ടെഹ്റാന്‍: തന്ത്രപ്രധാനമായ ഹോര്‍മുസ് കടലിടുക്കിലൂടെയുള്ള കപ്പല്‍ ഗതാഗതം പൂര്‍ണ്ണമായി പുനഃസ്ഥാപിക്കുന്നതിന് പുതിയ കര്‍ശന ഉപാധികളുമായി ഇറാന്‍. അമേരിക്ക തങ്ങളുടെ നിലപാട് തിരുത്തുന്നത് വരെ കടലിടുക്ക് തുറക്കില്ലെന്ന് ഇറാന്റെ സുപ്രീം നാഷണല്‍ സെക്യൂരിറ്റി കൗണ്‍സില്‍ വ്യക്തമാക്കി. ഒമാന്റെ മാധ്യസ്ഥതയില്‍ ചര്‍ച്ചകള്‍ പുരോഗമിക്കുന്നതിനിടയിലാണ് ഇറാന്റെ പുതിയ പ്രഖ്യാപനം.
ഇറാന്റെ പ്രധാന ആവശ്യങ്ങള്‍:
ഇറാനെതിരെ ഇനിയൊരിക്കലും ഭീഷണികള്‍ മുഴക്കരുത്. ഇറാനുനേരെയുള്ള സൈനിക നടപടികളും മേഖലയിലെ സഖ്യകക്ഷികള്‍ക്കെതിരായ യുദ്ധങ്ങളും അമേരിക്ക സ്ഥിരമായി അവസാനിപ്പിക്കണം. ഇറാനിയന്‍ തുറമുഖങ്ങള്‍ക്ക്‌മേല്‍ അമേരിക്ക ഏര്‍പ്പെടുത്തിയിരിക്കുന്ന നാവിക ഉപരോധം പിന്‍വലിക്കുകയും രാജ്യത്തിന് മേലുള്ള ഉപരോധങ്ങള്‍ പൂര്‍ണ്ണമായി നീക്കം ചെയ്യുകയും വേണം. യുദ്ധത്തില്‍ ഇറാനുണ്ടായ നാശനഷ്ടങ്ങള്‍ക്ക് പൂര്‍ണ്ണമായി നഷ്ടപരിഹാരം നല്‍കുക കൂടാതെ മരവിപ്പിച്ച ആസ്തികള്‍ ഉപാധികളില്ലാതെ മോചിപ്പിക്കുകയും ചെയ്യുക.
ഇറാന്റെ ഔദ്യോഗിക മാധ്യമമാണ് സുപ്രീം നാഷണല്‍ സെക്യൂരിറ്റി കൗണ്‍സില്‍ സെക്രട്ടറിയും റെവല്യൂഷണറി ഗാര്‍ഡ് കമാന്‍ഡറുമായ മുഹമ്മദ് ബാഘെര്‍ സോള്‍ഘാദറിന്റെ പ്രസ്താവന പുറത്തുവിട്ടത്. കടലിടുക്ക് തുറക്കുന്നതുമായി ബന്ധപ്പെട്ട് അമേരിക്കയുടെ ഭാഗത്തുനിന്ന് ഇതുവരെ ഔദ്യോഗിക പ്രതികരണങ്ങളൊന്നും വന്നിട്ടില്ല.
യു.എ.ഇ ടാങ്കറിന് നേരെ ആക്രമണം
അതിനിടെ, ഹോര്‍മുസ് കടലിടുക്കിലൂടെ സഞ്ചരിക്കുകയായിരുന്ന യുണൈറ്റഡ് അറബ് എമിറേറ്റ്സിന്റെ അഡ്‌നോക് ടാങ്കറിന് നേരെ ഇറാന്‍ നടത്തിയ അപകടകരമായ ആക്രമണത്തെ ഗള്‍ഫ് സഹകരണ കൗണ്‍സില്‍ (GCC) സെക്രട്ടറി ജനറല്‍ ജാസം അല്‍ ബുദൈവി ശക്തമായി അപലപിച്ചു. കടലിടുക്കിലെ സംഘര്‍ഷാവസ്ഥയും നയതന്ത്ര നീക്കങ്ങളും തുടരുന്നതിനിടയിലാണ് പുതിയ സംഭവവികാസങ്ങള്‍.
Related News
