റിയാദ്- 2026 ഫിഫ ലോകകപ്പ് മത്സരങ്ങള്‍ നേരിട്ട് കാണുന്നതിനുള്ള ആവേശം പൊതുജനങ്ങളിലേക്ക് എത്തിക്കുന്നതിനായി റിയാദ് റീജിയണ്‍ മുന്‍സിപ്പാലിറ്റി വിപുലമായ സൗകര്യങ്ങള്‍ ഒരുക്കുന്നു. 'വേള്‍ഡ് കപ്പ് ഈസ് ക്ലോസര്‍ ടു യു' (ലോകകപ്പ് നിങ്ങളിലേക്ക് കൂടുതല്‍ അരികില്‍) എന്ന പ്രത്യേക കാമ്പയിന്റെ ഭാഗമായി തലസ്ഥാന നഗരിയില്‍ 12 പ്രധാന കേന്ദ്രങ്ങളും, റിയാദിന് കീഴിലുള്ള മറ്റ് ഗവര്‍ണറേറ്റുകളിലും സെന്ററുകളിലുമായി 52-ലധികം സ്ഥലങ്ങളും മുനിസിപ്പാലിറ്റി സജ്ജീകരിച്ചിട്ടുണ്ട്. സ്വദേശികള്‍ക്കും സന്ദര്‍ശകര്‍ക്കും തങ്ങളുടെ താമസസ്ഥലങ്ങള്‍ക്ക് തൊട്ടടുത്ത് ഇരുന്ന് തന്നെ ലോകകപ്പ് മത്സരങ്ങള്‍ തത്സമയം ആസ്വദിക്കാനുള്ള അവസരമൊരുക്കുകയാണ് ഈ പദ്ധതിയുടെ പ്രധാന ലക്ഷ്യം.
തലസ്ഥാന നഗരമായ റിയാദില്‍ അഞ്ച് ഭൂമിശാസ്ത്രപരമായ മേഖലകളെ കേന്ദ്രീകരിച്ച് 'മദീനത്തി' ഓഫീസുകള്‍ വഴിയാണ് 12 കേന്ദ്രങ്ങള്‍ ഒരുക്കിയിരിക്കുന്നത്. നഗരമധ്യത്തിലെ അല്‍-മന്‍സൂറ, അല്‍-മഗ്രാസത്, അല്‍-മഅ്തര്‍ എന്നിവയും വടക്കന്‍ റിയാദിലെ അല്‍-നഫല്‍, അല്‍-അഖീഖ് എന്നിവയും കിഴക്കന്‍ മേഖലയിലെ ഖുര്‍തുബ, അല്‍-ഖലീജ് എന്നിവയും ഇതില്‍ ഉള്‍പ്പെടുന്നു. കൂടാതെ പടിഞ്ഞാറന്‍ റിയാദിലെ ലബാന്‍, തുവൈഖ് എന്നീ പ്രദേശങ്ങളിലും തെക്കന്‍ മേഖലയിലെ ഉക്കാസ്, അസ്സലാം, അല്‍-ഹാഇര്‍ എന്നിവിടങ്ങളിലും മത്സരങ്ങള്‍ തത്സമയം പ്രദര്‍ശിപ്പിക്കുന്നതിനുള്ള വലിയ സ്‌ക്രീനുകളും മറ്റ് ആധുനിക സജ്ജീകരണങ്ങളും ഒരുക്കിയിട്ടുണ്ട്.
തലസ്ഥാനത്തിന് പുറത്തുള്ള വിവിധ ഗവര്‍ണറേറ്റുകളിലും സെന്ററുകളിലുമായി മുനിസിപ്പാലിറ്റികള്‍ക്ക് കീഴില്‍ 52-ലധികം പൊതു ഇടങ്ങളാണ് മത്സരങ്ങള്‍ക്കായി ഒരുങ്ങുന്നത്. പബ്ലിക് പാര്‍ക്കുകള്‍, സാംസ്‌കാരിക കേന്ദ്രങ്ങള്‍, വലിയ സ്‌ക്വയറുകള്‍, കമ്മ്യൂണിറ്റി ഹാളുകള്‍, തുറസ്സായ സ്ഥലങ്ങള്‍ എന്നിവയാണ് ഇതിനായി തിരഞ്ഞെടിത്തിട്ടുള്ളത്. കളിയാരാധകര്‍ക്ക് ഒത്തുചേരാനും ആവേശം പങ്കിടാനും അനുയോജ്യമായ ഒരു സംവേദനാത്മക അന്തരീക്ഷം സൃഷ്ടിക്കുക എന്ന ലക്ഷ്യത്തോടെയാണ് ഈ കേന്ദ്രങ്ങളെല്ലാം മനോഹരമായി രൂപകല്‍പ്പന ചെയ്തിരിക്കുന്നത്.
ഹൗത ബനി തമീം, അല്‍-ദിലം, അല്‍-ഹയാനിയ, ബിര്‍ക്ക്, അല്‍-ബാദിഅ്, റൗദത് സുദൈര്‍, അല്‍-ഹില്‍വ, അല്‍-ഹസ, അല്‍-ദവാദ്മി, അല്‍-ഖുവൈഇയ്യ, അല്‍-ബജാദിയ, അല്‍-റൈന്‍, അല്‍-ഹദര്‍, അഫീഫ്, മറാത്ത്, നാഫി, അല്‍-സുല്‍ഫി, തമീര്‍, അല്‍-അര്‍താവിയ, ഥാദിഖ്, ഹുറൈമല, അല്‍-മജ്മഅ്, അല്‍-ജല്ല, തബ്രാക്ക്, അല്‍-ഹരീഖ്, അല്‍-അഫ്‌ലാജ്, അല്‍-ഹൈഥം, അല്‍-ഖര്‍ജ് തുടങ്ങി റിയാദ് പ്രവിശ്യയിലെ നിരവധി ഗവര്‍ണറേറ്റുകളില്‍ ഈ സേവനം ലഭ്യമാണ്.
Related News
