ജിദ്ദ- സൗദി അറേബ്യയിലെ ജിദ്ദയില്‍ നടക്കുന്ന മൂന്നാമത് അന്താരാഷ്ട്ര ന്യൂക്ലിയര്‍ സയന്‍സ് ഒളിമ്പ്യാഡിന്റെ ആദ്യ ഘട്ട മത്സരമായ പ്രായോഗിക പരീക്ഷയില്‍ 19 രാജ്യങ്ങളില്‍ നിന്നുള്ള 60 വിദ്യാര്‍ഥികള്‍ പങ്കെടുത്തു. 60-ഓളം അന്താരാഷ്ട്ര ശാസ്ത്ര വിദഗ്ധരുടെ മേല്‍നോട്ടത്തില്‍, പങ്കെടുക്കുന്ന രാജ്യങ്ങളുടെ ഭാഷകളിലേക്ക് വിവര്‍ത്തനം ചെയ്ത ചോദ്യങ്ങളാണ് പരീക്ഷക്കായി നല്‍കിയത്. പരീക്ഷണങ്ങള്‍ നടത്താനും അവയുടെ ഫലങ്ങള്‍ വിശകലനം ചെയ്യാനുമുള്ള വിദ്യാര്‍ത്ഥികളുടെ ശേഷിയാണ് ഈ പരീക്ഷയിലൂടെ അളക്കുന്നത്.

സ്‌കൂള്‍ വിദ്യാര്‍ത്ഥികള്‍ക്കായി ന്യൂക്ലിയര്‍ സയന്‍സിലും അതിന്റെ സമാധാനപരമായ പ്രയോഗങ്ങളിലും സംഘടിപ്പിക്കുന്ന ഏറ്റവും പ്രമുഖ അന്താരാഷ്ട്ര മത്സരങ്ങളിലൊന്നാണിത്. അഞ്ച് മണിക്കൂര്‍ നീണ്ട പ്രായോഗിക പരീക്ഷയില്‍ ശാസ്ത്രീയ ആശയങ്ങള്‍ പ്രായോഗികമായി നടപ്പാക്കാനും വിശകലനം ചെയ്യാനുമുള്ള മികവാണ് വിലയിരുത്തിയത്. ഇതിന് മുന്നോടിയായി, കഴിഞ്ഞ ദിവസം വൈകുന്നേരം പങ്കെടുത്ത രാജ്യങ്ങളിലെ ടീം ലീഡര്‍മാര്‍ ചേര്‍ന്ന് പരീക്ഷാ ചോദ്യങ്ങള്‍ ചര്‍ച്ച ചെയ്യുകയും അംഗീകരിക്കുകയും അതത് ഭാഷകളിലേക്ക് വിവര്‍ത്തനം ചെയ്യുകയും ചെയ്തിരുന്നു.

ഓഗസ്റ്റ് 2 മുതല്‍ 9 വരെയാണ് സൗദി അറേബ്യ ഒളിമ്പ്യാഡിന് ആതിഥേയത്വം വഹിക്കുന്നത്. വിദ്യാഭ്യാസ മന്ത്രാലയം, 'മൗഹിബ', കിംഗ് അബ്ദുള്ള സിറ്റി ഫോര്‍ അറ്റോമിക് ആന്‍ഡ് റിന്യൂവബിള്‍ എനര്‍ജി, കിംഗ് അബ്ദുല്‍ അസീസ് യൂണിവേഴ്‌സിറ്റി എന്നിവ സംയുക്തമായാണ് 'പ്രകാശിക്കുന്ന മനസ്സുകള്‍, വാഗ്ദാനമുള്ള ഭാവിക്ക്' എന്ന പ്രമേയത്തില്‍ ഇത് സംഘടിപ്പിക്കുന്നത്. പ്രായോഗിക പരീക്ഷയ്ക്ക് പുറമെ 5 മണിക്കൂര്‍ നീളുന്ന തിയറി പരീക്ഷയും ഒളിമ്പ്യാഡിന്റെ ഭാഗമായുണ്ട്. അന്താരാഷ്ട്ര ഒളിമ്പ്യാഡ് കൗണ്‍സിലിനാണ് ഇതിന്റെ മേല്‍നോട്ട ചുമതല. മിഡില്‍ ഈസ്റ്റില്‍ ആദ്യമായാണ് ഈ ഒളിമ്പ്യാഡ് സംഘടിപ്പിക്കുന്നത്.