ദമ്മാം: നിയമസഭാ തെരഞ്ഞെടുപ്പില്‍ 'ഇന്ദിരാ ഗ്യാരന്റി'യിലൂടെ യു.ഡി.എഫ് ജനങ്ങള്‍ക്ക് നല്‍കിയ പ്രധാന വാഗ്ദാനങ്ങളിലൊന്നായ കെ.എസ്.ആര്‍.ടി.സി ബസുകളിലെ സ്ത്രീകളുടെ സൗജന്യയാത്ര യാഥാര്‍ത്ഥ്യമായതില്‍ ആഹ്ലാദം പ്രകടിപ്പിച്ച് സൗദി ഒ.ഐ.സി.സി ഈസ്റ്റേണ്‍ പ്രോവിന്‍സ് വനിതാവേദി മധുരപലഹാരങ്ങള്‍ വിതരണം ചെയ്തു.
യു.ഡി.എഫ് മന്ത്രിസഭ അധികാരമേറ്റ് ഒരു മാസം തികയുന്നതിന് മുമ്പ് തന്നെ, സ്ത്രീശാക്തീകരണ രംഗത്ത് വലിയൊരു നാഴികക്കല്ലായ 'പ്രിയദര്‍ശിനി' പദ്ധതി നടപ്പിലാക്കിയ മുഖ്യമന്ത്രി വി.ഡി. സതീശനെയും ഗതാഗത വകുപ്പ് മന്ത്രി സി.പി. ജോണിനെയും മന്ത്രിസഭയെയും ഒ.ഐ.സി.സി സൗദി ഈസ്റ്റേണ്‍ പ്രോവിന്‍സ് കമ്മിറ്റി പ്രസിഡന്റ് ലിബി പാപ്പച്ചന്‍ ജയിംസും, ജനറല്‍ സെക്രട്ടറി ഹുസ്‌നാ ആസിഫും അഭിനന്ദിച്ചു.
കേരളത്തിന്റെ ചരിത്രത്തില്‍ അടയാളപ്പെടുത്തപ്പെടുന്ന 'പ്രിയദര്‍ശിനി' സൗജന്യ ബസ് യാത്രയുടെ ആദ്യഘട്ടം ഓര്‍ഡിനറി ബസുകളിലാണ് നടപ്പിലാക്കിയിരിക്കുന്നത്. പദ്ധതിക്കെതിരെ സി.പി.എമ്മും ബി.ജെ.പിയും ഉന്നയിക്കുന്ന ആരോപണങ്ങള്‍ തീര്‍ത്തും ബാലിശമാണ്. വി.ഡി. സതീശന്‍ സര്‍ക്കാര്‍ നടപ്പിലാക്കുന്ന ജനകീയ പദ്ധതികളില്‍ അസൂയയുള്ളവര്‍ ഉന്നയിക്കുന്ന ഇത്തരം മുടന്തന്‍ ന്യായങ്ങളെ കേരളത്തിലെ സ്ത്രീസമൂഹം അര്‍ഹിക്കുന്ന അവജ്ഞയോടെ തള്ളിക്കളയുന്നുവെന്ന് ഒ.ഐ.സി.സി വനിതാവേദി നേതാക്കള്‍ പറഞ്ഞു.
ഡോ. സിന്ധു ബിനു, രാധിക ശ്യാം പ്രകാശ്, അര്‍ച്ചന അഭിഷേക്, അഞ്ജു നിറാസ്, വിന്ദുജ, സൗമി നവാസ്, നിമ്മി സുരേഷ്, സിമി സഗീര്‍, ഷീജ സതീഷ് എന്നിവര്‍ നേതൃത്വം നല്‍കി.
Related News
