റിയാദ്: അമേരിക്കന്‍ സൈന്യവുമായി ചേര്‍ന്ന് ഇറാഖിലെ ഇറാന്‍ അനുകൂല ഗ്രൂപ്പുകളുടെ കേന്ദ്രങ്ങളില്‍ ആക്രമണം നടത്തിയതായി സൗദി അറേബ്യയുടെ പ്രതിരോധ മന്ത്രാലയം ബുധനാഴ്ച പുലര്‍ച്ചെ അറിയിച്ചു. കിഴക്കന്‍ പ്രവിശ്യയിലെ പെട്രോളിയം കേന്ദ്രങ്ങള്‍ ലക്ഷ്യമിട്ട് ചൊവ്വാഴ്ച വൈകിട്ട് എത്തിയ നിരവധി ഡ്രോണുകള്‍ തകര്‍ത്തെറിഞ്ഞതായി മന്ത്രാലയം വ്യക്തമാക്കിയതിനു പിന്നാലെയായിരുന്നു ആക്രമണം. ഇറാഖിന്റെ മണ്ണില്‍ നിന്നാണ് ഈ ഭീകരാക്രമണങ്ങള്‍ വീണ്ടും ഉണ്ടായതെന്നും ഇറാന്‍ പിന്തുണയുള്ള ഭീകര സംഘടനകളാണ് ഇതിന് പിന്നിലെന്നും പ്രതിരോധ മന്ത്രാലയ ഔദ്യോഗിക വക്താവ് മേജര്‍ ജനറല്‍ തുര്‍ക്കി അല്‍-മാലികി പറഞ്ഞു. രാജ്യത്തെയും സ്വന്തം ആസ്തികളെയും പ്രതിരോധിക്കാനുള്ള സൗദി അറേബ്യയുടെ സ്വാഭാവിക അവകാശവും, ഉചിതമായ സമയത്തും സ്ഥലത്തും തിരിച്ചടിക്കാനുള്ള അവകാശവും തങ്ങള്‍ക്കുണ്ടെന്ന് അദ്ദേഹം ഊന്നിപ്പറഞ്ഞു.
സൗദി അറേബ്യയുടെ കിഴക്കന്‍ പ്രവിശ്യയിലെയും റിയാദിലെയും പെട്രോളിയം കേന്ദ്രങ്ങള്‍ ലക്ഷ്യമിട്ട് ചൊവ്വാഴ്ച വൈകിട്ടായിരുന്നു ഡ്രോണ്‍ ആക്രമണങ്ങള്‍. പ്രതിരോധ സേന ഈ ഡ്രോണുകളെ തകര്‍ത്തു. ഇറാഖിന്റെ മണ്ണില്‍ നിന്ന് ഇറാന്‍ പിന്തുണയുള്ള ഭീകര സംഘടനകളാണ് തുടര്‍ച്ചയായി ഈ ആക്രമണങ്ങള്‍ നടത്തുന്നതെന്ന് മേജര്‍ ജനറല്‍ തുര്‍ക്കി അല്‍-മാലികി പറഞ്ഞു. രാജ്യത്തെയും സ്വന്തം ആസ്തികളെയും പ്രതിരോധിക്കാനും, ഉചിതമായ സമയത്തും സ്ഥലത്തും ശക്തമായി തിരിച്ചടിക്കാനുമുള്ള അവകാശമുണ്ടെന്നും അദ്ദേഹം പറഞ്ഞു. തിങ്കളാഴ്ചയും സമാനമായ രീതിയില്‍ ഇറാഖില്‍ നിന്ന് തൊടുത്തുവിട്ട ഡ്രോണുകള്‍ സൗദി വ്യോമ പ്രതിരോധ സേന തടഞ്ഞിരുന്നു.
