മസ്‌കത്ത്: ഈ വര്‍ഷം നവംബര്‍ 15 മുതല്‍ 23 വരെ നടക്കുന്ന സ്‌നൂക്കര്‍ ലോകകപ്പിന് ഒമാന്‍ ആതിഥേയത്വം വഹിക്കും. 35 രാജ്യങ്ങളില്‍ നിന്നുള്ള 120-ല്‍ അധികം ക്യൂയിസ്റ്റുകള്‍ മത്സരിക്കുന്ന ഈ പ്രധാന ടൂര്‍ണമെന്റ് മസ്‌കറ്റില്‍ വെച്ചാണ് നടക്കുക. പുരുഷ സിംഗിള്‍സ്, പുരുഷ ടീം മത്സരങ്ങളാണ് ലോകകപ്പിന്റെ ഭാഗമായി നടത്തപ്പെടുന്നത്.

ഒമാന്‍ ഓട്ടോമൊബൈല്‍ അസോസിയേഷനില്‍ നടന്ന പത്രസമ്മേളനത്തിലാണ് ഒമാന്‍ ബില്ല്യാര്‍ഡ്സ് ആന്‍ഡ് സ്‌നൂക്കര്‍ കമ്മിറ്റി (OBSC) വിജയകരമായ ബിഡ്ഡിനെക്കുറിച്ച് വിശദീകരിച്ചത്. ഇന്റര്‍നാഷണല്‍ ബില്ല്യാര്‍ഡ്സ് ആന്‍ഡ് സ്‌നൂക്കര്‍ ഫെഡറേഷന്റെ (IBSF) മേല്‍നോട്ടത്തിലാണ് ടൂര്‍ണമെന്റ് സംഘടിപ്പിക്കുന്നത്. സാംസ്‌കാരിക, കായിക, യുവജന മന്ത്രാലയം, സുഹാര്‍ ഇന്റര്‍നാഷണല്‍ ബാങ്ക്, ആക്ടീവ് ഒമാന്‍ എന്നിവ ടൂര്‍ണമെന്റിന് പിന്തുണ നല്‍കുന്നുണ്ട്.

കായിക ടൂറിസത്തിന് ഉണര്‍വേകും

'ഉയര്‍ന്ന നിലവാരത്തില്‍ പ്രധാന കായിക ഇനങ്ങള്‍ സംഘടിപ്പിക്കാനുള്ള ഒമാന്റെ കഴിവില്‍ അന്താരാഷ്ട്ര സമൂഹം വെച്ചുപുലര്‍ത്തുന്ന വിശ്വാസത്തിന്റെ പ്രതിഫലനമാണ് ഈ ബിഡ്ഡിങ് വിജയം,' OBSC ചെയര്‍മാന്‍ ഖാലിദ് ബിന്‍ ഖല്‍ഫാന്‍ റാഷിദ് അല്‍ സുബ്ഹി പറഞ്ഞു. വ്യക്തമായ കാഴ്ചപ്പാടും സമഗ്രമായ സംഘടനാ ചട്ടക്കൂടുമാണ് ഒമാന്റെ നിര്‍ദേശത്തെ മറ്റ് ബിഡ്ഡുകളില്‍ നിന്നും മികച്ചതാക്കിയത്. ഈ വര്‍ഷത്തെ ചാമ്പ്യന്‍ഷിപ്പ് സ്‌നൂക്കര്‍ ലോകകപ്പിന്റെ ചരിത്രത്തിലെ ഏറ്റവും വലിയ ടൂര്‍ണമെന്റുകളില്‍ ഒന്നായിരിക്കുമെന്നും അദ്ദേഹം കൂട്ടിച്ചേര്‍ത്തു.

ഒമാന്റെ ദേശീയ സ്‌നൂക്കര്‍ ടീമിനായുള്ള സമഗ്രമായ തയ്യാറെടുപ്പ് പദ്ധതിയെക്കുറിച്ചും സുബ്ഹി വിശദീകരിച്ചു. ഈ ലോകകപ്പ് രാജ്യത്തെ കായികരംഗത്തിനപ്പുറം കായിക ടൂറിസത്തെ ഉത്തേജിപ്പിക്കുമെന്നും ഒമാനി യുവാക്കള്‍ക്ക് ലോകത്തിലെ മികച്ച കളിക്കാരുമായി സംവദിക്കാന്‍ അവസരം നല്‍കുമെന്നും പ്രതീക്ഷിക്കപ്പെടുന്നു.

IBSF പ്ലാറ്റ്ഫോമുകള്‍, അന്താരാഷ്ട്ര മാധ്യമങ്ങള്‍, OBSCയുടെ ഔദ്യോഗിക ചാനലുകള്‍ വഴി ലോകകപ്പിന് വിപുലമായ മാധ്യമ കവറേജ് ലഭ്യമാക്കും. ഇത് രാജ്യത്തിനകത്തും വിദേശത്തുമുള്ള പ്രേക്ഷകര്‍ക്ക് മത്സരം പിന്തുടരാന്‍ സൗകര്യമൊരുക്കും.