.jpg)
അറാര്‍: അറാറില്‍ അന്തരിച്ച ഉത്തര്‍പ്രദേശ് ഫൈസാബാദ് സ്വദേശി ഗയാസ് റാമിന്റെ (43) മൃതദേഹം നടപടിക്രമങ്ങള്‍ പൂര്‍ത്തിയാക്കി അറാര്‍ പ്രവാസി സംഘം നാട്ടിലെത്തിച്ചു. കഴിഞ്ഞ എട്ട് വര്‍ഷമായി അറാറില്‍ ആട്ടിടയനായി ജോലി ചെയ്തുവരികയായിരുന്ന ഗയാസ് റാമിന്, പെട്ടെന്നുണ്ടായ പനിയെത്തുടര്‍ന്ന് മസ്തിഷ്‌ക മരണം സംഭവിക്കുകയും പത്താം നാള്‍ മരണപ്പെടുകയുമായിരുന്നു. അറാര്‍ മെഡിക്കല്‍ ടവര്‍ ആശുപത്രി മോര്‍ച്ചറിയില്‍ സൂക്ഷിച്ചിരുന്ന മൃതദേഹം, നിയമനടപടികള്‍ പൂര്‍ത്തിയാക്കുന്നതിന് നേതൃത്വം നല്‍കിയ അറാര്‍ പ്രവാസി സംഘം രക്ഷാധികാരി സക്കീര്‍ താമരത്ത് ഏറ്റുവാങ്ങി അറാര്‍ എയര്‍പോര്‍ട്ടിലെത്തിച്ചു. ജനറല്‍ സെക്രട്ടറി ഷാജി ആലുവ, കേന്ദ്ര കമ്മിറ്റി അംഗങ്ങളായ സന്തോഷ് തൃശൂര്‍, റെജി ആലപ്പുഴ എന്നിവരും അദ്ദേഹത്തോടൊപ്പം ഉണ്ടായിരുന്നു.
അറാറില്‍ നിന്നും സൗദി എയര്‍ലൈന്‍സ് വിമാനത്തില്‍ റിയാദിലേക്കും, അവിടെ നിന്ന് ഫ്‌ലൈ നാസ് വിമാനത്തില്‍ ലഖ്നൗവിലും എത്തിച്ച മൃതദേഹം, നാട്ടിലെത്തിച്ച ശേഷം റിഥോലി ക്ഷേത്ര ശ്മശാനത്തില്‍ സംസ്‌കരിച്ചു.
മൃതദേഹം എംബാം ചെയ്യുന്നതിനുള്ള ചെലവ് സ്‌പോണ്‍സര്‍ വഹിച്ചെങ്കിലും, നാട്ടിലെത്തിക്കുന്നതിനുള്ള കാര്‍ഗോ ചെലവ് നല്‍കാന്‍ സ്‌പോണ്‍സര്‍ വിസമ്മതിച്ചു. തുടര്‍ന്ന് ഇന്ത്യന്‍ എംബസിയെ ബന്ധപ്പെട്ടെങ്കിലും, തൊഴിലാളി ഹുറൂബ് (സ്‌പോണ്‍സറില്‍ നിന്നും ഒളിച്ചോടിയ) അല്ലാത്തതിനാല്‍ ചെലവ് സ്‌പോണ്‍സര്‍ തന്നെ വഹിക്കണമെന്ന മറുപടിയാണ് ലഭിച്ചത്. എന്നാല്‍ കുടുംബത്തിനും സ്‌പോണ്‍സര്‍ക്കും എംബസിക്കും കാര്യങ്ങള്‍ നിര്‍വഹിക്കാന്‍ കഴിയാതെ വന്ന സാഹചര്യത്തില്‍, നാട്ടിലെ മുന്‍ എം.എല്‍.എയും മുന്‍ മന്ത്രിയുമായ സമാജ്വാദി പാര്‍ട്ടി നേതാവ് അബ്ബാസ് അലി സൈദിയാണ് മൃതദേഹം നാട്ടിലെത്തിക്കുന്നതിനുള്ള സാമ്പത്തിക സഹായം നല്‍കിയത്.
കുസും കുമാരിയാണ് ഗയാസ് റാമിന്റെ ഭാര്യ. സുകുനന്ദന്‍, ചാന്ദന്‍, രോഷ്‌നി, അന്‍ഷു, ഗുദിയ എന്നിവര്‍ മക്കളാണ്.
Related News
