രംപ് പ്ലാസയുടെ നിര്‍മ്മാണം പൂര്‍ത്തിയാക്കാനാണ് കമ്പനി ലക്ഷ്യമിടുന്നത്. ഈ പദ്ധതി ജിദ്ദയുടെ ആകാശരേഖയില്‍ പുതിയൊരു ബെഞ്ച്മാര്‍ക്ക് സ്ഥാപിക്കുമെന്നാണ് വിലയിരുത്തല്‍.