റിയാദിലെയും കിഴക്കന്‍ പ്രവിശ്യയിലെയും എണ്ണ കേന്ദ്രങ്ങള്‍ക്ക് നേരെ യെമനിലും ഇറാഖിലുമുള്ള ഇറാന്‍ അനുകൂല ഭീകര സംഘടനകള്‍ നടത്തിയ ആക്രമണങ്ങളെ സൗദി മന്ത്രിസഭ ശക്തമായി അപലപിച്ചു. ചെങ്കടലിലെ വ്യാവസായിക കപ്പലുകള്‍ക്ക് നേരെ ഉണ്ടായ ആക്രമണങ്ങളും മന്ത്രിസഭ അപലപിച്ചിട്ടുണ്ട്. രാജ്യത്തിന്റെ സുരക്ഷയും ദേശീയ ആസ്തികളും സംരക്ഷിക്കുന്നതില്‍ ഒട്ടും പിന്നോട്ടില്ലെന്നും ശത്രുതാപരമായ നടപടികള്‍ക്ക് ശക്തമായ മറുപടി നല്‍കുമെന്നും സൗദി പ്രസ് ഏജന്‍സി (എസ്.പി.എ) റിപ്പോര്‍ട്ട് ചെയ്തു.
സൗദി അറേബ്യയുടെ ഭാഗത്തുനിന്ന് ശക്തമായ പ്രതിഷേധം ഉയര്‍ന്നതിനെത്തുടര്‍ന്ന്, ഇറാഖി മണ്ണില്‍ നിന്ന് ഡ്രോണുകള്‍ ഉപയോഗിച്ച് സൗദി അറേബ്യയെ ലക്ഷ്യമിട്ട സംഭവത്തെക്കുറിച്ച് അന്വേഷിക്കാന്‍ ഇറാഖി പ്രധാനമന്ത്രി അലി അല്‍-സൈദി ഉത്തരവിട്ടു. ഇറാഖിന്റെ ഭൂപ്രദേശം ആക്രമണങ്ങള്‍ക്കുള്ള താവളമായി ഉപയോഗിക്കുന്നത് തടയാന്‍ ആവശ്യമായ എല്ലാ നടപടികളും ആ രാജ്യം സ്വീകരിക്കണമെന്ന് സൗദി മന്ത്രിസഭ ആവശ്യപ്പെട്ടു. ക്രിമിനല്‍ ആക്രമണങ്ങളെ അപലപിച്ച വിവിധ രാജ്യങ്ങളുടെയും അന്താരാഷ്ട്ര സംഘടനകളുടെയും നിലപാടുകളെ മന്ത്രിസഭ അഭിനന്ദിച്ചു.
കഴിഞ്ഞ ആഴ്ച മുതല്‍ ഹൂതികള്‍ രാജ്യത്തിന് നേരെ മിസൈല്‍, ഡ്രോണ്‍ ആക്രമണങ്ങള്‍ നടത്തുമ്പോഴും സൗദി ഷിപ്പിംഗിന് ഉപരോധം പ്രഖ്യാപിക്കുമ്പോഴും, അന്താരാഷ്ട്ര നിയമങ്ങള്‍ക്ക് വിധേയമായി കപ്പലുകളെയും രാജ്യത്തിന്റെ താല്‍പ്പര്യങ്ങളും സംരക്ഷിക്കാന്‍ ആവശ്യമായ എല്ലാ നടപടികളും സ്വീകരിക്കുമെന്ന് സൗദി വിദേശകാര്യ മന്ത്രാലയം വ്യക്തമാക്കി. മേഖലയിലെ സംഘര്‍ഷങ്ങള്‍ ലഘൂകരിക്കുന്നതിനും ജലപാതകളുടെ സുരക്ഷ ഉറപ്പാക്കുന്നതിനുമായി സൗഹൃദ രാജ്യങ്ങളുമായി ചേര്‍ന്ന് സമഗ്രമായ ശ്രമങ്ങള്‍ തുടരുകയാണെന്നും അധികൃതര്‍ അറിയിച്ചു.
Related News
